ଭୁବନେଶ୍ୱର,୧୧।୬ (ବ୍ୟୁରୋ): କୋରାପୁଟସ୍ଥିତ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର ଟର୍ମିନାଲ୍ ସେମିଷ୍ଟର ପରୀକ୍ଷା ଜୁଲାଇ ୬ରୁ ଆରମ୍ଭ ହୋଇ ୨୭ ପର୍ଯ୍ୟନ୍ତ ଚାଲିବ। ଛାତ୍ରୀଛାତ୍ରମାନେ ଘରେ ରହି ଅନ୍ଲାଇନ୍ରେ ଏହି ପରୀକ୍ଷା ଦେବେ ଅର୍ଥାତ୍ ହୋମ୍ ବେସ୍ଡ ଓପନ୍ ବୁକ୍ ଏକ୍ଜାମ (ହୋବ୍) ପଦ୍ଧତିରେ ପରୀକ୍ଷା ହେବ। ପରୀକ୍ଷା ଆରମ୍ଭ ହେବାର ଏକ ଘଣ୍ଟା ପୂର୍ବରୁ ଛାତ୍ରଛାତ୍ରଙ୍କୁ ଗୁଗଲ୍ ଫର୍ମ, ହ୍ବାଟ୍ସ୍ ଆପ୍, ଇ-ମେଲ୍ କିମ୍ବା ଫୋନ୍ କଲ୍ ମାଧ୍ୟମରେ ପ୍ରଶ୍ନପତ୍ର ପଠାଯିବ। ପରୀକ୍ଷାର ଅବଧି ତିନି ଘଣ୍ଟା ରହିବ କିମ୍ବା ଆବଶ୍ୟକସ୍ଥଳେ ପରିବର୍ତ୍ତିତ ସମୟ ପ୍ରଶ୍ନପତ୍ରରେ ଉଲ୍ଲେଖ କରାଯିବ। ପ୍ରଶ୍ନପତ୍ର ପାଇବା ପରେ ଛାତ୍ରୀଛାତ୍ରଙ୍କୁ ସାଦା କାଗଜରେ ଉତ୍ତର ଲେଖିବାକୁ ପଡ଼ିବ। ଉତ୍ତର ଲେଖିବା ପୂର୍ବରୁ ପରୀକ୍ଷାର୍ଥୀମାନେ ନାମ, ନାମଲେଖା ସଂଖ୍ୟା, ବିଷୟ, ପାଠ୍ୟକ୍ରମର ନାମ ଏବଂ ପାଠ୍ୟକ୍ରମ କୋଡ୍ ଉଲ୍ଲେଖ କରିବା ଆବଶ୍ୟକ। ପ୍ରତ୍ୟେକ ଅତିରିକ୍ତ ପୃଷ୍ଠାର ଶୀର୍ଷରେ ପରିକ୍ଷାର୍ଥୀମାନେ ନିଜର ନାମଲେଖା ନମ୍ବର ଉଲ୍ଲେଖ କରିବେ। ପରୀକ୍ଷା ସମୟ ଶେଷ ହେବା ପରେ ଛାତ୍ରୀଛାତ୍ରଙ୍କୁ ସମସ୍ତ ଉତ୍ତର ପୃଷ୍ଠାର ଫଟୋଗ୍ରାଫ୍ ନେବାକୁ ପଡ଼ିବ କିମ୍ବା ପିଡିଏଫ୍ ଫାଇଲ୍ ଭାବରେ ସ୍କାନ୍ କରିବାକୁ ପଡ଼ିବ। ଏକଘଣ୍ଟା ମଧ୍ୟରେ ତାହାକୁ ଗୁଗଲ୍ ଫର୍ମ ବା ହ୍ବାଟ୍ସ୍ ଆପ୍ (୮୭୬୩୯୪୯୮୪୬) ବା ଇମେଲ୍ (coe@cuo.ac.in)ରେ ଅପଲୋଡ୍ କରି ପରୀକ୍ଷା ନିୟନ୍ତ୍ରକଙ୍କ ପାଖକୁ ପଠାଇବେ। ଯଦି କୌଣସି ଛାତ୍ରୀଛାତ୍ର ବୈଷୟିକ କିମ୍ବା ଅନ୍ୟାନ୍ୟ କାରଣରୁ ଉତ୍ତରଖାତା ପଠାଇବାକୁ ଅସମର୍ଥ ହେବେ, ତେବେ ସେମାନେ ବିଶ୍ୱବିଦ୍ୟାଳୟ ଠିକଣାରେ ସ୍ପିଡ୍ ପୋଷ୍ଟ ଦ୍ୱାରା ପଠାଇପାରିବେ। ଅଧିକ ସୂଚନା ପାଇଁ ଛାତ୍ରୀଛାତ୍ରମାନେ ବିଶ୍ୱବିଦ୍ୟାଳୟ ଓ୍ବେବ୍ସାଇଟ୍ www.cuo.ac.in ସହିତ ଯୋଗାଯୋଗ କରିପାରିବେ।
ସୂଚନାଯୋଗ୍ୟ, ପୂର୍ବରୁ ଅଫ୍ଲାଇନ୍ ମୋଡ୍ରେ ପରୀକ୍ଷା କରିବାକୁ ନିଷ୍ପତ୍ତି ନେଇଥିଲା। କିନ୍ତୁ କରୋନା ପାଇଁ ହୋବ୍ ପଦ୍ଧତିରେ କରିବାକୁ ନିଷ୍ପତ୍ତି ହୋଇଛି।