ଜଗତ୍ସିଂହପୁର ଅଫିସ, ୮ା୧୨: ଜଗତ୍ସିଂହପୁର ସହରରେ ବ୍ରାଉନ ସୁଗାର ରାକେଟ୍ ସକ୍ରିୟ ରହିଛି। ଅତୀତରେ ପୃଥକ୍ ସ୍ଥାନରେ ଚଢାଉ ହୋଇଥିଲେ ସୁଦ୍ଧା ଆଶାଜନକ ସଫଳତା ମିଳିପାରି ନ ଥିଲା। ମାତ୍ର ଶନିବାର ଜଣେ ବ୍ୟକ୍ତିଙ୍କଠାରୁ ୭୫ ଗ୍ରାମ ବ୍ରାଉନ ସୁଗାର ଜବତ ହୋଇଛି। ଯାହାର ଆନୁମାନିକ ମୂଲ୍ୟ ୭.୫ ଲକ୍ଷ ଟଙ୍କା ବୋଲି କୁହାଯାଉଛି। ଏହି ଘଟଣାରେ ସ୍ଥାନୀୟ ମାର୍କଣ୍ଡପୁରର ଦୀପକ କୁମାର ଦାସ ଗିରଫ ହୋଇଥିବା ବେଳେ ଆଉ ଜଣେ ଖସି ଯାଇଛନ୍ତି। ଦୀପକଙ୍କଠାରୁ ୧୨ ହଜାର ଟଙ୍କା ଜବତ ହୋଇଥିବା ଜଗତ୍ସିଂହପୁର ଅବକାରୀ ଇନ୍ସପେକ୍ଟର ପ୍ରତାପ ଦାସ ସୂଚନା ଦେଇଛନ୍ତି। ସେ କହିଛନ୍ତି, କଟକ ଅବକାରୀ ଗୁଇନ୍ଦା ୟୁନିଟ୍-୨ ଓ ଜଗତ୍ସିଂହପୁର ଅବକାରୀ ବିଭାଗ ପକ୍ଷରୁ ଶନିବାର ପୂର୍ବାହ୍ନରେ ଦୀପକଙ୍କ ଘରେ ଚଢାଉ କରାଯାଇଥିଲା। ଏହି ସମୟରେ ତାଙ୍କଠାରୁ ୭୫ ଗ୍ରାମ ବ୍ରାଉନ ସୁଗାର ସହ ଟଙ୍କା ଜବତ କରାଯାଇଥିଲା। ଚଢାଉରେ ଗୁଇନ୍ଦା ଇନ୍ସପେକ୍ଟର ଜଗଦୀଶ ସାମଲ, ଗାଲୁରାମ ସୋରେନ ପ୍ରମୁଖ ସାମିଲ ଥିଲେ।
ସୂଚନାଯୋଗ୍ୟ, କିଛି ମାସ ପୂର୍ବରୁ ସ୍ଥାନୀୟ ଖେରାସରେ ରହୁଥିବା ଜଣେ ଯୁବକ କାଳୀ ଛକ ନିକଟରେ ବ୍ରାଉନ ସୁଗାର କାରବାର ସମୟରେ ଗିରଫ ହୋଇଥିଲେ। ଏହା ପୂର୍ବରୁ ପୋଲିସ ମଧ୍ୟ ସ୍ଥାନୀୟ ଗୋପାଳସାଗର ଅଞ୍ଚଳରୁ ଜଣଙ୍କୁ ଗିରଫ କରିଥିଲା। ପାରାଦୀପ ଷଣ୍ଢକୁଦ ଅଞ୍ଚଳରୁ ୩୬ ଗ୍ରାମର ବ୍ରାଉନ ସୁଗାର ଜବତ ସହ ଜଣେ ଗିରଫ ହୋଇଥିଲେ। କିନ୍ତୁ ବ୍ରାଉନ ସୁଗାର କାରବାରର ମାଷ୍ଟର ମାଇଣ୍ଡକୁ ଏ ପର୍ଯ୍ୟନ୍ତ ଗିରଫ କରାଯିବାରେ ପୋଲିସ କି ଅବକାରୀ ବିଭାଗ ସଫଳ ହୋଇନାହିଁ। କଟକ ଅଞ୍ଚଳରୁ ଏହା ଜଗତ୍ସିଂହପୁର ସମେତ ଜିଲାର ନାଉଗାଁ, ବାଲିକୁଦା, ବିରିଡ଼ି, ପାରାଦୀପ, କୁଜଙ୍ଗ, ତିର୍ତ୍ତୋଲ, ରଘୁନାଥପୁର ଓ ଏରସମା ଆଦି ଅଞ୍ଚଳକୁ ଯାଉଛି। ରାକେଟ୍ରେ ଏକାଧିକ ଲୋକ ସମ୍ପୃକ୍ତ ଅଛନ୍ତି। ଦେଖିବାକୁ ଅପେକ୍ଷା ପୋଲିସ ଓ ଅବକାରୀ ବିଭାଗ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହେଉଛି କି ନାହିଁ।
