କଟକ ଅଫିସ,୨୯ା୪: କରୋନା ଭୂତାଣୁ ବିପକ୍ଷରେ ସାରା ବିଶ୍ୱ ଲଢେଇ କରୁଛି। ଜିତିବାର ଆଶା ସମସ୍ତଙ୍କ ମନରେ ରହିଛି। ଏହି ଭୂତାଣୁ ବିଶ୍ୱରେ ନିଜ କାୟା ବିସ୍ତାର କରୁଥିବାବେଳେ ତା’ର ମୁକାବିଲା ପାଇଁ ବିଭିନ୍ନ ସ୍ତରରେ ପ୍ରୟାସ ଜାରି ରହିଛି। ଏଥିରେ ଯୋଡ଼ି ହୋଇଛି କଟକ ଖପୁରିଆସ୍ଥିତ ସରକାରୀ ଆଇଟିଆଇ। ପୂର୍ବରୁ ଏହି ଶିକ୍ଷାନୁଷ୍ଠାନ ଦ୍ୱାରା ଭ୍ରାମ୍ୟମାଣ କରୋନା ନମୁନା ସଂଗ୍ରହ ମେଶିନ ତିଆରି କରାଯାଇଥିବାବେଳେ ସମ୍ପ୍ରତି ଦୁଇଟି ରୋବର୍ଟ ତିଆରି କରାଯାଇଛି। ଯାହା କରୋନା ରେଗୀଙ୍କୁ ଡାକ୍ତରଖାନାରେ ସେବା ଯୋଗାଇବ।
ସୂଚନା ଅନୁଯାୟୀ, କରୋନା ଲଢେଇରେ ସାମିଲ ହୋଇଥିବା ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କୁ ସହାୟତା ଯୋଗାଇବା ଲକ୍ଷ୍ୟ ନେଇ ଖପୁରିଆ ସରକାରୀ ଆଇଟିଆଇର ୬ଜଣ ଇନ୍ଷ୍ଟ୍ରକ୍ଟର ରୋବର୍ଟ ତିଆରି କରିବାକୁ ନିଷ୍ପତ୍ତି ନେଇଥିଲେ। ଏଥିପାଇଁ ସେମାନେ ଲ୍ୟାବ୍ରେ ଦିନରାତି ପରିଶ୍ରମରେ ଲାଗିପଡ଼ିଥିଲେ। ଶେଷରେ ସେମାନଙ୍କ ସ୍ବପ୍ନ ଓ ପରିଶ୍ରମ ସାକାର ହୋଇଥିଲା। ଆଇଟିଆଇ ଏବଂ ସାକ୍ ରୋବୋଟିକ୍ସ ଲ୍ୟାବର ମିଳିତ ଉଦ୍ୟମରେ ସେମାନେ ତିଆରି କରିଥିଲେ ଦୁଇଟି ରୋବର୍ଟ। ଖପୁରିଆ ସରକାରୀ ଆଇଟିଆଇ ଅଧ୍ୟକ୍ଷ ଡ. ହୃଷୀକେଶ ମହାନ୍ତିଙ୍କ ସୂଚନା ଅନୁଯାୟୀ, ଏହି ରୋବର୍ଟ ଦୁଇଟିକୁ ଦୀପକ କୁମାର ମୁଦୁଲି, ଲଳିତ ମହାନ୍ତି, ମିତାଲି ରାୟ, ଲଳିତା ସୁନ୍ଦରୀ ମାର୍ଥା, ଜ୍ୟୋତି ରଞ୍ଜନ ବାରିକ ଏବଂ ସଞ୍ଜୟ କର ମିଳିତ ଭାବେ ତିଆରି କରିଛନ୍ତି। ଏହି ରୋବର୍ଟର ଉଚ୍ଚତା ପ୍ରାୟ ୩ ଫୁଟ। କୋଭିଡ-୧୯ ଡାକ୍ତରଖାନାରେ ଚିକିତ୍ସିତ ହେଉଥିବା ରୋଗୀଙ୍କୁ ଏହି ରୋବର୍ଟ ମାଧ୍ୟମରେ ସେବା ଯୋଗାଯାଇପାରିବ। ଚଳପ୍ରଚଳ ପାଇଁ ଏଥିରେ ଚକ ଲଗାଯାଇଛି। ରୋଗୀଙ୍କୁ ଖାଦ୍ୟପାନୀୟ ତଥା ଔଷଧ ଯୋଗାଇବାରେ ଏହା ସହାୟକ ହେବ। ଏଥିପାଇଁ ଏକ ଟ୍ରେ ରହିଛି। ଯେଉଁଥିରେ ୨୦ କେଜି ଓଜନର ସାମଗ୍ରୀ ବହନ କରାଯାଇପାରିବ। ରୋଗୀମାନଙ୍କ ସେବା କରୁଥିବା ନର୍ସ ଓ ସ୍ବାସ୍ଥ୍ୟକର୍ମୀଙ୍କୁ ଏହା ପ୍ରତ୍ୟକ୍ଷ ଭାବେ ସାହାଯ୍ୟ କରିବ। ଏହାଦ୍ୱାରା ସେମାନଙ୍କୁ କରୋନା ଭୂତାଣୁ ସଂକ୍ରମଣରୁ ମଧ୍ୟ ସିଧାସଳଖ ରକ୍ଷା କରାଯାଇପାରିବ। ଏହି ରୋବର୍ଟରେ ୱେୟାରଲେସ କମ୍ୟୁନିକେଶନ ପ୍ରୋଟୋକଲ ବ୍ୟବହାର କରାଯାଇଛି। ନାଭିଗେଶନ ଓ ମ୍ୟାପିଂ ଆଦି ଦ୍ୱାରା ଆହୁରି ଅଧିକ ବିକଶିତ କରାଯାଇପାରିଲେ ଏହି ରୋବର୍ଟ ଡାକ୍ତରଖାନାର ଯେ କୌଣସି ୱାର୍ଡରେ ସ୍ବୟଂଚାଳିତ ହୋଇ କାର୍ଯ୍ୟକ୍ଷମ ହୋଇପାରିବ। ଏହା ଟେଲି ପ୍ରୋଜେନ୍ସ ରୋବର୍ଟ। ଏହା ମାଧ୍ୟମରେ ଡାକ୍ତରମାନେ ରୋଗୀଙ୍କ କାର୍ଯ୍ୟଶୈଳୀ ଉପରେ ନଜର ରଖିପାରିବେ। ଏଥିରେ ଲାଇଭ ଭିଡିଓ ବ୍ୟବସ୍ଥା ରହିଛି। ଯାହାଦ୍ୱାରା ଡାକ୍ତରମାନେ ନିଜ ଚାମ୍ବରରେ ରହି ରୋଗୀଙ୍କ ସହ ସିଧାସଳଖ କଥାବାର୍ତ୍ତା ମଧ୍ୟ ହୋଇପାରିବେ। ଏ ନେଇ ବିଭିନ୍ନ ମହଲରେ ପ୍ରଶଂସା ମିଳୁଥିବା ଅଧ୍ୟକ୍ଷ ଡ. ମହାନ୍ତି କହିଛନ୍ତି।