କଟକ ଅଫିସ, ୨୭।୧୦: ରବିବାର ମଧ୍ୟ ରାତ୍ରିରୁ ଆରମ୍ଭ ହେବ କାଳୀପୂଜା। ରାଜ୍ୟର ବିଭିନ୍ନ ସ୍ଥାନରେ ମା’ଙ୍କର ପୂଜାର୍ଚ୍ଚନା ଚାଲିଛି। ଏଥିରୁ ବାଦ ପଡିନି କଟକ ସହର। ଚଳିତବର୍ଷ ସହରର ୭୫ଟି ପୂଜା ମଣ୍ଡପରେ ମା’ଙ୍କର ପୂଜା ହେବାର ଯୋଜନା ରହିଛି। ମା’ଙ୍କ ଦର୍ଶନ ପାଇଁ ଶ୍ରଦ୍ଧାଳୁମାନଙ୍କର ଭିଡ ଜମୁଛି । ମଧ୍ୟରାତ୍ରିରେ ପୂଜା ଆରମ୍ଭ ହୋଇ ରାତ୍ରିରେ ହିଁ ଶେଷ ହୋଇଛି। ସବୁ ପୂଜା ମଣ୍ଡପରେ ୨୮ ଓ ୨୯ ତାରିଖ ଦୁଇଦିନ ଧରି ସାଂସ୍କୃତିକ କାର୍ଯ୍ୟକ୍ରମ କରାଯିବ ସହ ୩୦ ତାରିଖରେ ଭସାଣି ଉତ୍ସବ ଅନୁଷ୍ଠିତ ହେବ। ବିଗତ ବର୍ଷ ଭଳି ବିଦ୍ୟାଧରପୁରରେ ମଧ୍ୟ କାଳୀପୂଜା ଆୟୋଜନ କରାଯାଇଛି । ୩ ଓ ୪ ତାରିଖ ସମସ୍ତ ପୂଜା ମଣ୍ଡପରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବା ସହ ୫ରେ ଭସାଣି ଉତ୍ସବ ହେବ । ୬ ତାରିଖ ଦିନ ୨ଟା ସୁଦ୍ଧା ସମସ୍ତ ମେଢ ବିସର୍ଜିତ ହେବା ପାଇଁ ନିଷ୍ପତ୍ତି ହୋଇଛି। ସମସ୍ତ ପୂଜା କମିଟି ପକ୍ଷରୁ ପଲିଥିନ, ନିଶାମୁକ୍ତ, ଡିଜେ ମୁକ୍ତ ଭସାଣି ଶୋଭାଯାତ୍ରା କରିବା ପାଇଁ ସ୍ଥିର ହୋଇଛି। ସୁରକ୍ଷା ବ୍ୟବସ୍ଥା ପାଇଁ ସନ୍ଧ୍ୟା ସୁଦ୍ଧା ୨୦ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଛନ୍ତି।