ଥିରୁଭାନନ୍ତପୁରମ,୧୮।୬: ଭାରତୀୟ ଦ୍ରୁତ ବୋଲର ଏସ୍. ଶ୍ରୀସନ୍ଥ ପୁଣି ଥରେ କ୍ରିକେଟକୁ ପ୍ରତ୍ୟାବର୍ତ୍ତନ କରିବା ସମ୍ଭାବନା ସୃଷ୍ଟି ହୋଇଛି। ଆସନ୍ତା ସେପ୍ଟେମ୍ବରରେ ତାଙ୍କର ୭ ବର୍ଷୀୟା ବାସନ୍ଦ ଅବଧି ଶେଷ ହେବାକୁ ଯାଉଛି। ଫଳରେ କେରଳ କ୍ରିକେଟ ଆସୋସିଏଶନ (କେସିଏ) ଶ୍ରୀସନ୍ଥଙ୍କୁ ରଣଜୀ ଦଳରେ ସାମିଲ କରିବାକୁ ପ୍ରସ୍ତୁତ୍ ଅଛି ବୋଲି କହିଛି। ତେବେ ଏଥିପାଇଁ ଫିଟ୍ନେସ୍ର ପ୍ରମାଣ ଦେବାକୁ ହେବ ବୋଲି ଆସୋସିଏଶନ ତରଫରୁ କୁହାଯାଇଛି। ତାଙ୍କୁ ଫିଟ୍ନେସ୍ ଟେଷ୍ଟରେ ଉତୀର୍ଣ୍ଣ ହେବାକୁ ପଡିବ ବୋଲି କେରଳ କୋଚ୍ ତଥା ପୂର୍ବତନ ଭାରତୀୟ ବୋଲର ଟିନୁ ୟୋହାନନ୍ କହିଛନ୍ତି।
ଯଦି ଏହା ହୁଏ ତେବେ ଶ୍ରୀସନ୍ଥ ୨୦୧୩ ପରେ ପ୍ରଥମଥର ପାଇଁ ପ୍ରଥମଶ୍ରେଣୀ କ୍ରିକେଟ ଖେଳିବାର ସୁଯୋଗ ହାସଲ କରିବେ। ୨୦୧୩ ମେ’ରେ ଦିଲ୍ଲୀ ପୋଲିସ ଶ୍ରୀସନ୍ଥଙ୍କ ସମେତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଦଳ ରାଜସ୍ଥାନ ରୟାଲ୍ସର ଅନ୍ୟ ଦୁଇଜଣ ସାଥୀ ଖେଳାଳି ଅଜିତ୍ ଚାଣ୍ଡିଲା ଓ ଅଙ୍କିତା ଚାଭନଙ୍କୁ ଗିରଫ କରିଥିଲା। ଆଇପିଏଲ୍ରେ ସ୍ପଟ୍ ଫିକ୍ସିଂ ଅଭିଯୋଗରେ ଏମାନଙ୍କୁ ଗିରଫ କରାଯାଇଥିଲା। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଏହି ୩ ଖେଳାଳିଙ୍କୁ ଆଜୀବନ ବାସନ୍ଦ କରିଥିଲା। ଏହା ବିରୋଧରେ ଶ୍ରୀସନ୍ଥ ଏକ ଲମ୍ବା ଆଇନ୍ଗତ ଲଢେଇ କରିଥିଲେ ଓ ୨୦୧୫ରେ ତାଙ୍କୁ ଦିଲ୍ଲୀର ଏକ ସ୍ବତନ୍ତ୍ର କୋର୍ଟ ସବୁ ପ୍ରକାର ଅଭିଯୋଗରୁ ମୁକ୍ତ କରିଥିଲେ। ୨୦୧୮ରେ ମଧ୍ୟ କେରଳ ହାଇକୋର୍ଟ ମଧ୍ୟ ବୋର୍ଡର ଏହି ବାସନ୍ଦାଦେଶକୁ ପ୍ରତ୍ୟାହାର କରିନେଇଥିଲା। ଏହାପରେ ଶ୍ରୀସନ୍ଥ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ୨୦୧୯ରେ ସୁପ୍ରିମକୋର୍ଟ ପୁଣି ଥରେ ବାସନ୍ଦାଦେଶକୁ ଜାରି ରଖିଥିଲେ। କିନ୍ତୁ ବିସିସିଆଇକୁ ଦଣ୍ଡାଦେଶ କମ୍ କରିବାକୁ କହିଥିଲେ। ଫଳରେ ବିସିସିଆଇ ଆଜୀବନ ବାସନ୍ଦ ବଦଳରେ ୭ବର୍ଷ ପାଇଁ ତାଙ୍କୁ ବାସନ୍ଦ କରିଥିଲା। ଏବେ ଏହି ବାସନ୍ଦ ଅବଧି ଆସନ୍ତା ସେପ୍ଟେମ୍ବରରେ ଶେଷ ହେବାକୁ ଯାଉଛି।
କେସିଏର ନିଷ୍ପତ୍ତିରେ ଶ୍ରୀସନ୍ଥ ଖୁସି ଜାହିର କରିଛନ୍ତି। ସୁଯୋଗ ଦେଇଥିବାରୁ କେସିଏ ନିକଟରେ ରୁଣୀ। ଏବେ ଫିଟ୍ନେସ ପ୍ରମାଣ କରି କ୍ରିକେଟକୁ ଜୋରଦାର ପ୍ରତ୍ୟାବର୍ତ୍ତନ କରିବି। ଏବେ ସବୁ ବିବାଦକୁ ପଛରେ ପକାଇବାର ସମୟ ଆସି ଉପନୀତ ହୋଇଛି ବୋଲି ସେ କହିଛନ୍ତି। ଶ୍ରୀସନ୍ତଙ୍କ ପ୍ରତ୍ୟାବର୍ତ୍ତନରେ କେରଳ ରଣଜୀ ଦଳ ଆହୁରି ଶକ୍ତିଶାଳୀ ହୋଇପାରିବ ବୋଲି କେସିଏ ଅଧ୍ୟକ୍ଷ ସାଜନ କେ ଭର୍ଗୀଜ୍ କହିଛନ୍ତି। କୋଚିରେ ରହୁଥିବା ବର୍ଷୀୟ ଶ୍ରୀସନ୍ଥ ଏପର୍ଯ୍ୟନ୍ତ ୨୭ ଟେଷ୍ଟ, ୫୩ ଦିନିକିଆ ଓ ୧୦ଟି ଟି୨୦ ମ୍ୟାଚ୍ ଖେଳି ଯଥାକ୍ରମେ ୮୭, ୭୫ ଓ ୭ଟି ଉଇକେଟ ହାସଲ କରିଛନ୍ତି।