ଯାଜପୁର ଅଫିସ,୧୯।୩: ଯାଜପୁର ଜିଲା ରସୁଲପୁର ବ୍ଲକର ଗୋପାଳପୁର ଗ୍ରାମ ହସ୍ତତନ୍ତ ଶିଳ୍ପ ପାଇଁ ବେଶ ପ୍ରସିଦ୍ଧି ଲାଭ କରିଛି। ତେଣୁ ଗୋପାଳପୁର ଗ୍ରାମକୁ ହସ୍ତତନ୍ତ ଶିଳ୍ପ ଗ୍ରାମଭାବେ ପ୍ରତିଷ୍ଠା କରିବାକୁ ସେପ୍ଟେମ୍ବର ୧୩ରେ ନିଷ୍ପତ୍ତି ହୋଇଥିଲା। ଏହି ପ୍ରସ୍ତାବର ୬ ମାସ ଅତିକ୍ରାନ୍ତ ହୋଇ ସାରିଥିଲେ ହେଁ ହସ୍ତଶିଳ୍ପ ଗ୍ରାମ୍ୟ ମାନ୍ୟତା ଏବଂ ପର୍ଯ୍ୟଟନ ସହ ଏକତ୍ରୀକରଣ ପ୍ରସ୍ତାବ ଏଯାବତ୍ କାଗଜକଲମରେ ସୀମିତ ରହିଛି। ବିଭାଗୀୟ ଅଧିକାରୀଙ୍କ ଆନ୍ତରିକତାର ଅଭାବ ଯୋଗୁ ଗୋପାଳପୁର ଆଇବି ନିକଟରେ ଆବଶ୍ୟକ ୪ ଏକର ସରକାରୀ ଜମି ମହଜୁଦ ଥାଇ ବି ପ୍ରସ୍ତାବ ଉପରେ କୌଣସି ଅଗ୍ରଗତି ହୋଇପାରି ନାହିଁ। ଏହି ମର୍ମରେ ହସ୍ତତନ୍ତ ଓ ବୟନ ଶିଳ୍ପ ନିର୍ଦ୍ଦେଶକ ଉକ୍ତ ୪ ଏକର ସରକାରୀ ଜମିକୁ ଅଧିଗ୍ରହଣ କରିବା ସହ ରସୁଲପୁର ବିଡିଓଙ୍କୁ ପ୍ରବେଶ ପଥ ସଂଯୋଗ, ପାନୀୟ ଜଳ ସୁବିଧା, ପାର୍କିଂ, ବିଦ୍ୟୁତୀକରଣ ଆଦି ନିର୍ମାଣ କାର୍ଯ୍ୟ ଆରମ୍ଭ କରିବା ପାଇଁ ନିର୍ଦ୍ଦେଶ ଦେବାକୁ ଯାଜପୁର ଜିଲାପାଳଙ୍କୁ ଅନୁରୋଧ କରିଛନ୍ତି।
୨୦୧୯ ସେପ୍ଟେମ୍ବରରେ ଜିଲାପାଳଙ୍କ ସମ୍ମିଳନୀ କକ୍ଷରେ ଗୋପାଳପୁରର ହସ୍ତତନ୍ତ କୁଟୀର ଶିଳ୍ପକୁ ଉତ୍ସାହିତ କରିବା ସହ ଏହାର ବିପଣନ ବ୍ୟବସ୍ଥା ସମ୍ପର୍କରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ହସ୍ତତନ୍ତ ଓ ବୟନ ଶିଳ୍ପ ନିର୍ଦ୍ଦେଶକ ଜ୍ୟୋତି ପ୍ରକାଶ ଦାସ ଯୋଗଦେଇ ବୟନ ଶିଳ୍ପ ଓ ହସ୍ତତନ୍ତର ଊପତ୍ାଦିତ ସାମଗ୍ରୀ ବିକ୍ରୟ, ନୂତନ ଡିଜାଇନର କପଡ଼ା ଓ ସାମଗ୍ରୀ ପ୍ରସ୍ତୁତ, ବୁଣାକାରଙ୍କ ଉନ୍ନତି, ହସ୍ତତନ୍ତର ବିକାଶ ଦିଗରେ ପ୍ରାୟ ୩ ଏକର ଜାଗାରେ ଭିତ୍ତିଭୂମିର ନିର୍ମାଣ, ଟସର ଇତ୍ୟାଦି କଞ୍ଚାମାଲ ପାଇଁ ଅର୍ଜୁନ ଓ ଅଶନ ଗଛର ବୃକ୍ଷରୋପଣ, ବିପଣନ ସ୍ଥାନରେ ସୁଦୃଶ୍ୟ ନାମଫଳକ ବ୍ୟବସ୍ଥା ସହ ଏହାକୁ ଆକର୍ଷଣୀୟ ଭାବେ ସଜାଇବାକୁ ଅନୁରୋଧ କରିଥିଲେ। ଜିଲାପାଳ ରଞ୍ଜନ କୁମାର ଦାସ ଏଥିରେ ଅଧ୍ୟକ୍ଷତା କରି ଭିତ୍ତିଭୂମି ଯାହା ଅଛି, ବର୍ତ୍ତମାନ ସେଥିରେ ଉନ୍ନତି ଆଣିବାର ଆବଶ୍ୟକତା ରହିଛି ବୋଲି କହିଥିଲେ। ତେବେ ଉପସ୍ଥିତ ତହସିଲଦାରଙ୍କୁ ହସ୍ତତନ୍ତ ଶିଳ୍ପ ଗ୍ରାମ ପ୍ରତିଷ୍ଠା ପାଇଁ ପ୍ରାୟ ୩ ଏକର ଜାଗା ଚିହ୍ନଟ ପାଇଁ ସେ ପରାମର୍ଶ ଦେଇଥିଲେ। ଏହି ସ୍ଥାନରେ ସୌନ୍ଦର୍ଯ୍ୟକରଣ, ରହିବା ସ୍ଥଳ, ପ୍ରଦର୍ଶନ ସ୍ଥଳ ଇତ୍ୟାଦିର ବ୍ୟବସ୍ଥା ରହିବ ବୋଲି ପ୍ରକାଶ କରିଥିଲେ। ଗୋପାଳପୁର ଗ୍ରାମରେ ୯୧୯ଟି ପରିବାରର ୧୬୩୭ ଜଣ ବୁଣାକାର ଅଛନ୍ତି। ୫-ଟି ଆଇନ ଜରିଆରେ ଏହି ପ୍ରସ୍ତାବ ରହିଥିବାରୁ ହସ୍ତଶିଳ୍ପ ଓ ବୁଣାକାର ପରିବାରଙ୍କ ମଧ୍ୟରେ ଯୋଜନାର କାର୍ଯ୍ୟକାରିତା ଉପରେ ଉକତ୍ଣ୍ଠା ପ୍ରକାଶ ପାଇଥିଲା। ହେଲେ କିଛିମାସ ପରେ ବୁଣାକାର ପରିବାରଙ୍କ ଉକତ୍ଣ୍ଠା ମଉଳି ଯାଇଛି। ଏ ସଂକ୍ରାନ୍ତରେ ହସ୍ତତନ୍ତ ଓ ବୟନ ଶିଳ୍ପ ନିର୍ଦ୍ଦେଶକ ତାଙ୍କ ପତ୍ରସଂଖ୍ୟା ୨୫୧୨/୧୬ା୩ା୨୦୨୦ରେ ଦର୍ଶାଇଛନ୍ତି ଯେ, ଆନ୍ତର୍ଜାତିକ ମହିଳା ଦିବସ ପାଳନ ଅବସରରେ ସେ ଗୋପାଳପୁର ଯାଇଥିଲେ। ସେଠାରେ ରସୁଲପୁର ବିଡିଓ ଓ ତହସିଲଦାରଙ୍କ ସମେତ ବୟନଶିଳ୍ପ ଉପନିର୍ଦ୍ଦେଶକଙ୍କ ସହିତ ଗୋପାଳପୁର ଗ୍ରାମକୁ ହସ୍ତତନ୍ତ ଶିଳ୍ପ ଗ୍ରାମ ମାନ୍ୟତା ସମ୍ପର୍କରେ ଆଲୋଚନା କରିଥିଲେ। ପ୍ରଥମାଖଣ୍ଡ ଗ୍ରାମ ପଞ୍ଚାୟତ ଅନ୍ତର୍ଗତ ଦାମୋଦରପୁର ମୌଜାରେ ୪ ଏକର ଅଣବ୍ୟବହୃତ ସରକାରୀ ଜମି ରହିଥିବା ରେକର୍ଡରେ ଜଣାପଡିଥିଲା। ତେଣୁ ଉକ୍ତ ଜମିକୁ ତୁରନ୍ତ ଚିହ୍ନଟ କରି ଆବଶ୍ୟକ ପଦକ୍ଷେପ ନେବାକୁ ସେ ଜିଲାପାଳଙ୍କୁ ଅନୁରୋଧ କରିଛନ୍ତି।