![](https://www.dharitri.com/wp-content/uploads/2019/11/rastrayat-udyog.jpg)
ନୂଆଦିଲ୍ଲୀ,୨୧-୧୧: ଭାରତ ପେଟ୍ରୋଲିୟମ କର୍ପୋରେଶନ ଲିମିଟେଡ(ବିପିସିଏଲ୍) ସମେତ ୫ ରାଷ୍ଟ୍ରାୟତ୍ତ ଉଦ୍ୟୋଗର ଅଂଶଧନ ବିକ୍ରିକୁ କେନ୍ଦ୍ର କ୍ୟାବିନେଟ ମଞ୍ଜୁରୀ ପ୍ରଦାନ କରିଛି। ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ କମିଟି (ସିସିଇଏ) ଏହି ପ୍ରସ୍ତାବକୁ ମଞ୍ଜୁରୀ ଦେଇଥିବା ଅର୍ଥ ମନ୍ତ୍ରୀ ନିର୍ମଳା ସୀତାରାମନ ବୁଧବାର ସୂଚନା ଦେଇଛନ୍ତି। ଅନ୍ୟ କମ୍ପାନୀଗୁଡିକ ମଧ୍ୟରେ ଶିପିଂ କର୍ପୋରେଶନ ଅଫ ଇଣ୍ଡିଆ, କଣ୍ଟେନର କର୍ପୋରେଶନ ଅଫ ଇଣ୍ଡିଆ, ଟିଏଚ୍ଡିସିଆଇଏଲ୍ ଏବଂ ନେପ୍କୋ ରହିଛି। ବିପିସିଏଲ୍ର ନୁମାଲିଗଡ ରିଫାଇନେରୀକୁ ଏହି ପ୍ରକ୍ରିୟାରେ ସାମିଲ କରାଯାଇ ନାହିଁ। ଏହି କମ୍ପାନୀରେ ବିପିସିଏଲ୍ର ୬୧% ଅଂଶଧନ ରହିଛି। ଆସାମରେ ଥିବା ଏହି ରିଫାଇନେରୀର ଅଂଶଧନ ଅନ୍ୟ ରାଷ୍ଟ୍ରାୟତ୍ତ କମ୍ପାନୀକୁ ସ୍ଥାନାନ୍ତର ହେବ। ଅଂଶଧନ ବିକ୍ରି ପ୍ରକ୍ରିୟା ମୁତାବକ କମ୍ପାନୀର ପରିଚାଳନା ନିୟନ୍ତ୍ରଣ ଷ୍ଟ୍ରାଟେଜିକ ବାୟରଙ୍କ ହାତକୁ ଯିବ ବୋଲି ଜଣାପଡିଛି।
ଟେଲିକମ୍ କମ୍ପାନୀଙ୍କୁ ଆଶ୍ୱସ୍ତି
ସ୍ପେକ୍ଟ୍ରମ ଦେୟ ପ୍ରଦାନ କ୍ଷେତ୍ରରେ ଟେଲିକମ୍ କମ୍ପାନୀଙ୍କୁ ଆଶ୍ୱସ୍ତି ମିଳିଛି। ବୁଧବାର ବସିଥିବା କେନ୍ଦ୍ର କ୍ୟାବିନେଟ ବୈଠକରେ କ୍ଷତିରେ ଚାଲିଥିବା ଟେଲିକମ୍ କ୍ଷେତ୍ରକୁ ଧ୍ୟାନରେ ରଖି ସରକାର ନିଷ୍ପତ୍ତି ନେଇଛନ୍ତି। ଆଗାମୀ ୨ ଆର୍ଥତ୍କ ବର୍ଷ ଲାଗି ସ୍ପେକ୍ଟ୍ରମ ଦେୟ ପ୍ରଦାନ କ୍ଷେତ୍ରରେ ୨ ବର୍ଷର ମୋରାଟୋରିୟମ ସମୟ ସରକାର ପ୍ରଦାନ କରିଛନ୍ତି। ସଚିବ କମିଟିର ପରାମର୍ଶ କ୍ରମରେ ଏଭଳି ନିଷ୍ପତ୍ତି ହୋଇଥିବା ଅର୍ଥମନ୍ତ୍ରୀ ନିର୍ମଳା ସୀତାରାମନ କହିଛନ୍ତି।