ଭୁବନେଶ୍ୱର,୨୧ା୪(ବ୍ୟୁରୋ): କରୋନା ମୁକାବିଲା କରୁଥିବା ରାଜ୍ୟ ସରକାର ସୋମବାର ୯୧୦୦.୨୯ କୋଟି ଟଙ୍କାର ପୁଞ୍ଜିିନିବେଶ ପ୍ରସ୍ତାବକୁ ଅନୁମୋଦନ କରିଛନ୍ତିି। ଏଥିଯୋଗୁ ରାଜ୍ୟରେ ୬ ହଜାର ୫୨୫ ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ୨୨ ତମ ଉଚ୍ଚ କ୍ଷମତା ସମ୍ପନ୍ନ କର୍ତ୍ତୃପକ୍ଷ (ଏଚ୍ଏଲସିଏ) ୮୮୫୦.୧୯ କୋଟି ଟଙ୍କାର ଦୁଇଟି ପୁଞ୍ଜିନିବେଶ ପ୍ରସ୍ତାବକୁ ଅନୁମୋଦନ କରିଛି। ଏଥିରେ ୫ ହଜାର ୨୫୦ ଜଣଙ୍କୁ ନିଯୁକ୍ତି ସୁଯୋଗ ମିଳିବ। ରୁଙ୍ଗ୍ଟା ମାଇନ୍ସ ଏବଂ ଏମ୍/ଏସ୍ ଧୁନ୍ସେରୀ ଭେଞ୍ଚର୍ସ ଉକ୍ତ ଦୁଇଟି ପ୍ରକଳ୍ପ ପାଇଁ ରାଜ୍ୟ ସରକାରଙ୍କୁ ପ୍ରସ୍ତାବ ଦେଇଥିଲେ। ଧୁନ୍ସେରୀ ପାରାଦୀପରେ ୧୦୧୩.୨୯ କୋଟି ଟଙ୍କାର ବାର୍ଷିକ ୬୦ ହଜାର ମେଟ୍ରିକ୍ଟନ୍ର ମାଲେଇକ ଆନ୍ହାଇଡ୍ରାଇଡ୍ ଉପତ୍ାଦନ ପ୍ଲାଣ୍ଟ ପ୍ରତିଷ୍ଠା କରିବ। ସେଥିରେ ପ୍ରାୟ ୩୫୯ ଜଣଙ୍କୁ ନିଯୁକ୍ତି ମିଳିବ। ଏହାଛଡା ରୁଙ୍ଗ୍ଟା ମାଇନ୍ସ ଢେଙ୍କାନାଳ ଜିଲା ଝାରବନ୍ଧରେ ବାର୍ଷିକ -୦.୯ରୁ ୨.୮୫ ନିୟୁତ ଟନ୍ କ୍ଷମତା ବିଶିଷ୍ଟ ଇଣ୍ଟିଗ୍ରେଟେଡ ଷ୍ଟିଲ ପ୍ଲାଣ୍ଟ, ୩୮୫ ମେଗାୱାଟ୍ ବିଶିଷ୍ଟ କ୍ୟାପ୍ଟିଭ ପାୱାର ପ୍ଲାଣ୍ଟ ଏବଂ ୧.୬୯ ନିୟୁତ ଟନ୍ର ସିମେଣ୍ଟ କାରଖାନା ସ୍ଥାପନ କରିବ। ଏଥିରେ ମୋଟ ୭୮୩୬.୯୦ କୋଟି ଟଙ୍କାର ପୁଞ୍ଜିନିବେଶ ହେବା ସହ ୪୯୦ ଜଣଙ୍କୁ ନିଯୁକ୍ତି ସୁଯୋଗ ମିଳି ପାରିବ। ଏଥିସହିତ କୋଭିଡ୍-୧୯ ସଂକ୍ରମଣର ଘଡି ସନ୍ଧି ମୁହୂର୍ତ୍ତରେ ରାଜ୍ୟରେ ପୁଞ୍ଜିନିବେଶ ପ୍ରକ୍ରିିୟାକୁ ତ୍ୱରାନ୍ବିତ କରିବା ଲାଗି ମୁଖ୍ୟମନ୍ତ୍ରୀ ଏକ ଆନ୍ତଃ ମନ୍ତ୍ରୀସ୍ତରୀୟ କିମିଟି ଗଠନ କରିଛନ୍ତି। ଅର୍ଥମନ୍ତ୍ରୀ ନିରଞ୍ଜନ ପୂଜାରୀ, ଶ୍ରମ ଓ ରାଜ୍ୟ କର୍ମଚାରୀ ବୀମା ମନ୍ତ୍ରୀ ସୁଶାନ୍ତ ସିଂ, ଇସ୍ପାତ ଓ ଖଣି ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ଓ ଶିଳ୍ପ ଏବଂ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ରାଷ୍ଟ୍ରମନ୍ତ୍ରୀ ଦିବ୍ୟ ଶଙ୍କର ମିଶ୍ରଙ୍କୁ ନେଇ ଏହି କମିଟି ଗଠନ କରାଯାଇଛି।
ଏହାଛଡା ମୁଖ୍ୟ ଶାସନ ସଚିବ ଅସୀତ ତ୍ରିପାଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ୯୧ ତମ ରାଜ୍ୟସ୍ତରୀୟ ସିଙ୍ଗଲ ୱିଣ୍ଡୋ କ୍ଲିୟରାନ୍ସ ଅଥରିଟି (ଏସ୍ଏଲ୍ଏସ୍ଡବ୍ଲ୍ୟୁସିଏ) ୨୫୧.୦୯ କୋଟି ଟଙ୍କାର ୪ ପୁଞ୍ଜିନିବେଶ ପ୍ରସ୍ତାବକୁ ଅନୁମୋଦନ କରିଛି। ମେଟାଲ ଡାଉନ୍ଷ୍ଟ୍ରିମ, ଟେକ୍ସଟାଇଲ ଆଣ୍ଡ ଆପାରେଲ, ଲଜିଷ୍ଟିକ ଆଣ୍ଡ ଇନ୍ଫ୍ରାଷ୍ଟ୍ରକ୍ଚର କ୍ଷେତ୍ରରେ ଉକ୍ତ ପୁଞ୍ଜି ବିନିଯୋଗ ହେବ। ଓଡିଶାରେ ଚାଇନା କ୍ରୀଡା ଜୋତା ତିଆରି କମ୍ପାନୀ ପୁଞ୍ଜିନିବେଶ କରିବା ନେଇ ଆଗ୍ରହ ଦେଖାଇଛି। ଉକ୍ତ ୪ ପ୍ରକଳ୍ପ କାର୍ଯ୍ୟକ୍ଷମ ହେଲେ ରାଜ୍ୟରେ ୧୨୭୫ ଜଣଙ୍କୁ ନିଯୁକ୍ତି ସୁଯୋଗ ମିଳି ପାରିବ। ଏମ୍/ଏସ୍ ନିରେନ କୁମାର ଆନନ୍ଦ ରାଜ୍ୟରେ ୬୨.୪୪ କୋଟି ଟଙ୍କାର ୧ ନିୟୁତ ଜୋତା ଉପତ୍ାଦନ କ୍ଷମତା ବିଶିଷ୍ଟ ପ୍ଲାଣ୍ଟ ପ୍ରତିଷ୍ଠା କରିବ। ଏଥିରେ ୬୨୦ ଜଣଙ୍କୁ ନିଯକ୍ତି ମିଳିପାରିବ। ସେହିପରି କାସ୍ଭି ଇଣ୍ଟରନ୍ୟାଶନାଲ ୫୫.୨୩ କୋଟି ଟଙ୍କାର ୧.୨ ନିୟୁତ ଟନ୍ ବିଶିଷ୍ଟ ବେନିଫିକେଶନ ପ୍ଲାଣ୍ଟ ଏବଂ ୦.୬ ନିୟତ ଟନ୍ ବିଶିଷ୍ଟ ଆଇରନ୍ ଓର ପ୍ଲାଣ୍ଟ ସ୍ଥାପନ କରିବ। ଏଥିରେ ୫୦ ଜଣଙ୍କୁ ନିଯୁକ୍ତି ମିଳିପାରିବ । ପୁରୋଷ୍ଟିଲ ଇଣ୍ଡିଆ ପ୍ରାଇଭେଟ ଲିମିଟେଡ ମେଟାଲ ଡାଉନ୍ଷ୍ଟ୍ରିମ୍ ସେକ୍ଟରରେ ୫୩.୪୨ କୋଟି ଏବଂ ଓଡିଶା କ୍ୟାରିୟର୍ସ ଆଣ୍ଡ ଟ୍ରେଡ୍ ୫୦ କୋଟି ଟଙ୍କା ବ୍ୟୟରେ ଲଜିଷ୍ଟିକ୍ ପାର୍କ ନିର୍ମାଣ କରିବ। ଏହି ଦୁଇଟି ପ୍ରକଳ୍ପରେ ୪୦୫ ଜଣଙ୍କୁ ନିଯୁକ୍ତି ସୁଯୋଗ ମିଳି ପାରିବ।