୫ ଲକ୍ଷ କୋଟି ଡଲାର ଅର୍ଥନୀତି ପାଇଁ ବୁଝିବିଚାରି ରଣନୀତି ଆପଣାଇବାକୁ ହେବ: ମନମୋହନ

ଜୟପୁର,୮-୯: ମୋଦି ସରକାର ୨୦୨୪-୨୫ ସୁଦ୍ଧା ଦେଶକୁ ୫ ଲକ୍ଷ କୋଟି ଡଲାର ଅର୍ଥନୀତିରେ ପରିଣତ କରିବା ଲାଗି ଲକ୍ଷ୍ୟ ଧାର୍ଯ୍ୟ କରିଛନ୍ତି। ଏହା ଉପରେ ପ୍ରତିକ୍ରିୟା ପ୍ରକାଶ କରି ପୂର୍ବତନ ପ୍ରଧାନମନ୍ତ୍ରୀ ତଥା ବିଶିଷ୍ଟ ଅର୍ଥନୀତିଜ୍ଞ ଡ.ମନମୋହନ ସିଂହ ଶନିବାର କହିଛନ୍ତି ଯେ, ଉକ୍ତ ଲକ୍ଷ୍ୟ ହାସଲ କରିବାକୁ ହେଲେ ଦେଶକୁ ବୁଝିବିଚାରି ରଣନୀତି ଆପଣାଇବାକୁ ହେବ। ଉଦାରୀକରଣ ନୀତି ଉପରେ ପର୍ଯ୍ୟବସିତ ଆର୍ଥିକ ସଂସ୍କାର କାର୍ଯ୍ୟକୁ ଜାରି ରଖିବାକୁ ହେବ ବୋଲି ସେ କହିଛନ୍ତି।
ଏଠାରେ ଏକ ଘରୋଇ ବିଶ୍ୱବିଦ୍ୟାଳୟର କାର୍ଯ୍ୟକ୍ରମରେ ଯୋଗ ଦେଇ ମନମୋହନ କହିଛନ୍ତି ଯେ, ଦାରିଦ୍ର୍ୟ, ସାମାଜିକ ଅସମାନତା, ସାମ୍ପ୍ରଦାୟିକତାବାଦ ଏବଂ ଧାର୍ମିକ କଠୋରପନ୍ଥୀ ମନୋଭାବ ଏବଂ ଦୁର୍ନୀତି ଏବେ ଗଣତନ୍ତ୍ର ପ୍ରତି ଆହ୍ବାନ ହୋଇଛି। ବର୍ତ୍ତମାନ ଦେଶର ଅର୍ଥନୀତି ଧିମା ହୋଇଥିବାର ମନେ ହେଉଛି। ଚାଷୀକୂଳ ସଙ୍କଟରେ ରହିଛନ୍ତି। ବ୍ୟାଙ୍କିଙ୍ଗ୍‌ କ୍ଷେତ୍ର ସଙ୍କଟର ସାମ୍ନା କରୁଥିବା ବେଳେ ବେକାରି ବଢ଼ିବାରେ ଲାଗିଛି ଏବଂ ନିବେଶ ସ୍ଥିର ହୋଇଗଲାଣି। କେନ୍ଦ୍ର ସରକାର ଆତଙ୍କବାଦକୁ ରୋକିବା ସହ ଭିନ୍ନ ମତ ରଖୁଥିବା ସ୍ବରକୁ ସମ୍ମାନ କରିବାକୁ ହେବ ବୋଲି ସେ ପରାମର୍ଶ ଦେଇଛନ୍ତି। ଏଥିସହ ସରକାରଙ୍କୁ ପ୍ରତି ସ୍ତରରେ ସନ୍ତୁଳନ ବଜାୟ ରଖିବାକୁ ହେବ ବୋଲି ଉଲ୍ଲେଖ କରି ମନମୋହନ କହିଛନ୍ତି ଯେ, ଉଦାରୀକରଣ ନୀତି ଆଧାରରେ ଦଣ୍ଡାୟମାନ ଆର୍ଥିକ ସଂସ୍କାରକୁ ବଜାୟ ରଖିବା ବର୍ତ୍ତମାନ ସମୟର ଆବଶ୍ୟକତା ରହିଛି। ରାଜସ୍ଥାନ ରାଜ୍ୟସଭା ସାଂସଦ ଡ.ସିଂହ କହିଛନ୍ତି ଯେ, ଆଗାମୀ ଦିନରେ ଗଣତନ୍ତ୍ରକୁ ଶକ୍ତିଶାଳୀ କରିବା ଲାଗି ଦେଶକୁ ଜ୍ଞାନୀ, ସିଦ୍ଧାନ୍ତବାଦୀ ଓ ଦୂରଦର୍ଶୀ ନେତାଙ୍କର ଆବଶ୍ୟକତା ଦେଖାଦେଇଛି।