ନୂଆଦିଲ୍ଲୀ, ୨୭ା୫ (ପି.ଟି.)-ଜାତୀୟ ଫୁଟ୍ବଲ ପ୍ରସ୍ତୁତି କ୍ୟାମ୍ପରେ ଯୋଗ ଦେଇଥିବା ୩୭ ଜଣ ଫୁଟ୍ବଲ ଖେଳାଳିଙ୍କ ମଧ୍ୟରୁ ସୋମବାର ୬ଜଣଙ୍କୁ ରିଲିଜ କରିଛନ୍ତି କୋଚ୍ ଇଗୋର ଷ୍ଟିମାକ୍। ଜୁନ୍ ୫ରୁ ୮ ପର୍ଯ୍ୟନ୍ତ ଥାଇଲାଣ୍ଡର ବୁରିରାମଠାରେ କିଙ୍ଗ୍ସ କପ୍ ଖେଳାଯିବ। ଏହି ଟୁର୍ନାମେଣ୍ଟ ପୂର୍ବରୁ ବିଶାଲ କାଇଥ୍, ଜର୍ମନପ୍ରୀତ ସିଂ, ନନ୍ଧା କୁମାର ରେଡିମ୍ ଟିଲାଙ୍ଗ୍, ବିକ୍ରମଜିତ୍ ସିଂ ଏବଂ ସୁମିତ୍ ପାସିଙ୍କୁ ରିଲିଜ କରାଯାଇଛି। କ୍ୟାମ୍ପରେ ଖେଳାଳିମାନଙ୍କ ପ୍ରଦର୍ଶନ ନେଇ ମୁଁ ଖୁସି। କିଙ୍ଗ୍ସ କପ୍ ପାଇଁ ଚୂଡ଼ାନ୍ତ ୨୩ଜଣିଆ ଦଳ ମନୋନୟନ କରିବା କଷ୍ଟକର ବୋଲି ସେ କହିଛନ୍ତି। ସେ କହିଛନ୍ତି, ଆମେ ଯେଉଁ ୬ ଖେଳାଳିଙ୍କୁ ଫେରାଇ ଦେଇଛୁ, ସେମାନଙ୍କ ଲାଗି ଓ୍ବାର୍କିଂ ପ୍ରୋଗ୍ରାମ ଦିଆଯାଇଛି। ଫିଟ୍ନେସ୍, ଟେକ୍ନିକାଲ ଏବଂ ଟାକ୍ଟିକାଲ କ୍ଷେତ୍ରରେ ସୁଧାର ଆଣିବା ଲାଗି ସେମାନଙ୍କୁ କୁହାଯାଇଛି। ଷ୍ଟିମାକ୍ ହେଉଛନ୍ତି ୧୯୯୮ରେ ଫ୍ରାନ୍ସରେ ଖେଳାଯାଇଥିବା ବିଶ୍ୱକପ ଭାଗ ନେଇଥିବା କ୍ରୋଏସିଆ ଦଳର ଜଣେ ଅନ୍ୟତମ ସଦସ୍ୟ। ସେହି ସଂସ୍କରଣରେ କ୍ରୋଏସିଆ ତୃତୀୟ ସ୍ଥାନ ଅଧିକାର କରିଥିଲା। ୫୧ ବର୍ଷୀୟ ଷ୍ଟିମାକ୍ଙ୍କ ତତ୍ତ୍ୱାବଧାନରେ କ୍ରୋଏସିଆ ବିଶ୍ୱକପ୍ ମଧ୍ୟ ଖେଳିଛି। ଭାରତୀୟ ଦଳ ବର୍ତ୍ତମାନ କିଙ୍ଗ୍ସ କପ୍ ପାଇଁ ପ୍ରସ୍ତୁତ ହେଉଛି। ଏହା ହେଉଛି ଫିଫା ଦ୍ୱାରା ସ୍ବୀକୃତିପ୍ରାପ୍ତ ଏକ ଅନ୍ତର୍ଜାତୀୟ ଏ’ ଗ୍ରେଡ୍ ଟୁର୍ନାମେଣ୍ଟ। ଫୁଟ୍ବଲ ଆସୋସିଏଶନ ଥାଇଲାଣ୍ଡ ତରଫରୁ ଏହା ୧୯୬୮ରୁ ଆୟୋଜିତ ହୋଇଆସୁଛି। ଭାରତ ପୂର୍ବରୁ ୧୯୭୭ ଏବଂ ୧୯୮୧ରେ କିଙ୍ଗ୍ସ କପ୍ରେ ଅଂଶଗ୍ରହଣ କରିଥିଲା। ଭାରତ ଜୁନ୍ ୫ରେ କୁରାକାଓ ବିପକ୍ଷରେ ପ୍ରଥମ ମ୍ୟାଚ ଖେଳିବ। ସେହିଦିନ ଅନ୍ୟ ଏକ ମ୍ୟାଚରେ ଆୟୋଜକ ଥାଇଲାଣ୍ଡ ଭିଏତ୍ନାମ ସହିତ ମୁକାବିଲା କରିବ। ଉଭୟ ମ୍ୟାଚ୍ର ବିଜେତା ଫାଇନାଲକୁ କ୍ୱାଲିଫାଏ କରିବେ। ଜୁନ୍ ୮ରେ ଅନ୍ୟ ଦୁଇ ଦଳ ତୃତୀୟ ସ୍ଥାନ ପାଇଁ ପ୍ଲେ-ଅଫ୍ ଖେଳିବେ।