ଲଣ୍ଡନ, ୨ା୬(ଏପି)-କରୋନା ଭାଇରସ୍ ସଂକ୍ରମଣ ଜନିତ ପ୍ରଭାବରୁ ୭୫ ଦିନ ଶଟ୍ଡାଉନ୍ ପରେ ଇଂଲଣ୍ଡକୁ ପ୍ରତିଦ୍ୱନ୍ଦ୍ୱିତାମୂଳକ ପ୍ରତିଯୋଗିତା ଫେରିଛି। ଇଂଲଣ୍ଡ କ୍ରୀଡ଼ା ପ୍ରଶଂସକଙ୍କ ପାଇଁ ଏହା ଅତ୍ୟନ୍ତ ଖୁସିର ମୁହୂର୍ତ୍ତ ଥିଲା। ସୋମବାର ମୋଟ ୩ଟି ପ୍ରତିଯୋଗିତା ହୋଇଥିଲା। ତାହା ହେଲା ଗ୍ରେହାଉଣ୍ଡ ରେସିଂ, ହର୍ସ ରେସିଂ ଏବଂ ସ୍ନୁକର। ସରକାରଙ୍କ କରୋନା ଭାଇରସ୍ ପ୍ରୋଟୋକଲ ଅନୁସାରେ ଏବଂ ବିନା ଦର୍ଶକରେ ସମସ୍ତ ପ୍ରତିଯୋଗିତା ହୋଇଥିଲା। ଶଟ୍ଡାଉନ୍ ପରେ ପ୍ରଥମ ପ୍ରତିଦ୍ୱନ୍ଦ୍ୱିତାମୂଳକ ପ୍ରତିଯୋଗିତା ଗ୍ରେହାଉଣ୍ଡ ରେସିଂରେ ୬ଟି କୁକୁର ଭାଗ ନେଇଥିଲେ। ନ୍ୟୁକାସ୍ଲେ ଗସଫୋର୍ଥ ପାର୍କର ଅଲ୍ଓ୍ବେଦର ଟ୍ରାକ୍ରେ ହର୍ସ ରେସିଂ ପାଇଁ ୩୬୯ ଏଣ୍ଟ୍ରି ହୋଇଥିଲା। ଜକିମାନେ ମାସ୍କ ପରିଧାନ କରିଥିଲେ ଏବଂ ସାମାଜିକ ଦୂରତା ରକ୍ଷା କରାଯାଇଥିଲା। କୋର୍ସ ମଧ୍ୟଙ୍କୁ ଅଳ୍ପକିଛି ବ୍ୟକ୍ତିଙ୍କୁ ଛଡ଼ା ଯାଇଥିଲା। ତେବେ ବୁକ୍ମେକର ଏବଂ ମାଲିକ ମାନଙ୍କୁ ବାହାରେ ରଖା ଯାଇଥିଲା। ଏହାପୂର୍ବରୁ ମାର୍ଚ୍ଚ ୧୭ରେ ବ୍ରିଟେନରେ ଶେଷଥରପାଇଁ ହର୍ସ ରେସିଂ ଅନୁଷ୍ଠିତ ହୋଇଥିଲା। ମିଲ୍ଟନ କେନ୍ସଠାରେ ଅପରାହ୍ନ ୩ଟାରେ ସ୍ନୁକର ପ୍ରତିଯୋଗିତା ଆରମ୍ଭ ହୋଇଥିଲା। ଟପ୍ ର଼୍ୟାଙ୍କ୍ପ୍ରାପ୍ତ ଖେଳାଳି ଜୁଡ୍ ଟ୍ରମ୍ପ ପ୍ରଥମ ମ୍ୟାଚରେ ଭାଗ ନେଇଥିଲେ। ଏହି ପ୍ରତିଯୋଗିତାରେ ମୋଟ ୬୪ ଖେଳାଳି ଅଂଶଗ୍ରହଣ କରିଥିଲେ। ମ୍ୟାଚସ୍ଥଳକୁ ପ୍ରବେଶ କରିବା ପୂର୍ବରୁ ସମସ୍ତ ପ୍ରତିଯୋଗୀଙ୍କର କୋଭିଡ-୧୯ ଟେଷ୍ଟ କରାଯାଇଥିଲା। ପ୍ରିମିୟର ଲିଗ୍ ସହିତ ଜୁନ ୧୭ରେ ଇଂଲଣ୍ଡରେ ଫୁଟବଲ ପ୍ରତିଯୋଗିତା ଆରମ୍ଭ ହେବାକୁ ଧାର୍ଯ୍ୟ କରାଯାଇଛି।