ବାସୁଦେବପୁର,୬।୧(ଡି.ଏନ.ଏ.)- ଭଦ୍ରକ ଜିଲା ବାସୁଦେବପୁର ପୌରପାଳିକାର ବଳିବିନ୍ଧା ଗ୍ରାମଠାରୁ ଗମେଈ ନଦୀକୁ ସଂଯୋଗ କରୁଥିବା ମୋହନ ସାମଲ ନାଳ ଜଳ ନିଷ୍କାସନର ଏକ ପ୍ରମୁଖ ନାଳ। ଏହି ନାଳ ବଳିବିନ୍ଧା ବାଷଠି, ଚୂଡ଼ାମଣି, ଭୈରବପୁର ଆଦି ସଂଲଗ୍ନ ଗ୍ରାମର ଚାଷୀଙ୍କ ଚାଷଜମିକୁ ଦୁଇଭାଗ କରିଛି। ଏପାଖର ଚାଷୀ ଆରପାଖକୁ ଯିବା ପାଇଁ ଦୀର୍ଘବର୍ଷ ଧରି ହନ୍ତସନ୍ତ ହେଉଛନ୍ତି। ବିଶେଷକରି ଚାଷ ଆରମ୍ଭ ସମୟରେ ଚାଷୀମାନେ ପୋଲ ନ ଥିବାରୁ ନାଳରେ ପଶି ଅପର ପାଖକୁ ଯାଇ ଚାଷ କାର୍ଯ୍ୟ କରିଥାନ୍ତି। ସେହିପରି ଧାନ ଅମଳ ସମୟରେ ମଧ୍ୟ ଚାଷୀମାନେ ପାଚିଲା ଶସ୍ୟକୁ ବହୁ ବିପଜ୍ଜନକ ଭାବେ ଆରପାଖକୁ ନେଇଥାନ୍ତି। ଚାଷୀମାନଙ୍କ ଦୀର୍ଘଦିନର ଦାବି ପରେ ୫ ବର୍ଷ ତଳେ ଡ୍ରେନେଜ ବିଭାଗ ଏହି ନାଳ ଉପରେ ଏକ ପୋଲ ନିର୍ମାଣ ଆରମ୍ଭ କରିଥିଲା। ଏହାମଧ୍ୟରେ ୫ ବର୍ଷ ବିତିଯାଇଥିଲେ ମଧ୍ୟ ପୋଲ ସମ୍ପୂର୍ଣ୍ଣ ହୋଇପାରି ନାହିଁ। ଅଧାପନ୍ତରିଆ ହୋଇ ରହିଥିବା ଯୋଗୁ ପୋଲ ଚାଷୀଙ୍କ କାମରେ ଆସୁନି ବୋଲି ଅଭିଯୋଗ ହେଉଛି।
ଏହି ଅସମ୍ପୂର୍ଣ୍ଣ ପୋଲ ପ୍ରାୟ ଆଖପାଖ ୫ ଖଣ୍ଡ ଗ୍ରାମର ୧ ହଜାର ଚାଷୀଙ୍କ ଦୁର୍ଦ୍ଦଶା ପାଲଟିଛି ବୋଲି କୁହାଯାଉଛି। ସେହିପରି ନାଳକୁ ପରିଷ୍କାର କରାଯାଉ ନ ଥିବା ସହିତ ପୁନଃ ଖନନ କରାଯାଉ ନ ଥିବାରୁ ବଳକା ପାଣି ଠିକ୍ ଭାବେ ମଧ୍ୟ ନିଷ୍କାସନ ହୋଇପାରୁ ନାହିଁ ବୋଲି ଅଭିଯୋଗ ହେଉଛି। ବଳିବିନ୍ଧା ଗ୍ରାମର ଚାଷୀ ଗଙ୍ଗାଧର ବାରିକ ପୋଲ ନିର୍ମାଣ କାର୍ଯ୍ୟ ଆରମ୍ଭ ହୋଇ ୫ ବର୍ଷ ହେବ ଅଧାପନ୍ତରିଆ ରହିଥିବାରୁ ଚାଷୀମାନେ ସମସ୍ୟାରେ ପଡୁଛନ୍ତି ବୋଲି କହିଛନ୍ତି। ଏହି ପୋଲ କାର୍ଯ୍ୟ ତୁରନ୍ତ ଶେଷ କରାଗଲେ ୧ ହଜାରରୁ ଊର୍ଦ୍ଧ୍ୱ ଚାଷୀ ଉପକୃତ ହେବେ ବୋଲି ଚାଷୀ ଗଣେଶ ଚନ୍ଦ୍ର ସାହୁ କହିଛନ୍ତି। ଯୁବ ଚାଷୀ ନାରାୟଣ ବେହେରା କହିଛନ୍ତି ଯେ, ପୋଲ ଅଧାପନ୍ତରିଆ ହୋଇପଡ଼ିଥିବାରୁ ଏହା ଚାଷୀଙ୍କ ଦୁର୍ଦ୍ଦଶା ବଢ଼ାଉଛି। ଡ୍ରେନେଜ ବିଭାଗ ତୁରନ୍ତ ଏ ଦିଗରେ ଦୃଷ୍ଟି ଦେବାକୁ ସେ ଦାବି କରିଛନ୍ତି। ଏ ସମ୍ପର୍କରେ ଡ୍ରେନେଜ ବିଭାଗ ଯନ୍ତ୍ରୀ ଶ୍ରୀପତି କରଣଙ୍କୁ ପଚାରିବାରୁ କେଉଁ ପରିସ୍ଥିତିରେ ଏହି ପୋଲ ଅସମ୍ପୂର୍ଣ୍ଣ ରହିଲା ତାହାର ତଦନ୍ତ ଓ ତନଖି କରାଯିବ ବୋଲି କହିଛନ୍ତି।