ବଇଣ୍ଡା,୧୨।୧୦(ଡି.ଏନ.ଏ.) – ଅନୁଗୋଳ ଜିଲା ଆଠମଲ୍ଲିକ ବ୍ଲକ ଠାକୁରଗଡ଼ ଗ୍ରାମରେ ହେବାକୁ ଥିବା ଲକ୍ଷ୍ମୀପୂଜା ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ଚଳିତ ବର୍ଷ ବହୁ ଆଡ଼ମ୍ବରରେ ଏହା ପାଳନ କରାଯିବା ପାଇଁ ନିଷ୍ପତ୍ତି ହୋଇଛି। ୧୯୬୬ରେ ଲକ୍ଷ୍ମୀ ବଜାରଠାରେ ଏହି ପୂଜା ଆରମ୍ଭ ହୋଇଥିବାବେଳେ ଚଳିତ ବର୍ଷ ୫୩ ବର୍ଷରେ ପଦାର୍ପଣ କରିଛି। ପ୍ରଥମେ ଗ୍ରାମର ବାଉରୀ ବନ୍ଧୁ ସାହୁ ପୂଜାକୁ ୩ ଶହ ଟଙ୍କାରେ ଆରମ୍ଭ କରିଥିଲେ। ଦୀର୍ଘ ୧୨ ବର୍ଷ ଧରି ବାଉରୀ ପୂଜା କରୁଥିବାବେଳେ ୧୯୭୮ରେ ଗ୍ରାମବାସୀ ଓ ଲକ୍ଷ୍ମୀ ବଜାର ବ୍ୟବସାୟୀମାନଙ୍କୁ ପୂଜା ଦାୟିତ୍ୱ ଦେଇଥିଲେ। ପରେ ଲକ୍ଷ୍ମୀ ବଜାର ବ୍ୟବସାୟୀ ସଂଘ ପକ୍ଷରୁ ୫୧ ଟଙ୍କାରେ ପୂଜା ଆରମ୍ଭ କରାଯାଇ ଚଳିତ ବର୍ଷ ସାଢେ ୫ ଲକ୍ଷ ଟଙ୍କା ଅଟକଳ କରାଯାଇଛି। ପୂର୍ବରୁ ନିର୍ମାଣ ହୋଇଥିବା ପୂଜା ମଣ୍ଡପକୁ ଆକର୍ଷଣୀୟ ଭାବେ ସାଜସଜ୍ଜା କରାଯାଉଛି। କିଭଳି ଧୁମ୍ଧାମରେ ପୂଜା ପାଳନ କରାଯିବ ସେଥିପାଇଁ ମଧ୍ୟ କମିଟି ପକ୍ଷରୁ ବ୍ୟାପକ ଆୟୋଜନ କରାଯାଇଛି। ତାଳଚେର ଅଞ୍ଚଳର କାରିଗର ଶ୍ୟାମ ବେହେରା ମୂର୍ତ୍ତି ନିର୍ମାଣରେ ନିୟୋଜିତ ହୋଇଛନ୍ତି। କମିଟି ସଭାପତି ବିଶ୍ୱେଶ୍ୱର ରାଉତ, ଉପସଭାପତି ସନ୍ତୋଷ କୁମାର ବିଶ୍ୱାଳ, ସମ୍ପାଦକ ବିଜୟ ସାହୁ, ସହ ସମ୍ପାଦକ ଗଣେଶ୍ୱର ବାରିକ କହିଛନ୍ତି, ପୂଜା କିଭଳି ଧୁମଧାମରେ ନ ହେବ ସେଥିପାଇଁ ବଜାର କମିଟିର ସମସ୍ତ ସଦସ୍ୟ ଅକ୍ଳାନ୍ତ ପରିଶ୍ରମ କରୁଛନ୍ତି। ସପ୍ତାହେ ଧରି ଏହି ପୂଜା ହେବାକୁ ଥିବାବେଳେ ଦୈନିକ ବାଟୋଇଙ୍କୁ ଅନ୍ନପ୍ରସାଦ ବଣ୍ଟନ ବନ୍ଦୋବସ୍ତ କରାଯାଇଛି। ସେହିପରି ୭ଦିନ ଧରି ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ କରାଯିବା ପାଇଁ ନିଷ୍ପତ୍ତି ହୋଇଛି। ଚଳିତ ବର୍ଷ ସାଢେ ୫ ଲକ୍ଷ ଟଙ୍କା ଅଟକଳ କରାଯାଇଥିବାବେଳେ ସମସ୍ତ ବ୍ୟବସାୟୀଙ୍କ ଅର୍ଥଦାନରେ ପ୍ରତ୍ୟେକ ବର୍ଷ ପୂଜା ପାଳନ ହୋଇଆସୁଛି। କିଭଳି ଗାଁ ଦାଣ୍ଡ ପୂଜା ପାଇଁ ଉତ୍ସବ ମୁଖର ହେବ ସେଥିପାଇଁ ଅଧିକ ଗୁରୁତ୍ୱ ଦିଆଯାଉଛି।