ବ୍ରହ୍ମପୁର ଅଫିସ,୧୬ା୫-ଚଳିତ ମାସ ପ୍ରଥମ ସପ୍ତାହରେ ଘଟିଥିବା ସାମୁଦ୍ରିକ ବାତ୍ୟା ଫନୀ ପୁରୀ ଜିଲାକୁ ବିଶେଷ ପ୍ରଭାବିତ କରିଛି । ଫଳରେ ବ୍ୟାଙ୍କ ସେବା ବିପର୍ଯ୍ୟସ୍ତ ହୋଇଯାଇଛି । ତେଣୁ ମୋବାଇଲ ଏଟିଏମ୍ ଦ୍ୱାରା ଗ୍ରାହକଙ୍କୁ ସେବା ଯୋଗାଇବା ବ୍ୟବସ୍ଥା କରିଛି ବ୍ରହ୍ମପୁର ସମବାୟ କେନ୍ଦ୍ର (ବିସିସି) ବ୍ୟାଙ୍କ । ଗତ ୧୦ରୁ ଆରମ୍ଭ ହୋଇଥିବା ଏହି ସେବା ୧୪ ତାରିଖ ସୁଦ୍ଧା ୫ ଦିନରେ ପୁରୀ ସହର ସମେତ ସେହି ଜିଲାର ବିଭିନ୍ନ ସ୍ଥାନରେ ୧୫୨୩ ଗ୍ରାହକଙ୍କୁ ୬୭.୧୭ ଲକ୍ଷ ଟଙ୍କା ଦିଆଯାଇଛି । ବ୍ୟାଙ୍କ ମୁଖ୍ୟ ପ୍ରଶାସନିକ ଅଧିକାରୀ ତଥା ପରିଚାଳନା ବୋର୍ଡ ସମ୍ପାଦକ ଚିତ୍ତରଞ୍ଜନ ପାଣିଗ୍ରାହୀ ବୁଧବାର ଏହି ସୂଚନା ଦେଇଛନ୍ତି । ଆବଶ୍ୟକ ସ୍ଥଳେ ଅଧିକ ଟଙ୍କା ଯୋଗାଇ ଦିଆଯିବାର ସେ ଦର୍ଶାଇଛନ୍ତି । ସୂଚନାଯୋଗ୍ୟ, ବିସିସି ବ୍ୟାଙ୍କ ଅଧୀନରେ ଗଜପତି ଜିଲାର ଅନେକ ଦୁର୍ଗମ ମାଳ ଅଞ୍ଚଳ ରହିଛି । ଆଦିବାସୀ ବହୁଳ ଗଁା ଗଣ୍ଡା ଓ ହାଟଗୁଡିକରେ ଗ୍ରାହକମାନେ ସୁବିଧାରେ ଟଙ୍କା ଉଠାଣ ଏଭଳିକି ବିିଭିନ୍ନ ଋଣ ବାବଦ ଅର୍ଥ ମଧ୍ୟ ମୋବାଇଲ ଏଟିଏମରୁ ଉଠାଇବାର ବ୍ୟବସ୍ଥା ହୋଇଛି। ଗତ ୩ ବର୍ଷ ତଳୁ ମୋବାଇଲ ଏଟିଏମ ଭ୍ୟାନ ପ୍ରଚଳିତ ହୋଇ ଆର.ଉଦୟଗିରି ବ୍ୟାଙ୍କ ଶାଖା ଅଧୀନରେ ରଖାଯାଇଛି। ଓଡ଼ିଶା ରାଜ୍ୟ ସମବାୟ ବ୍ୟାଙ୍କ (ଓଏସସିବି) ନିର୍ଦ୍ଦେଶରେ ବିସିସି ବ୍ୟାଙ୍କ ବାତ୍ୟା ଦ୍ୱାରା ପ୍ରଭାବିତ ପୁରୀକୁ ମୋବାଇଲ ଭ୍ୟାନ ପଠାଉଛି । ଏଟିଏମରୁ ଟଙ୍କା ସରିବା ମାତ୍ରେ ଅନଲାଇନ ଦ୍ୱାରା ପୁଣି ଭର୍ତ୍ତି କରାଯାଉଥିବା ବ୍ୟାଙ୍କ ପକ୍ଷରୁ କୁହାଯାଇଛି ।