ଭୁବନେଶ୍ୱର,୨୫-୯(ବ୍ୟୁରୋ)ରାଜ୍ୟରେ ଚିହ୍ନଟ କରାଯାଇଥିବା ୯ଟି ରୁର୍ବାନ ଅଞ୍ଚଳ ପାଇଁ ସରକାର ୭୦୦ କୋଟି ଟଙ୍କାର କାର୍ଯ୍ୟ ଯୋଜନାକୁ ଅନୁମୋଦନ ଦେଇଛନ୍ତି। ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟସ୍ତରୀୟ କ୍ଷମତାସମ୍ପନ୍ନ କମିଟି ବୈଠକରେ ଏହି ଅନୁମୋଦନ ମିଳିଛି। ଲୋକସେବା ଭବନଠାରେ ମଙ୍ଗଳବାର ଅନୁଷ୍ଠିତ ବୈଠକରେ ପଞ୍ଚାୟତିରାଜ ଓ ପାନୀୟ ଜଳ ଯୋଗାଣ ବିଭାଗର ପ୍ରମୁଖ ଶାସନ ସଚିବ ଦେଓରଞ୍ଜନ ସିଂ ପ୍ରକଳ୍ପଗୁଡିକର କାର୍ଯ୍ୟାନ୍ବୟନ ନେଇ ତଥ୍ୟ ଉପସ୍ଥାପିତ କରିଛନ୍ତି। ଏଗୁଡିକୁ ଅନୁମୋଦନ ଦେବା ସହିତ ପୂର୍ବରୁ ଆରମ୍ଭ ହୋଇଥିବା ପ୍ରକଳ୍ପ ଗୁଡିକର ଫଳାଫଳ ନେଇ ସମୀକ୍ଷା କରିବାକୁ ତୃତୀୟ ପକ୍ଷକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି। ଏହି କାର୍ଯ୍ୟ ଦାୟିତ୍ୱରେ ଥିବା ବିଡିଓ ଏବଂ ଅନ୍ୟ କ୍ଷେତ୍ରସ୍ତରୀୟ ଅଧିକାରୀଙ୍କୁ ନିୟମିତ ବ୍ୟବଧାନରେ ପ୍ରେରଣା ଦେବା ଲାଗି ତ୍ରିପାଠୀ ନିର୍ଦ୍ଦେଶ ଦେଇଛନ୍ତି। ଅନ୍ୟପଟେ କ୍ଷେତ୍ରସ୍ତରୀୟ ଅଧିକାରୀମାନଙ୍କ ମଧ୍ୟରେ ସମନ୍ବୟ ରକ୍ଷାକରିବା ପାଇଁ ବିଧିବଦ୍ଧ ଆନୁଷ୍ଠାନିକ ବ୍ୟବସ୍ଥା କରିବାକୁ ଅତିରିକ୍ତ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ପରାମର୍ଶ ଦେଇଛନ୍ତି। ବୈଠକରେ ନୂତନ ୮ ଅଞ୍ଚଳକୁ ରୁର୍ବାନ ମିଶନରେ ସାମିଲ କରିବା ଲାଗି ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟକୁ ସୁପାରିସ କରିବା ନେଇ ବୈଠକରେ ନିଷ୍ପତ୍ତି ହୋଇଛି। ମାଲକାନଗିରି ଜିଲାର କାଲିମେଳା, ନୂଆପଡାର କୋମନା, କେନ୍ଦୁଝର ସଦର, ଗଜପତିର ମୋହନା, ପୁରୀ ସଦର, ଯାଜପୁର ଜିଲାର ଦାନଗଦି, ସୁବର୍ଣ୍ଣପୁରର ଉଲୁଣ୍ଡା ଏବଂ ସମ୍ବଲପୁରର ଢାକୁଆଡ ଆଦି ଅଞ୍ଚଳ ଏହାର ଅନ୍ତର୍ଭୁକ୍ତ କରାଯିବ। ବୈଠକରେ ଗଞ୍ଜାମ ଜିଲାର ଦହିତା ଓ କେଶପୁର, ବଲାଙ୍ଗୀର ଜିଲାର ସିବତଳା, କନ୍ଧମାଳର କୋଠଗଡ, ନବରଙ୍ଗପୁରର ମୁର୍ତାମା, ବାଲେଶ୍ୱର ଜିଲାର ରାଇବଣିଆ, ସୁନ୍ଦରଗଡର କାଉରମୁଣ୍ଡା, କୋରାପୁଟର ମରିଚମାଳ ଏବଂ ରାୟଗଡା ଜିଲାର ପୁଟ୍ଟା ସିଂ ଅ଼ଞ୍ଚଳ ପାଇଁ ସମୁଦାୟ ୭୦୦କୋଟି ଟଙ୍କାର କାର୍ଯ୍ୟଯୋଜନା ଅନୁମୋଦିତ ହୋଇଛି। ସରକାରଙ୍କ ପକ୍ଷରୁ ଦିଆଯାଇଥିବା ସୂଚନା ମୁତାବକ, ମିଶନର ପ୍ରଥମ ପର୍ଯ୍ୟାୟରେ ୫ଟି ଅଞ୍ଚଳରେ ପ୍ରକଳ୍ପ କାର୍ଯ୍ୟାନ୍ବୟନ ଆରମ୍ଭ ହୋଇଛି। କଟକ ଜିଲାର ତଳବସନ୍ତ, ଖୋର୍ଦ୍ଧାର ରାଣୀପଡା, ଝାରସୁଗୁଡ଼ାର ସାମସିଂହ, କଳାହାଣ୍ଡିର ଉତ୍କେଳା ଏବଂ ମୟୂରଭଞ୍ଜର ଠାକୁରମୁଣ୍ଡା ରୁର୍ବାନ ଅଞ୍ଚଳ। ୨୦୧୬-୧୭ ମସିହାଠାରୁ ଏହି ୫ ଅଞ୍ଚଳରେ ୪୦୦କୋଟି ଟଙ୍କା ଆକଳନରେ ୫ ବର୍ଷିଆ ଯୋଜନା କାର୍ଯ୍ୟାନ୍ବୟନ କରାଯାଉଛି। ତୃତୀୟ ପକ୍ଷଙ୍କ ଦ୍ୱାରା ଏହି ପ୍ରକଳ୍ପର ମଧ୍ୟବର୍ତ୍ତିକାଳୀନ ଫଳାଫଳ ଆକଳନ ପାଇଁ ଅସୀତ ତ୍ରିପାଠୀ ନିର୍ଦ୍ଦେଶ ଦେଇଛନ୍ତି।