ଭୁବନେଶ୍ୱର,୫।୫(ବ୍ୟୁରୋ)-ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ମଙ୍ଗଳବାର ୧୦୩, ୧୧୨, ୧୧୩, ୧୧୪, ୧୧୫, ୧୬୩ ନଂ କରୋନା ଆକ୍ରାନ୍ତଙ୍କ ବିଷୟରେ ତଥ୍ୟ ପ୍ରଦାନ କରାଯାଇଛି। ୬ ଜଣଙ୍କ ଘର ସୁନ୍ଦରଗଡ଼ ଜିଲା ରାଉରକେଲାରେ ବୋଲି କୁହାଯାଇଛି। ୧୦୩ ନଂ କରୋନା ପଜିଟିଭ ଜଣେ ୬୦ ବର୍ଷିୟ ବୃଦ୍ଧ। ସେ ଲକ ଡାଉନ ସମୟରେ ଘରେ ରହୁଥିଲେ। ପରବର୍ତ୍ତୀ ସମୟରେ ତାଙ୍କର ଥଣ୍ଡା ଓ କାଶର ଲକ୍ଷଣ ଦେଖାଦେଇଥିଲା। ପରେ ୨୩ ଏପ୍ରିଲରେ ତାଙ୍କୁ କୋଭିଡ ହସ୍ପିଟାଲରେ ଆସୋଲେଶନରେ ରଖାଯାଇଥିଲା। ସେହିପରି ୧୧୨ ନଂ. ଆକ୍ରାନ୍ତଙ୍କ ବୟସ ୫୫ ବର୍ଷ ହୋଇଥିବାବେଳେ ସେ ୧୦୩ ନଂ କରୋନା ସଂକ୍ରମିତ ବ୍ୟକ୍ତି ସଂସ୍ପର୍ଶରେ ଆସିଥିଲେ। ତେବେ ତାଙ୍କ ନିକଟରେ କୌଣସି କରୋନା ଲକ୍ଷଣ ନ ଥିଲା। ୧୧୩ ନଂ. ଆକ୍ରାନ୍ତ ଜଣେ ୩୫ ବର୍ଷିୟ ମହିଳା ଓ ୧୧୪ ଆକ୍ରାନ୍ତ ଜଣେ ୩୮ ବର୍ଷିୟା ମହିଳା ହୋଇଥିବାବେଳେ ଉଭୟେ ୧୦୩ ନଂ ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି। ୧୧୫ ନଂ ଆକ୍ରାନ୍ତ ବ୍ୟକ୍ତି ଜଣକ ୧୦୩ ନଂ. ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ବିଭାଗ ପକ୍ଷରୁ ସୂଚନା ମିଳିଛି। ୧୬୩ ନଂ. ସଂକ୍ରମିତ ବ୍ୟକ୍ତି ଜଣକ ତାଙ୍କ ପଡ଼ୋଶୀ କରୋନା ସଂକ୍ରମିତଙ୍କ ସଂସ୍ପର୍ଶରେ ଆସିଥିଲେ। ତେବେ ଲକ ଡାଉନ ସମୟରେ ତାଙ୍କ ପିଲାମାନେ ବାରମ୍ବାର କ୍ରିକେଟ ଖେଳୁଥିଲେ। ସେହିପରି ତାଙ୍କ ସ୍ବାମୀ ପ୍ରତିଦିନ ବ୍ୟାଙ୍କକୁ ଯିବା ଆସିବା କରୁଥିବା ବିଭାଗ ପକ୍ଷରୁ କୁହାଯାଇଛି।
