ଜଳେଶ୍ୱର, ୧।୬(ସ୍ବ.ପ୍ର.)-କରୋନା ସଂକ୍ରମଣ ରୋକିବା ଲାଗି ଦେଶବ୍ୟାପୀ ଯାତ୍ରୀବାହୀ ଟ୍ରେନ ଚଳାଚଳ ବନ୍ଦ ରହିଥିଲା। ଦୀର୍ଘ ୭୧ ଦିନ ପରେ ସୋମବାର ପ୍ରଥମ କରି ୦୨୦୭୪ ଡାଉନ୍ ଜନଶତାବ୍ଦୀ ଟ୍ରେନ୍ ପୂର୍ବାହ୍ନ ୧୦ଟାରେ ଭୁବନେଶ୍ୱରରୁ ଆସି ଜଳେଶ୍ୱରରେ ପହଞ୍ଚିଥିଲା। ଏଠାରୁ ୨୩ଜଣ ଯାତ୍ରୀ ୨ନଂ. ପ୍ଲାଟଫର୍ମରୁ ଟ୍ରେନ୍ରେ ଚଢିବା ପୂର୍ବରୁ ସମସ୍ତଙ୍କର ଥର୍ମାଲ ସ୍କ୍ରିନିଂ ଓ ଯାତ୍ରା ସମ୍ପର୍କୀତ ସମସ୍ତ ତଥ୍ୟ ପଞ୍ଜୀକରଣ କରାଯାଇଥିଲା। ସେହିପରି ଟ୍ରେନ୍ରୁ ୧୭ଜଣ ଯାତ୍ରୀ ଓହ୍ଲାଇବା ପରେ ସେମାନଙ୍କୁ ପଞ୍ଜୀକରଣ କରାଯାଇ ସେମାନଙ୍କ ଡାହାଣ ହାତରେ ଅଲିଭା କାଳିରେ ଷ୍ଟାମ୍ପିଂ କରାଯାଇଥିଲା। ୦୨୦୭୩ ଅପ୍୍ ଟ୍ରେନ୍ଟି ନିର୍ଦ୍ଧାରିତ ସମୟର ୧ ଘଣ୍ଟା ବିଳମ୍ବରେ ଜଳେଶ୍ୱର ଷ୍ଟେଶନରେ ଲାଗିଥିଲା। ଏଥିରେ ୨୨ଜଣ ଯାତ୍ରୀ ଚଢିଥିବା ବେଳେ ୫୦ଜଣ ଯାତ୍ରୀ ଟ୍ରେନ୍ରୁ ଓହ୍ଲାଇଥିବା ରେଲଓ୍ବେ ସୂତ୍ରରୁ ପ୍ରକାଶ। ପ୍ରତିଦିନ ଏହି ଟ୍ରେନ୍ ଯାତାୟାତ କରିବାକୁ ଥିବା ବେଳେ ପରୀକ୍ଷା ନିରୀକ୍ଷା, ଥର୍ମାଲ ସ୍କ୍ରିନିଂ ଓ ଷ୍ଟାମ୍ପିଂ ହେବ ବୋଲି ଷ୍ଟେଶନ ସୁପରିଣ୍ଟେଣ୍ଡେଣ୍ଟ ଖଗେନ୍ଦ୍ର ମଣ୍ଡଳ ସୂଚନା ଦେଇଛନ୍ତି। ଟ୍ରେନ୍ ଆସିବା ପୂର୍ବରୁ ସକାଳ ସାଢେ ୭ଟା ବେଳେ ସମସ୍ତ ପ୍ଲାଟଫର୍ମକୁ ସାଇଟାଇଜ୍ କରାଯିବା ପରେ ଯାତ୍ରୀମାନଙ୍କୁ ଷ୍ଟେଶନ ଭିତରକୁ ଯିବାର ଅନୁମତି ଦିଆଯାଇଥିଲା। ଷ୍ଟେଶନର ଉତ୍ତର ଓ ଦକ୍ଷିଣ ପାର୍ଶ୍ୱରେ ପ୍ଲାଟଫର୍ମକୁ ବ୍ୟାରିକେଡ କରାଯାଇ ୱାନ୍ ୱେ ଯାତାୟାତର ବ୍ୟବସ୍ଥା ଆର୍ପିଏଫ ଓ ଜିଆରପି ପକ୍ଷରୁ କରାଯାଇଥିଲା। ଯାତ୍ରୀମାନେ ନିଜ ନିଜ ଘରେ ହୋମ୍ କ୍ୱାରାଣ୍ଟାଇନ୍ରେ ରହିବେ ବୋଲି ପ୍ରଶାସନକୁ ପ୍ରତିଶ୍ରୁତି ଦେଇଛନ୍ତି। ଏହି ସମୟରେ ଜଳେଶ୍ୱର ବିଡିଓ ଦିପ୍ତିରଞ୍ଜନ ସେଠୀ, ମ୍ୟୁନିସିପାଲିଟି କାର୍ଯ୍ୟନିର୍ବାହୀ ଅଧିକାରୀ ଅଜୟ କୁମାର ମହାପାତ୍ର, କମଳଲୋଚନ ପାତ୍ର, ପ୍ରଶାନ୍ତ ପାତ୍ର, ଆର୍ପିଏଫ ଏସ୍ ସରକାର, ଅମିତ୍ କୁମାର, ସତୀଶ କୁମାର, ରାଜୀବ କୁମାର, ଜିଆର୍ପି ଏମ୍ ଭଞ୍ଜ, କେ. ଗଣ୍ଡ, ପ୍ରମୋଦ ଚନ୍ଦ୍ର ପରିଡା ଓ ଡି. ମାଝି ପ୍ରମୁଖ ଉପସ୍ଥିତ ଥିଲେ।