ଏକ ଅନୁଧ୍ୟାନରୁ ଜଣାପଡିଛି ଯେ, ୭୦ ରୁ ୯୦ ପ୍ରତିଶତ ଭାରତୀୟଙ୍କଠାରେ ଭିଟାମିନ୍ ଡି’ଅଭାବ ରହିଛି। ଏହି କାରଣରୁ ସେମାନେ ଟାଇପ୍-୨ ଡାଇବେଟିସ୍ ଓ ଉଚ୍ଚରକ୍ତଚାପର ଶିକାର ହେଉଛନ୍ତି ବୋଲି କହିଛନ୍ତି ଶୁଶ୍ରୂଷା ହସ୍ପିଟାଲ, ମୁମ୍ବାଇର ଚିକିତ୍ସକ ପି.ଜି ତଲଓ୍ବାର । ଏହା ମଧ୍ୟ କିଛି କ୍ରୋନିକ୍ ଡିଜିଜର କାରଣ ବି ହେଉଛି। ଭାରତରେ ୮୦ ପ୍ରତିଶତ ଗର୍ଭବତୀ ମହିଳାଙ୍କଠାରେ ଭିଟାମିନ୍ ଡି’ଅଭାବ ରହୁଛି ଓ ଏହାଯୋଗୁ ସେମାନଙ୍କ ସନ୍ତାନ ଜନ୍ମହେବା ପରେ ଏହି ସମସ୍ୟାର ଶିକାର ହେଉଛନ୍ତି। ବୟସ୍କମାନେ ଭିଟାମିନ୍ ଡି’ ଅଭାବରେ ରହିଲେ ସେମାନଙ୍କ ଅସ୍ଥି ଓ ମାଂସପେଶୀ ମଧ୍ୟ ଦୁର୍ବଳ ହୋଇଯାଏ ବୋଲି କହିଛନ୍ତି ଆବୋଟ୍ ଇଣ୍ଡିଆର ନିର୍ଦ୍ଦେଶକ ଶ୍ରୀରୂପ ଦାସ। ମୁମ୍ବାଇର ୧,୫୦୮ ଜଣଙ୍କୁ ଅନୁଧ୍ୟାନରେ ସାମିଲ କରାଯାଇଥିଲା। ସେମାନଙ୍କ ମଧ୍ୟରୁ ୮୪.୨ ପ୍ରତିଶତ ଡାଇବେଟିସ ଓ ୮୨.୬ ପ୍ରତିଶତ ଉଚ୍ଚରକ୍ତଚାପରେ ପୀଡ଼ିତ ଥିଲେ। ଏହା ସହ ୭୬ ପ୍ରତିଶତ ଥାଇରଏଡ୍ ସମସ୍ୟା ଓ ୮୨ ପ୍ରତିଶତ ମେଦବହୁଳତାର ଶିକାର ହୋଇଥିବା ଲକ୍ଷ୍ୟ କରାଯାଇଥିଲା। ଏହି ସବୁ ସ୍ବାସ୍ଥ୍ୟଗତ ସମସ୍ୟା ଭିଟାମିନ ଡି’ ଅଭାବ ଯୋଗୁ ହେଉଛି ବୋଲି କହିଛନ୍ତି ଡ. ତଲଓ୍ବାର। ଭାରତରେ ଅଧିକାଂଶ ଲୋକ ସୂର୍ଯ୍ୟାଲୋକ ସଂସ୍ପର୍ଶରେ ନଆସିବା ଓ ଅବ୍ୟବସ୍ଥିତ ଜୀବନଶୈଳୀ ଯୋଗୁ ସେମାନେ ଭିଟାମିନ ଡି’ଅଭାବ ସମସ୍ୟାର ସମ୍ମୁଖୀନ ହେଉଛନ୍ତି। ଏହାବାଦ୍ ଅତ୍ୟଧିକ ବାୟୁ ପ୍ରଦୂଷଣ ଯୋଗୁ ମଧ୍ୟ ତ୍ୱଚା ଭିଟାମିନ୍ ଡି ’ଗ୍ରହଣ କରିବାରେ ବାଧା ଉପୁଜୁଛି।