ରଘୁନାଥପୁର,୧୫।୧୦(ଡି.ଏନ୍ଏ.): ରଘୁନାଥପୁର ବ୍ଲକ ବିଦ୍ୟାଧରପୁର ପଞ୍ଚାୟତର ସଫେଇ କାର୍ଯ୍ୟ ପାଇଁ ୫୧ ସ୍ବୟଂ ସହାୟିକା ଗୋଷ୍ଠୀ(ଏସ୍ଏଚ୍ଜି)ର ସଦସ୍ୟାଙ୍କୁ ଦାୟିତ୍ୱ ଦେଇଛନ୍ତି ସରପଞ୍ଚ ସାହେଦା ତବସୁମ। ଏ ସବୁ ଏସ୍ଏଚ୍ଜିରେ ପ୍ରାୟ ୫୦୦ରୁ ଊର୍ଦ୍ଧ୍ୱ ମହିଳା ରହିଛନ୍ତି। ପ୍ରତି ଓ୍ବାର୍ଡର ସଫେଇ ପାଇଁ ସେହି ଓ୍ବାର୍ଡର ଏସ୍ଏଚ୍ଜିକୁ ଦାୟିତ୍ୱ ଦିଆଯାଇଛି। ଅଳିଆ ସଫେଇ ପରେ ଆବର୍ଜନାଗୁଡ଼ିକୁ ଏଥିପାଇଁ ତିଆରି ହୋଇଥିବା କୁଣ୍ଡରେ ପକାଇବା ଲାଗି ଏସ୍ଏଚ୍ଜିର ସଦସ୍ୟାମାନଙ୍କୁ ସରପଞ୍ଚ ତବସୁମ କହିଛନ୍ତି। ଏହି ସଫେଇ ପାଇଁ ପଞ୍ଚାୟତ ପାଣ୍ଠିରୁ ପ୍ରତି ୱାର୍ଡର ଜନସଂଖ୍ୟା ଅନୁଯାୟୀ ମୁଣ୍ଡ ପିଛା ୨୦ ଟଙ୍କା ଲେଖାଏ ଖର୍ଚ୍ଚ କରାଯିବାକୁ ବ୍ୟବସ୍ଥା କରାଯାଇଛି। ଏହି କାର୍ଯ୍ୟରେ ସମିତିସଭ୍ୟା ସାଗରିକା ତରେଇ, ସାମାଜିକ କର୍ମୀ ରହିମ୍ ଖାଁ, ଅଜୟ ସାମଲ ଓ ପଞ୍ଚାୟତବାସୀ ସହଯୋଗ କରୁଛନ୍ତି। ଏସବୁ କାର୍ଯ୍ୟ ସରପଞ୍ଚ ତବସୁମ୍ ନିଜେ ତଦାରଖ କରିବା ସହ ଘରକୁ ଘର ଯାଇ ପରିବେଶ ସୁରକ୍ଷା ସମ୍ପର୍କିତ ସଚେତନତା ବାର୍ତ୍ତା ପ୍ରଦାନ କରୁଛନ୍ତି। ଏହାଛଡ଼ା ଘରେ ପାଇଖାନା ଥାଇ ବାହାରେ ଶୌଚ କରୁଥିବା ବ୍ୟକ୍ତିଙ୍କୁ ବୁଝାଇ ଏଥିରୁ ନିବୃତ୍ତ ରହିବାକୁ ପରାମର୍ଶ ଦେଇଛନ୍ତି। ପ୍ରତ୍ୟେକ ବ୍ୟକ୍ତି ଗଛଟିଏ ଲଗାଇ ତିନିବର୍ଷ ପର୍ଯ୍ୟନ୍ତ ଏହାର ଦାୟିତ୍ୱ ନେବାକୁ ସରପଞ୍ଚ ଆହ୍ବାନ କରିଛନ୍ତି। ନିଜ ପଞ୍ଚାୟତକୁ ମେଡିକାଲ ଟିମ୍ ଡାକି ଜଳବାହିତ ଓ ଡେଙ୍ଗୁ, ମ୍ୟାଲେରିଆଠାରୁ କିପରି ଦୂରେଇ ରହିହେବ ସେନେଇ ସଚେତନ କରୁଛନ୍ତି। ତବସୁମ୍ ସରପଞ୍ଚ ଦାୟିତ୍ୱ ନେବାର ୩ ମାସ ମଧ୍ୟରେ ପଞ୍ଚାୟତର ୨୫୦ ଲୋକଙ୍କୁ ଏମ୍ଜିଏନ୍ଆରଇଜିଏସ୍ ଜରିଆରେ କାର୍ଯ୍ୟ ଯୋଗାଇ ଦେଇଛନ୍ତି। ତାଙ୍କର ଏଭଳି କାର୍ଯ୍ୟକୁ ସ୍ଥାନୀୟ ଅଞ୍ଚଳରେ ପ୍ରଶଂସା କରାଯାଇଛି।