ରାଜନଗର,୨୫ା୬(ଡି.ଏନ୍.ଏ.)- କେନ୍ଦ୍ରାପଡା ଜିଲା ରାଜନଗର ବ୍ଲକ ଭିତରକନିକା ଜାତୀୟ ଉଦ୍ୟାନ ଅନ୍ତର୍ଗତ ଡାଙ୍ଗମାଳ ବଉଳା କୁମ୍ଭୀର ସଂରକ୍ଷଣ କେନ୍ଦ୍ରରେ ବସବାସ କରୁଥିବା ୪୫ ବର୍ଷୀୟ ଶଙ୍ଖୁଆ ବଉଳା କୁମ୍ଭୀର ‘ଗୋରୀ’ ୨ ଦଶନ୍ଧି ପରେ ପୁନର୍ବାର ଅଣ୍ଡା ଦେଇଛି । ଗତ ୨୨ ତାରିଖରେ ଗୋରୀ ସପ୍ତମ ଥର ପାଇଁ ଅଣ୍ଡାଦାନ କରିଛି। ଅଣ୍ଡା ସଂଖ୍ୟା ଅଦ୍ୟାବଧି ସ୍ପଷ୍ଟ ହୋଇ ନ ଥିବା ବେଳେ ସେଗୁଡିକୁ ସୁରକ୍ଷିତ ରଖିବା ପାଇଁ ଗୋରୀ ବସା ନିକଟରେ ଜଗିବସିଛି। ପୂର୍ବରୁ ସେ ୬ ଥର ଅଣ୍ଡାଦାନ କରିଥିଲେ ମଧ୍ୟ ପୁରୁଷ କୁମ୍ଭୀର ସହ ମିଳନ ହୋଇ ନ ଥିବାରୁ ସେଥିରୁ ଛୁଆ ଫୁଟିବା ପୂର୍ବରୁ ନଷ୍ଟ ହୋଇଯାଇଛି।୨୦୦୭ରେ ୩୧, ୨୦୦୯ରେ ୨୨, ୨୦୧୧ରେ ୧୮, ୨୦୧୩ରେ ୨୨, ୨୦୧୫ରେ ୩୨, ୨୦୧୬ରେ ୨୭ଟି ଅଣ୍ଡା ଦେଇଛି। ଏଥର ଅଣ୍ଡାଗୁଡିକ ନଷ୍ଟ ନ ହେବା ପାଇଁ ବନ ବିଭାଗ ପକ୍ଷରୁ ଯୋଜନା କରାଯାଇଛି। ବନବିଭାଗର କର୍ମଚାରୀମାନେ ଅଣ୍ଡାଗୁଡିକୁ ସଂଗ୍ରହ କରି କୃତ୍ରିମ ଉପାୟରେ ଫୁଟାଇବା ପାଇଁ ପଦକ୍ଷେପ ନେଉଛନ୍ତି।
ସୂଚନାଯୋଗ୍ୟ, ଅଷ୍ଟ୍ରେଲିଆର ପ୍ରାଣୀ ବୈଜ୍ଞାନିକ ଡ. ଏଚ.ଆର ବଷ୍ଟାର୍ଡଙ୍କ ତତ୍ତ୍ୱାବଧାନରେ ଭିତରକନିକାରେ ଅଭୟାରଣ୍ୟର କୁତ୍ରିମ କୁମ୍ଭୀର ପ୍ରଜନନ କେନ୍ଦ୍ରରେ ୧୯୭୫ ମସିହାରେ ପ୍ରଥମ ଥର ପାଇଁ ୨୫ଟି ଅଣ୍ଡା ସଂଗ୍ରହ କରାଯାଇ କୃତ୍ରିମ ଉପାୟରେ ଛୁଆ ଫୁଟାଯାଇଥିଲା। ସେଥିରୁ ମାତ୍ର ୨ଟି ମାଈ କୁମ୍ଭୀର ଛୁଆ ହୋଇଥିଲଶ ବେଳେ ଧଳା ଶଙ୍ଖୁଆ ରଙ୍ଗର ମାଈ କୁମ୍ଭୀର ନାମ ଗୋରୀ ରଖାଯାଇଥିଲା। ୧୯୮୭ରେ ହାଇଦ୍ରାବାଦରୁ ଏକ ଅଣ୍ଡିରା କୁମ୍ଭୀର ଅଣାଯାଇ ଗୋରୀ ସହ ମିଳନ କରାଯାଇଥିଲା। ମାତ୍ର ଗୋରୀର ଆକ୍ରମଣରେ ଅଣ୍ଡିରା କୁମ୍ଭୀରର ମୃତ୍ୟୁ ଘଟିଥିଲା। ଏହାପରେ ୧୯୯୦ରେ କାଣୀ ଓ ୧୯୯୨ରେ ଅଷ୍ଟ୍ରେଲିଆର ଭଏଟର ନାମକ ଅନ୍ୟ ଏକ ଅଣ୍ଡିରା କୁମ୍ଭୀର ଆଣି ଗୋରୀ ସହ ଛଡ଼ା ଯାଇଥିଲା। ମାତ୍ର ଗୋରୀ ଆକ୍ରମଣରେ ସେମାନେ ଆହତ ହୋଇଥିଲେ। ଏବେ ପୁନର୍ବାର ଗୋରୀ ଅଣ୍ଡା ଦେଇଥିବାରୁ ଏଥିରୁ ଛୁଆ ଫୁଟିବ ବୋଲି ବନ ବିଭାଗ ପକ୍ଷରୁ ଆଶାବ୍ୟକ୍ତ କରାଯାଇଛି।