ନୂଆଦିଲ୍ଲୀ,୨୧।୧୦: ଚଳିତ ଆର୍ଥିକ ବର୍ଷ (୨୦୨୨-୨୩)ର ୨ୟ ତ୍ରୈମାସ ପରେ ଇସ୍ପାତ କ୍ଷେତ୍ରରେ କରାଯାଇଥିବା ସମୀକ୍ଷା ବୈଠକରୁ ଜଣାପଡିଛି, ଗତ ୬ ମାସ ମଧ୍ୟରେ ଇସ୍ପାତ ମୂଲ୍ୟ ପ୍ରାୟ ୪୦% ହ୍ରାସ ପାଇ ୫୭,୦୦୦ ଟଙ୍କାରେ ରହିଛି। ବିଶେଷ କରି ଇସ୍ପାତ ମୂଲ୍ୟ ଅନୁଯାୟୀ ୧୫% ରପ୍ତାନି ଶୁଳ୍କ ହ୍ରାସ ପରେ ଘରୋଇ ବଜାରରେ ଇସ୍ପାତ ମୂଲ୍ୟ କମିଥିବା ଜଣାପଡ଼ିଛି। ସେହିଭଳି ୨୦୨୨ ଆର୍ଥିକ ବର୍ଷର ପ୍ରାରମ୍ଭରେ ହଟ୍ ରୋଲ୍ଡ କେଏଲ (ଏଚ୍ଆର୍ସି) ର ମୂଲ୍ୟ ଏକ ପ୍ରକାର ଉପରମୁହଁା ହେବାର ପ୍ରୟାସ ଆରମ୍ଭ କରିଥିଲା। ଫଳରେ ଇସ୍ପାତ ମୂଲ୍ୟ ବୃଦ୍ଧି ଯୋଗୁ ରିଅଲ ଇଷ୍ଟେଟ୍ ଏବଂ ଗୃହ, ଭିତ୍ତିଭୂମି ଏବଂ ନିର୍ମାଣ କ୍ଷେତ୍ର ସାଙ୍ଗକୁ ଅଟୋମୋବାଇଲ୍ ଓ ଉପଭୋକ୍ତା ସାମଗ୍ରୀ ଉପରେ ସିଧାସଳଖ ପ୍ରଭାବ ପକାଇବା ଆରମ୍ଭ କରିଥିଲା। ସେହିଭଳି ମୂଲ୍ୟ ବୃଦ୍ଧି ଯୋଗୁ ଉପଭୋକ୍ତା ଶିଳ୍ପ ପାଇଁ ଏକ ପ୍ରକାର ଚିନ୍ତାର ବିଷୟ ପାଲଟିଥିଲା। ସେହିପରି ଘରୋଇ ବଜାରରେ ଇସ୍ପାତ ମୂଲ୍ୟ ଚଳିତ ବର୍ଷ ଏପ୍ରିଲରେ ଟନ୍ ପିଛା ୭୮, ୮୦୦ ଟଙ୍କାରେ ରହିଥିଲା। ଏପରିକି ଏହା ଉପରେ ୧୮% ଜିଏସ୍ଟି ଆଦାୟ ସହ ଟନ୍ ପିଛା ଏହାର ମୂଲ୍ୟ ପ୍ରାୟ ୯୩,୦୦୦ ଟଙ୍କା ରହିଥିଲା ବୋଲି ଅନୁସନ୍ଧାନକାରୀ ସଂସ୍ଥାଗୁଡିକ ମତପ୍ରକାଶ କରିଛନ୍ତି। ଅପରପକ୍ଷରେ ଷ୍ଟିଲ୍ ମିଣ୍ଟର ତଥ୍ୟ ଅନୁଯାୟୀ ଏପ୍ରିଲ ଶେଷ ଆଡକୁ ଇସ୍ପାତ ମୂଲ୍ୟ ହ୍ରାସ ପାଇବା ଆରମ୍ଭ କରିଥିଲା। ଏପରିକି ଜୁନ୍ ଶେଷ ସୁଦ୍ଧା ଟନ୍ ପିଛା ଏହାର ମୂଲ୍ୟ ୬୦,୨୦୦ ଟଙ୍କାକୁ ଖସି ଆସିଥିଲା। ସେହିପରି ୨୦୨୨ ଜୁଲାଇ ଏବଂ ଅଗଷ୍ଟରେ ମଧ୍ୟ ସମାନତା ଜାରି ରହିଥିଲା ଏବଂ ସେପ୍ଟେମ୍ବର ମଧ୍ୟଭାଗରେ ଟନ୍ ପିଛା ଏହାର ମୂଲ୍ୟ ୫୭,୦୦୦ ଟଙ୍କାକୁ ଖସି ଆସିଥିଲା। ବିଶେଷକରି ଇସ୍ପାତ ଉତ୍ପାଦ ଉପରେ ସରକାରୀ ଟ୍ୟାକ୍ସ, ବିଦେଶୀ ଚାହିଦା ଏବଂ ଉଚ୍ଚ ମୁଦ୍ରାସ୍ଫୀତି ଓ ଶକ୍ତି ମୂଲ୍ୟ ଆଦି କାରଣରୁ ଇସ୍ପାତ ମୂଲ୍ୟ ହ୍ରାସ ପାଇଥିବା ଆକଳନ କରାଯାଉଛି ବୋଲି ଷ୍ଟିଲ ମେଣ୍ଟ ମତପ୍ରକାଶ କରିଛି।