ଢେଙ୍କାନାଳ ଅଫିସ, ୧୨।୬ – ଢେଙ୍କାନାଳ ଜିଲାରେ ଚୋରା ବାଲି ଏବଂ ପଥର ବ୍ୟବସାୟୀଙ୍କ ଦୌରାତ୍ମ୍ୟ ପ୍ରଶାସନର ମୁଣ୍ଡବ୍ୟଥା ବଢ଼ାଇଛି। ଏହାକୁ ରୋକିବାରେ ପୋଲିସ ଏବଂ ତହସିଲ କର୍ତ୍ତୃପକ୍ଷ ବିଫଳ ହେବା ପରେ ଆକ୍ସନ ମୁଡ୍କୁ ଆସିଛି ଜିଲା ପ୍ରଶାସନ। ଅଧିକାରୀଙ୍କ ଅବହେଳା ଏବଂ ଅପାରଗତା ପଦାରେ ପଡ଼ିବା ପରେ ଓଡ଼ାପଡ଼ା, ଗଁଦିଆ, ସଦର, ଭୁବନ, କାମାକ୍ଷାନଗର, ପରଜଙ୍ଗ ତହସିଲଦାରଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ଆସନ୍ତା ୧୮ ତାରିଖରେ ଏସ୍ପି, ଡିଏଫ୍ଓ, ପୋଲିସ ଏବଂ ରାଜସ୍ବ ବିଭାଗ ଅଧିକାରୀଙ୍କୁ ନେଇ ଏକ ଜରୁରୀ ବୈଠକ ବସିବ ଏବଂ ମିଳିତ ଚଢ଼ାଉ ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ କରାଯିବ ବୋଲି ଜିଲାପାଳ ଭୂମେଶ ଚନ୍ଦ୍ର ବେହେରା ସୂଚନା ଦେଇଛନ୍ତି।
ଜିଲାର ବ୍ରାହ୍ମଣୀ, ରାମିଆଳ ନଦୀଘାଟ ସମେତ ନିହଲପ୍ରସାଦ, କାଶୀପୁର, ଛୋଟତେନ୍ତୁଳି, ମାଣିପୁର, ବଳଦିଆବନ୍ଧ ଅଞ୍ଚଳରୁ ଲଘୁ ଖଣିଜ ଦ୍ରବ୍ୟର ଅବାଧ ଚାଲାଣ ହେଉଛି। ପୋଲିସ, ତହସିଲ ପ୍ରଶାସନ ଏବଂ ରାଜସ୍ବ ବିଭାଗ ମଧ୍ୟରେ ସମନ୍ବୟ ଅଭାବରୁ ଚୋରା ବ୍ୟବସାୟୀମାନେ ସକ୍ରିୟ ହୋଇଉଠିଛନ୍ତି। ଏହାକୁ ରୋକିବାକୁ ଗୁରୁବାର ପୂର୍ବାହ୍ନରେ ଜିଲା କାର୍ଯ୍ୟାଳୟ ସଦ୍ଭାବନା ଗୃହରେ ଜରୁରୀ ରାଜସ୍ବ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ବେଆଇନ ବାଲି ଏବଂ ପଥର ଖାଦାନରେ ଚଢ଼ାଉ ବେଳେ ପ୍ରଶାସନିକ ଅଧିକାରୀମାନେ ମାଫିଆଙ୍କ ଆକ୍ରମଣର ଶିକାର ହେଉଛନ୍ତି। ପୋଲିସ ନିକଟରେ ଅଭିଯୋଗ କରିବା ସତ୍ତ୍ୱେ କାର୍ଯ୍ୟାନୁଷ୍ଠାନ ନିଆଯାଉନାହିଁ। ପୋଲିସ ଉପସ୍ଥିତିରେ ମାଫିଆମାନେ ଚଢ଼ାଉରେ ସାମିଲ ଥିବା ଅଧିକାରୀଙ୍କୁ ବନ୍ଧୁକ ଦେଖାଇ ହତ୍ୟାଧମକ ଦେଉଛନ୍ତି। ପୋଲିସ ଏବଂ ଚୋରା ଚାଲାଣକାରୀଙ୍କ ମଧ୍ୟରେ ଅସାଧୁ ମେଣ୍ଟ ଯୋଗୁ ଏପରି କାରବାର ବଢ଼ିଚାଲିଥିବା ତହସିଲଦାର ଏବଂ ଆର୍ଆଇମାନେ ଅଭିଯୋଗ ଆଣିଥିଲେ। ନିକଟରେ ଗଁଦିଆ ତହସିଲର ଛୋଟତେନ୍ତୁଳି, ସଦର ତହସିଲର ମାଣିପୁରସ୍ଥିତ ବେଆଇନ ପଥର ଖଦାନରେ ଚଢ଼ାଉ ବେଳେ ପ୍ରଶାସନିକ ଅଧିକାରୀମାନେ ମାଫିଆଙ୍କ ଆକ୍ରୋଶର ଶିକାର ହୋଇଥିଲେ। ଉଭୟ ଘଟଣାରେ ପୋଲିସର କୋହଳ ମନୋଭାବ ଏବଂ ଅସହଯୋଗ ଭିନ୍ନ ଦିଗକୁ ଅଙ୍ଗୁଳି ନିର୍ଦ୍ଦେଶ କରୁଛି। ଏହାର ନିରପେକ୍ଷ ତଦନ୍ତ କରାଗଲେ ପ୍ରକୃତ ଅଭିଯୁକ୍ତମାନେ ଧରାପଡ଼ିବେ ବୋଲି ଆଲୋଚନା ହେଉଛି।
ଏ ନେଇ ଜିଲାପାଳ କୁହନ୍ତି, ଜିଲାରେ ବଢୁଥିବା ବାଲି ଏବଂ ପଥର ଚୋରା ଚାଲାଣ ରୋକିବାକୁ ଏହି ବୈଠକ ଡକାଯାଇଥିଲା। ଏ ନେଇ ୬ ତହସିଲଦାରଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି। ଉତ୍ତର ମିଳିବା ପରେ ପରବର୍ତ୍ତୀ ପଦକ୍ଷେପ ନିଆଯିବ। ଏପ୍ରିଲରେ ମିଳିତ ଚଢ଼ାଉ ପାଇଁ ନିଷ୍ପତ୍ତି ହୋଇଥିଲା। କିନ୍ତୁ କରୋନା ଯୋଗୁ ଏଥିରେ ବିଳମ୍ବ ହୋଇଛି। ଚଢ଼ାଉ ସମୟରେ ଅନେକ ସ୍ଥାନରେ ପୋଲିସ ସହଯୋଗ ମିଳୁ ନ ଥିବା ଅଭିଯୋଗ ହେଉଛି। ପଥର ମାଫିଆମାନେ ଚଢାଉ ପୂର୍ବରୁ ସୂଚନା ପାଇଯାଉଛନ୍ତି। ଅଭିଯୁକ୍ତମାନେ ଅତର୍କିତ ଅଧିକାରୀଙ୍କ ଉପରକୁ ଆକ୍ରମଣ କରୁଛନ୍ତି। ଏହାକୁ ରୋକିବା ଲାଗି ବ୍ୟାପକ ପଦକ୍ଷେପ ନିଆଯିବ ବୋଲି ଜିଲାପାଳ ସୂଚନା ଦେଇଛନ୍ତି।