ବ୍ରହ୍ମପୁର ଅଫିସ/ଗଞ୍ଜାମ(ଡି.ଏନ୍.ଏ.),୧୩ା୧: ଜୁଲୋଜୀକାଲ ସର୍ଭେ ଅଫ୍ ଇଣ୍ଡିଆ(ଜେଡ୍ଏସ୍ଆଇ)ଓ ବ୍ରହ୍ମପୁର ବନଖଣ୍ଡ ମିଳିତ ଆନୁକୂଲ୍ୟରେ ଅଲିଭ୍ରିଡ୍ଲେଙ୍କୁ ମଙ୍ଗଳବାର ଟ୍ୟାଗିଂ କରିଛି। ଟ୍ୟାଗ୍ଗୁଡିକ ସ୍ବତନ୍ତ୍ର ଭାବରେ ସଂଖ୍ୟାଭୁକ୍ତ ହୋଇଛି ଏବଂ ଏଥିରେ ସବିଶେଷ ତଥ୍ୟ ଅଛି। ଯେପରିକି ସଙ୍ଗଠନର ନାମ, ଇମେଲ୍ ଆଇଡି ଇତ୍ୟାଦି। ମଙ୍ଗଳବାର ବନବିଭାଗ ପକ୍ଷରୁ ମୋଟ ୬ଟି (୨ ଅଣ୍ଡିରା ଏବଂ ୪ ମାଈ) କଇଁଛଙ୍କୁ ଟ୍ୟାଗ ଲଗାଯାଇଥିଲା। ଟ୍ୟାଗ ଲଗାଯାଇଥିବା କଇଁଛଙ୍କ ଗତିବିଧି ଉପରେ ଅନୁସନ୍ଧାନ କରାଯିବ। ସେମାନଙ୍କ ମଣ୍ଡଳୀ, ବସା, ଯାତ୍ରାମାର୍ଗ ଏବଂ ସ୍ଥାନ ଖୋଜିବାରେ ସାହାଯ୍ୟ କରିବ। ଏହି ଟ୍ୟାଗ୍ ହୋଇଥିବା କଇଁଛଙ୍କୁ ଅନ୍ୟ ଦେଶର ବନ ବିଭାଗ ଠାବ କଲେ ସେଥିରେ ଥିବା ଇମେଲ୍ ଆଇଡିରେ ସୂଚନା ଦେବେ। ପ୍ରାୟ ୨୫ବର୍ଷ ବ୍ୟବଧାନ ପରେ ଓଡିଶାରେ ଟ୍ୟାଗିଂ ପ୍ରକ୍ରିୟା କରାଯାଇଛି। ପୂର୍ବରୁ ୧୯୯୪-୯୬ରେ ୮ହଜାର କଇଁଛଙ୍କୁ ଟ୍ୟାଗ୍ କରାଯାଇଥିଲା। ଏଥର ୩୦ ହଜାର କଇଁଛ ଟ୍ୟାଗ୍ କରିବାକୁ ଲକ୍ଷ୍ୟ ରଖାଯାଇଥିବା ବ୍ରହ୍ମପୁର ବନଖଣ୍ଡ ଅଧିକାରୀ ଅମ୍ଳାନ ନାୟକ ସୂଚନା ଦେଇଛନ୍ତି। ଏଥିରେ ଜେଡ୍ଏସ୍ଆଇର ବୈଜ୍ଞାନିକ ଡକ୍ଟର ବାସୁଦେବ ତ୍ରିପାଠୀ ଏବଂ ଡକ୍ଟର ଅନିଲ ମହାପାତ୍ର ସାମିଲ ଥିଲେ।