କୋଲକାତା, ୨୯।୭(ପି.ଟି.)- ସେପ୍ଟେମ୍ବର ୧୪ ଓ ୧୫ରେ ପାକିସ୍ତାନର ଇସ୍ଲାମାବାଦ୍ଠାରେ ଏସିଆ/ଓସେନିଆ ଡେଭିସ୍ କପ୍ ମ୍ୟାଚ୍ (ଗ୍ରୁପ୍-୧) ଅନୁଷ୍ଠିତ ହେବ। ଏଥିଲାଗି ଗୋଟିଏ ମାସ ପୂର୍ବରୁ ଅର୍ଥାତ୍ ଅଗଷ୍ଟ ୫ରେ ଭାରତୀୟ ଦଳ ଘୋଷଣା କରାଯିବ ବୋଲି ସର୍ବଭାରତୀୟ ଟେନିସ୍ ଆସୋସିଏଶନ (ଏଆଇଟିଏ)ର ସାଧାରଣ ସମ୍ପାଦକ ହିରନ୍ମୟୀ ଚାଟାର୍ଜୀ ରବିବାର ସ୍ପଷ୍ଟ କରିଛନ୍ତି। ୧୯୬୪ ପରଠାରୁ କୌଣସି ଭାରତୀୟ ଡେଭିସ୍ କପ୍ ଦଳ ପାକିସ୍ତାନ ଗସ୍ତ କରିନାହିଁ। ୫୫ ବର୍ଷ ତଳେ ଲାହୋରରେ ହୋଇଥିବା ଡେଭିସ୍ କପ୍ ମୁକାବିଲାରେ ଭାରତ ୪-୦ରେ ବିଜୟ ଲାଭ କରିଥିଲା। ‘ଅଗଷ୍ଟ ୫ରେ ଆମେ ଦଳ ଘୋଷଣା କରିବୁ। ର଼୍ୟାଙ୍କିଙ୍ଗ୍ ଅନୁଯାୟୀ ଖେଳାଳି ଚୟନ କରାଯିବ। ଭିଜା ପାଇଁ ଆମେ ଖୁବ୍ଶୀଘ୍ର ଆମର ପ୍ରକ୍ରିୟା ଆରମ୍ଭ କରିବୁ’ ବୋଲି ଚାଟାର୍ଜୀ କହିଛନ୍ତି। ୟୁକି ଭାମ୍ବ୍ରୀ ଓ ସୁମିତ୍ ନାଗଲ ଆହତ ଥିବାରୁ ଭାରତର ଏକ ନମ୍ବର ଖେଳାଳି ପ୍ରଜନେଶ ଗୁଣେଶ୍ୱରନ ଓ ରାମକୁମାର ରାମନାଥନ ଯଥାକ୍ରମେ ପ୍ରଥମ ଓ ୨ୟ ପସନ୍ଦର ଖେଳାଳି ରହିଛନ୍ତି। ସେହିଭଳି ରୋହନ ବୋପାନ୍ନା ଓ ଡିଭିଜ ଶରନ ଡବଲ୍ସରେ ଭାଗନେବେ ବୋଲି ଚାଟାର୍ଜୀ ଏହି ଅବସରରେ ପ୍ରକାଶ କରିଛନ୍ତି।