ନୂଆଦିଲ୍ଲୀ,୨-୧୧: ୨୦୧୧-୧୨ଠାରୁ ୨୦୧୭-୧୮ ମଧ୍ୟରେ ସାରା ଦେଶରେ ୯୦ ଲକ୍ଷ ନିଯୁକ୍ତି କମିଛି। ଅଜୀମ ପ୍ରେମଜୀ ବିଶ୍ୱବିଦ୍ୟାଳୟର ସେଣ୍ଟର ଅଫ୍ ସଷ୍ଟେନେବୁଲ ଏମ୍ପ୍ଲଏମେଣ୍ଟ ପକ୍ଷରୁ ପ୍ରକାଶିତ ଏକ ନୂଆ ଏକାଡେମିକ ପେପରରେ ଏଭଳି ବିଷୟ ଉଲ୍ଲେଖ ରହିଛି। ଜବାହର ଲାଲ ନେହେରୁ ବିଶ୍ୱବିଦ୍ୟାଳୟର ପ୍ରଫେସର ସନ୍ତୋଷ ମେହେରୋତ୍ରା ଏବଂ ପଞ୍ଜାବ ସେଣ୍ଟ୍ରାଲ ୟୁନିଭର୍ସିଟି ପ୍ରଫେସର ଯଯାତି କେ. ପରିଡାଙ୍କ ଦ୍ୱାରା ଉକ୍ତ ପେପର ପ୍ରସ୍ତୁତ ହୋଇଥିବା ବେଳେ ଏଭଳି ନିଯୁକ୍ତି ହ୍ରାସ ଦେଶର ସ୍ବାଧୀନତା ପରଠାରୁ ପ୍ରଥମ ବୋଲି କୁହାଯାଇଛି। ନିଯୁକ୍ତି ଏବଂ ଅଣକୃଷି ଉଦ୍ୟୋଗଗୁଡିକୁ ନେଇ ଜାତୀୟ ସାମ୍ପୂଲ ସର୍ଭେ(ଏନ୍ଏସ୍ଏସ୍) ପକ୍ଷରୁ ହୋଇଥିବା ବିଭିନ୍ନ ସର୍ଭେକୁ ଆଧାର କରି ଏହି ପେପର ପ୍ରସ୍ତୁତ କରାଯାଇଛି।
୨୦୧୧-୧୨ରେ ଦେଶରେ ୪୭୪.୨ ନିୟୁତ ନିଯୁକ୍ତି ରହିଥିବା ବେଳେ ଏହା ୨୦୧୭-୧୮ରେ ୪୬୫.୧ ନିୟୁତକୁ ଖସି ଆସିଥିବା ରିପୋର୍ଟରେ ଉଲ୍ଲେଖ କରାଯାଇଛି। ଏନ୍ଏସ୍ଏସ୍ଓ ପକ୍ଷରୁ ହୋଇଥିବା ଲେବର ଫୋର୍ସ ସର୍ଭେରେ ଦେଶରେ ବେକାରି ୪୫ ବର୍ଷର ସର୍ବୋଚ୍ଚ ସ୍ତରରେ ରହିଥିବା କୁହାଯାଇଛି। ଯାହାକୁ ନେଇ ଦେଶ ମଧ୍ୟରେ ଅନେକ ତର୍କ ବିତର୍କ ହୋଇଛି। ଦୁଇ ପ୍ରଫେସରଙ୍କ ପକ୍ଷରୁ ନିଯୁକ୍ତି ନେଇ କରାଯାଇଥିବା ଏହି ଅଧ୍ୟୟନର ଫଳାଫଳ ନିକଟରେ ଆଉ ଏକ ସର୍ଭେକୁ ବିରୋଧାଭାଷ କରୁଥିବା ଜଣାପଡିଛି। ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦ ଦ୍ୱାରା କରାଯାଇଥିବା ଅଧ୍ୟୟନରେ ନିଯୁକ୍ତି ନେଇ ଭିନ୍ନ ସୂଚନା ଦିଆଯାଇଛି। ଏହି ଅଧ୍ୟୟନ ଲଭେସ ଭଣ୍ଡାରୀ ଏବଂ ଅମରେଶ ଦୁବେଙ୍କ ପକ୍ଷରୁ କରାଯାଇଛି। ୨୦୧୧-୧୨ରେ ନିଯୁକ୍ତି ୪୩୩ ନିୟୁତ ଥିବା ବେଳେ ଏହା ୨୦୧୭-୧୮ରେ ୪୫୭ ନିୟୁତକୁ ବଢିଥିବା ଉଲ୍ଲେଖ କରାଯାଇଛି।
ମେହେରୋତ୍ରା ଏବଂ ପରିଡାଙ୍କ ପକ୍ଷରୁ ହୋଇଥିବା ‘ଇଣ୍ଡିଆସ ଇକୋନୋମିକ କ୍ରାଇସିସ,ରାଇଜିଂ ଏଜୁକେଶନ ଲେଭଲ,ଫଲିଂ ନନ୍-ଏଗ୍ରିକଲଚରାଲ ଜବ ଗ୍ରୋଥ’ ଶୀର୍ଷକ ଏକାଡେମିକ ପେପରରେ ମୁଖ୍ୟତଃ ୪ଟି ଦିଗ ଉପରେ ଫୋକସ୍ କରାଯାଇଛି। ପ୍ରଥମତଃ କୃଷି କ୍ଷେତ୍ରରେ ନିରନ୍ତର ଭାବେ ନିଯୁକ୍ତି କ୍ଷତିଗ୍ରସ୍ତ ହେଉଥିବା ଏଥିରେ ଉଲ୍ଲେଖ କରାଯାଇଛି। ଏକ୍ଷେତ୍ରରେ ବାର୍ଷିକ ହାର ୪.୫ ନିୟୁତ ରହିଛି। ସେହିଭଳି ଗତ ୬ ବର୍ଷରେ ମାନୁଫାକଚରିଂ କ୍ଷେତ୍ରରେ ୩.୫ ନିୟୁତ ନିଯୁକ୍ତି ହ୍ରାସ, ଯୁବକମାନଙ୍କ ଶ୍ରମ ଶକ୍ତିରେ ଯୋଗଦାନ ହାର(ଏଲ୍ଏଫ୍ପିଆର୍) ୪୪.୬%ରୁ ୩୮.୩%କୁ ହ୍ରାସ, ଓ୍ବାର୍କ ପାର୍ଟିଶିପେଶନ ରେଟ ବା କାର୍ଯ୍ୟଯୋଗଦାନ ହାର(ଡବ୍ଲ୍ୟୁପିଆର୍) ୪୨%ରୁ ୩୧.୪%କୁ ଖସିଥିବା ରିପୋର୍ଟରେ କୁହାଯାଇଛି। ସେହିଭଳି ଶିକ୍ଷିତ ବେକାରିଙ୍କ ସଂଖ୍ୟା ବଢିଥିବା ରିପୋର୍ଟରୁ ଜଣାପଡିଛି। ୨୦୧୭-୧୮ ସୁଦ୍ଧା ନିରକ୍ଷରଙ୍କ ମଧ୍ୟରେ ବେକାରି ହାର ୭.୧%, ପ୍ରାଥମିକ ଶିକ୍ଷା ଲାଭ କରିଥିବା ଲୋକଙ୍କ କ୍ଷେତ୍ରରେ ଏହା ୮.୧%, ଉଚ୍ଚ ପ୍ରାଥମିକ କ୍ଷେତ୍ରରେ ୧୩.୭%, ମାଧ୍ୟମିକ ୧୪.୪%, ଉଚ୍ଚ ମାଧ୍ୟମିକ ୨୪%, ସ୍ନାତକଙ୍କ କ୍ଷେତ୍ରରେ ୨୫.୮% ଏବଂ ସ୍ନାତ୍ତକୋତ୍ତର କ୍ଷେତ୍ରରେ ବେକାରି ହାର ୩୬.୨% ରହିଥିବା ଅଧ୍ୟୟନରେ କୁହାଯାଇଛି।