ନିମାପଡ଼ା,୧୯।୧(ଡି.ଏନ୍.ଏ.): କୁଶଭଦ୍ରା ନଦୀରେ ବନ୍ୟାଜଳ ସୁଚାରୁରୂପେ ନିଷ୍କାସନ ହେବା ନିମନ୍ତେ ୬୦ଲକ୍ଷ ଟଙ୍କା ବ୍ୟୟ ଅଟକଳରେ କୁଶଭଦ୍ରା ନଦୀ ଗର୍ତ୍ତ ଖୁବଶୀଘ୍ର ଖନନ କରାଯିବ ବୋଲି ସୋମବାର ନିମାପଡ଼ାରେ ଆୟୋଜିତ ଧନୁଅଁା ବନ୍ୟା ନିୟନ୍ତ୍ରିତ କମିଟିର ଏକ ଉଚ୍ଚସ୍ତରୀୟ ବୈଠକରେ ଯୋଗଦେଇ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ମତବ୍ୟକ୍ତ କରିଛନ୍ତି। କୁଆଖାଇ ବ୍ରିଜଠାରୁ କୁଶଭଦ୍ରା ନଦୀର ୮ଶହ ମିଟର ଖନନ କରାଯିବ। ବନ୍ୟାଜଳ ରୋକିବା ପାଇଁ ସ୍ଥାୟୀ ପ୍ରତିକାର, ବନ୍ୟା ନିୟନ୍ତ୍ରଣ ପାଇଁ ଏକ ଉଚ୍ଚସ୍ତରୀୟ ବିଶେଷଜ୍ଞ କମିଟି ଗଠନ କରାଯାଇ ଏହି କମିଟି ଦ୍ୱାରା ସର୍ବେକ୍ଷଣ କାର୍ଯ୍ୟ କରାଯିବାକୁ ଧନୁଅଁା ବନ୍ୟା ନିୟନ୍ତ୍ରଣ କମିଟି ପକ୍ଷରୁ ରାଜ୍ୟ ସରକାରଙ୍କ ନିକଟରେ ଦାବି କରାଯିବାକୁ ନିଷ୍ପତ୍ତି ନିଆଯାଇଛି। ସେହିପରି ତିନିମୁହାଣଠାରେ ଅଧିକ ୫ଟି ସ୍ପାନ ନିର୍ମାଣ, ବନ୍ୟାଦାଉରୁ ରକ୍ଷା ପାଇଁ ଅଚ୍ୟୁତପୁର କାଜୁକୁ ବନ୍ଦ କରିବା ଦିଗରେ ସରକାର କୌଣସି ପଦକ୍ଷେପ ନେବାକୁ ନେଇ ବୈଠକରେ ଆଲୋଚନା ହୋଇଥିଲା। ଏଥିରେ ଜଳସମ୍ପଦ ବିଭାଗର ନିର୍ବାହୀ ଯନ୍ତ୍ରୀ ଶଶିଭୂଷଣ ମିଶ୍ର, ଗୋପ ସବଡିଭିଜନ ସହକାରୀ ନିର୍ବାହୀ ଯନ୍ତ୍ରୀ ସଂଗ୍ରାମ କେଶରୀ ମହାନ୍ତି, ଧନୁଅଁା ନିୟନ୍ତ୍ରଣ କମିଟି ସଭାପତି ନୃସିଂହ ଚରଣ ଜେନା, ସମ୍ପାଦକ ନରେନ୍ଦ୍ର ଦାସ, କୋଷାଧ୍ୟକ୍ଷ ସତ୍ୟପ୍ରିୟ ନାୟକ, ଚକ୍ରଧର ନାୟକ, ପୀତବାସ ଦଳେଇ ପ୍ରମୁଖ ଯୋଗଦେଇଥିଲେ।