ନୂଆଦିଲ୍ଲୀ, ୨୯।୩(ପି.ଟି.)- କରୋନା ଭାଇରସକୁ ରୋକିବା ଲାଗି ଦେଶରେ ଆରମ୍ଭ ହୋଇଥିବା ଲଢ଼େଇ ପାଇଁ ଭାରତୀୟ କ୍ରିକେଟର ସୁରେଶ ରାଇନା ୫୨ ଲକ୍ଷ ଟଙ୍କା ଦାନ କରିଛନ୍ତି। ଏଭଳି ସ୍ବାସ୍ଥ୍ୟ ସଙ୍କଟ ସମୟରେ ଅନ୍ୟମାନେ ମଧ୍ୟ ସହାୟତାର ହାତ ବଢ଼ାଇବା ଉଚିତ ବୋଲି ସେ କହିଛନ୍ତି। ଭାରତୀୟ କ୍ରିକେଟରଙ୍କ ମଧ୍ୟରେ ରାଇନାଙ୍କ ଅବଦାନ ସର୍ବାଧିକ। “କରୋନାରୁ ମୁକ୍ତି ପାଇଁ ଆମେ ସମସ୍ତେ ସହଯୋଗ କରିବା ଆବଶ୍ୟକ। କରୋନା ବିପକ୍ଷରେ ଲଢ଼େଇ ପାଇଁ ମୁଁ ୫୨ ଲକ୍ଷ ଟଙ୍କା ଦାନ କରୁଛି। ଏଥିରୁ ୩୧ ଲକ୍ଷ ପ୍ରଧାନମନ୍ତ୍ରୀଙ୍କ ପାଣ୍ଠିକୁ ଏବଂ ୨୧ ଲକ୍ଷ ଟଙ୍କା ଉତ୍ତର ପ୍ରଦେଶ ମୁଖ୍ୟମନ୍ତ୍ରୀଙ୍କ ବିପର୍ଯ୍ୟୟ ରିଲିଫ ପାଣ୍ଠିକୁ ଯିବ। ଆପଣମାନେ ମଧ୍ୟ ନିଜ କର୍ତ୍ତବ୍ୟ ସମ୍ପାଦନ କରନ୍ତୁ” ବୋଲି ରାଇନା ଶନିବାର ଟୁଇଟ କରିଛନ୍ତି। ୩୩ ବର୍ଷୀୟ ବାମହାତୀ ବ୍ୟାଟ୍ସମ୍ୟାନ ରାଇନା ୨୦୦୫ରୁ ୨୦୧୮ ମଧ୍ୟରେ ଭାରତ ପାଇଁ ୧୮ ଟେଷ୍ଟ, ୨୨୬ ଦିନିକିଆ ଓ ୭୮ଟି ଟି୨୦ ଅନ୍ତର୍ଜାତୀୟ ମ୍ୟାଚ ଖେଳିଛନ୍ତି। ଇଣ୍ଡିଆନ ସୁପରଲିଗ୍ରେ ସେ ଚେନ୍ନାଇ ସୁପରକିଙ୍ଗ୍ସ ପକ୍ଷରୁ ପ୍ରତିନିଧିତ୍ୱ କରୁଛନ୍ତି। କ୍ରିକେଟ ଆଇକନ ସଚିନ ତେନ୍ଦୁଲକର ଶୁକ୍ରବାର ଏଥିପାଇଁ ୫୦ ଲକ୍ଷ ଟଙ୍କା ଦାନ କରିଥିଲେ। ଭାଇରସ ସଂକ୍ରମଣରେ ଭାରତରେ ୨୧ଜଣ ଏବଂ ବିଶ୍ୱରେ ୨୮,୦୦୦ରୁ ଊର୍ଦ୍ଧ୍ୱ ମୃତ୍ୟୁବରଣ କରିଛନ୍ତି।