ଅନୁଗୋଳ ଅଫିସ, ୧୬ା୧୦- ରାଜ୍ୟ ସରକାରଙ୍କ ‘ମୋ ସରକାର’ କାର୍ଯ୍ୟକ୍ରମର ତଦାରଖ ପାଇଁ ୫-ଟି ସଚିବ ଭି. କାର୍ତ୍ତିକେୟନ ପାଣ୍ଡିଆନଙ୍କଠାରୁ ଆରମ୍ଭ କରି ଅନ୍ୟ ବରିଷ୍ଠ ଅଧିକାରୀମାନେ ସରକାରୀ କାର୍ଯ୍ୟାଳୟ, ଥାନା, ମେଡିକାଲ ପରିଦର୍ଶନରେ ଯାଉଛନ୍ତି। କର୍ତ୍ତବ୍ୟରେ ଅବହେଳା ଥିଲେ ତ୍ୱରିତ କାର୍ଯ୍ୟାନୁଷ୍ଠାନ ନିଆଯାଉଥିବାରୁ ଏବେ ଏହାକୁ ନେଇ ସବୁଠି ଛନକା ପଶିଯାଇଛି। ଏଥିରୁ ବାଦ୍ ପଡ଼ିନି ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ। ମଙ୍ଗଳବାର ଅନୁଗୋଳ ମେଡିକାଲ ପରିଦର୍ଶନରେ ୫-ଟି ସଚିବ ଆସିବେ ବୋଲି ଚର୍ଚ୍ଚା ହେବା ପରେ ଚଳଚଞ୍ଚଳ ହୋଇପଡ଼ିଥିଲେ କର୍ତ୍ତୃପକ୍ଷ ଓ କର୍ମଚାରୀ। ମେଡିକାଲର ସୌନ୍ଦର୍ଯ୍ୟ ବୃଦ୍ଧି ପାଇଁ ସମସ୍ତ ୱାର୍ଡ ଓ ଆଉଟଡୋର ସମ୍ମୁଖରେ ଫୁଲକୁଣ୍ଡମାନ ରଖାଯାଇଥିବା ବେଳେ ଘଣ୍ଟାକୁ ଘଣ୍ଟା ସଫେଇ ଓ ବ୍ଲିଚିଙ୍ଗ ପକାଯାଉଥିବା ଦୃଶ୍ୟ ଦେଖିବାକୁ ମିଳିଥିଲା। ଏପରି କି ମେଡିକାଲ ପରିସରରେ ପାର୍କିଂ ବ୍ୟବସ୍ଥାରେ ମଧ୍ୟ ସୁଧାର ଅଣାଯାଇଥିଲା। ଧାଡ଼ିରେ ଲୋକଙ୍କୁ ଛିଡ଼ା କରାଇ ବହିର୍ବିଭାଗକୁ ଗୋଟିଏ ପରେ ଗୋଟିଏ ରୋଗୀଙ୍କୁ ଛଡ଼ାଯାଉଥିଲା। ଏଥିସହ ଗୁରୁତର ରୋଗୀଙ୍କୁ ପ୍ରାଥମିକତା ଦେଇ ଚିକିତ୍ସା କରାଯାଉଥିଲା। ମେଡିକାଲର ଟିକେଟ୍ କାଉଣ୍ଟର ପାଖରୁ ଆରମ୍ଭ କରି ନିରାମୟ ଔଷଧ ବିତରଣ କେନ୍ଦ୍ର ପର୍ଯ୍ୟନ୍ତ ସବୁଆଡ଼େ ନମ୍ର ବ୍ୟବହାର ଦେଖିବାକୁ ମିଳିଥିଲା। କିନ୍ତୁ ଅପରାହ୍ନରେ ଅନୁଗୋଳ ଏସ୍ପି ଜଗମୋହନ ମୀନା ମେଡିକାଲରେ ପହଞ୍ଚତ୍ବା ପରେ କର୍ତ୍ତୃପକ୍ଷ ଆଶ୍ୱସ୍ତ ହେବା ସହ ନିଜ ନିଜ ସ୍ଥାନରେ କାର୍ଯ୍ୟ କରିବାକୁ ଚାଲିଯାଇଥିଲେ।
ଏସ୍ପି ମୀନା ଜିଲା ମୁଖ୍ୟ ଚିକିତ୍ସାଧିକାରୀଙ୍କ କାର୍ଯ୍ୟାଳୟରେ ଆଲୋଚନା କରିବା ପରେ ମେଡିକାଲ ଫାଣ୍ଡି ବୁଲି ଦେଖିଥିଲେ। ଫାଣ୍ଡିର ଉନ୍ନୟନ ପାଇଁ ଏସ୍ଡିପିଓ ଅଶ୍ୱନୀ ସାହୁ ଓ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇଙ୍କ ସହ ଏସ୍ପି ଆଲୋଚନା କରିଥିଲେ। ଏପରି କି ଜିଲା ମୁଖ୍ୟ ଚିକିତ୍ସାଧିକାରୀ ଅମରେନ୍ଦ୍ରନାଥ ମହାନ୍ତିଙ୍କ ସହ ମଧ୍ୟ କଥା ହୋଇଥିଲେ। ଫାଣ୍ଡିରେ ୨୪ ଘଣ୍ଟିଆ ଡ୍ୟୁଟି କରିବାକୁ ଏସ୍ପି ନିର୍ଦ୍ଦେଶ ଦେବା ସହ ଉନ୍ନତି ପାଇଁ କେତେ ଟଙ୍କା ଖର୍ଚ୍ଚ ହେବ ତାହାର ହିସାବ ମାଗିଥିଲେ। ଫାଣ୍ଡିରେ ଶୌଚାଳୟ, ପୋଲିସ କର୍ମଚାରୀଙ୍କ ବିଶ୍ରାମ ଗୃହ ନିର୍ମାଣ କରାଯିବ। ଫାଣ୍ଡି ସମ୍ମୁଖରେ ବଡ଼ ଅକ୍ଷରେ ଏକ ବୋର୍ଡ ଲଗାଇବାକୁ ମଧ୍ୟ ଏସ୍ପି ନିର୍ଦ୍ଦେଶ ଦେଇଥିଲେ।