ଅନୁଗୋଳ ଅଫିସ, ୨୩।୧ – ଅଷ୍ଟମ ଜିଲା ମହୋତ୍ସବ ପାଇଁ ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ଏଥିପାଇଁ ମଶାଲ ଶୋଭାଯାତ୍ରା ଚଳିତ ମାସ ୩୦ ତାରିଖରେ ଅନୁଷ୍ଠିତ ହେବ। ଏହି ଶୋଭାଯାତ୍ରାର ସୁପରିଚାଳନା ପାଇଁ ବୁଧବାର ଏକ ପ୍ରସ୍ତୁତି ବୈଠକ ଅତିରିକ୍ତ ଜିଲାପାଳ ତପନ କୁମାର ଶତପଥୀଙ୍କ ଅଧ୍ୟକ୍ଷତାରେ ଜିଲା ଗ୍ରାମ୍ୟ ଉନ୍ନୟନ ସଭାଗୃହ ଠାରେ ଅନୁଷ୍ଠିତ ହୋଇଯାଇଛି। ଜିଲାରେ ୩ଟି ପ୍ରସିଦ୍ଧ ଶୈବକ୍ଷେତ୍ର ପାଲଲହଡ଼ାର ଖୁଲୁଡ଼ି, ଆଠମଲ୍ଲିକର ଦେଉଳଝରି ଓ ଅନୁଗୋଳ ସାତକୋଶିଆ ମନ୍ଦିରରୁ ପୂଜାର୍ଚ୍ଚନା କରାଯାଇ ତାଳଚେରର ମା’ ହିଙ୍ଗୁଳା ପୀଠରେ ୩ଟି ମଶାଲ ଏକାଠି ହେବ। ସେଠାରେ ପୂଜାର୍ଚ୍ଚନା ପରେ ଉକ୍ତ ମଶାଲ ଶୈଳଶ୍ରୀକ୍ଷେତ୍ର ଜଗନ୍ନାଥ ମନ୍ଦିରରେ ଜିଲା ମହୋତ୍ସବ ପର୍ଯ୍ୟନ୍ତ ରଖାଯିବ।
ଫେବୃୟାରୀ ୭ରେ ମହୋତ୍ସବର ଉଦ୍ଘାଟନ ଦିବସରେ ଏହି ମଶାଲ ଶୋଭାଯାତ୍ରା ସହର ପରିକ୍ରମା କରି ଅନୁଗୋଳ ଷ୍ଟାଡିୟମ ଠାରେ ୯ ତାରିଖ ପର୍ଯ୍ୟନ୍ତ ରଖାଯିବ। ଚଳିତ ବର୍ଷ ମହୋତ୍ସବର ବାର୍ତ୍ତା ଜଳ ସଂରକ୍ଷଣ ସହ ବିଭିନ୍ନ ବିଭାଗର କାର୍ଯ୍ୟାବଳୀକୁ ନେଇ ୩ଟି ସ୍ଥାନରୁ ସଚେତନତା ରଥ ବାହାରିବ। ସାତକୋଶିଆରୁ ବାହାରୁଥିବା ମଶାଲର ଦାୟିତ୍ୱ ଜିଲାପାଳ ମନୋଜ କୁମାର ମହାନ୍ତି ନେଉଥିବାବେଳେ ଆଠମଲ୍ଲିକ ଓ ପାଲଲହଡ଼ାରୁ ବାହାରୁଥିବା ମଶାଲର ଦାୟିତ୍ୱ ଯଥାକ୍ରମେ ଅତିରିକ୍ତ ଜିଲାପାଳ ତପନ କୁମାର ଶତପଥୀ ଓ ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଅତୁଲ୍ୟ କୁମାର ଚମ୍ପତିରାୟଙ୍କୁ ଦିଆଯାଇଛି। ସବୁ ବର୍ଗର ଲୋକମାନେ କିପରି ଅଧିକ ସଂଖ୍ୟାରେ ଯୋଗ ଦେଇପାରିବେ ସେଥିପାଇଁ ବିଭାଗୀୟ ଅଧିକାରୀମାନେ ବିଶେଷ ଯତ୍ନବାନ ହେବାକୁ ଅତିରିକ୍ତ ଜିଲାପାଳ ପରାମର୍ଶ ଦେଇଥିଲେ। ମଶାଲ ଶୋଭାଯାତ୍ରା ପରେ ସମସ୍ତ ୮ ବ୍ଲକ ଓ ୩ ପୌର ପରିଷଦରେ ଏକ ମହୋତ୍ସବ କରି ଗୋଟିଏ ଲେଖାଏ ଶ୍ରେଷ୍ଠ ଲୋକନୃତ୍ୟ ଦଳକୁ ମୁଖ୍ୟ ଉତ୍ସବରେ ଅଂଶଗ୍ରହଣ କରିବାକୁ ସୁଯୋଗ ଦିଆଯିବ। ମହୋତ୍ସବର ସଫଳ ଆୟୋଜନ ପାଇଁ ସମସ୍ତ ଗୋଷ୍ଠୀ ଉନ୍ନୟନ ଅଧିକାରୀମାନେ ଆନୁଷଙ୍ଗିକ ବ୍ୟବସ୍ଥା କରିବାକୁ ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ପରାମର୍ଶ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଶରତ ଚନ୍ଦ୍ର ସେଠୀ, ଅନୁଗୋଳ ତହସିଲଦାର ନେହେରୁ ମାଝି, ଅନୁଗୋଳ ଗୋଷ୍ଠୀ ଉନ୍ନୟନ ଅଧିକାରୀ ମାୟାଧର ବେହେରା, ଆସିଷ୍ଟାଣ୍ଟ କଲେକ୍ଟର ସୋଫି ସାଇନିକା, ଶୈଳଶ୍ରୀକ୍ଷେତ୍ର ଜଗନ୍ନାଥ ମନ୍ଦିର ପରିଚାଳନା କମିଟି ଉପସଭାପତି ଭବାନୀ ମିଶ୍ର, କଳାକାରର ସଭାପତି ଭୂପେଶ ଚନ୍ଦ୍ର ପ୍ରଧାନ, ନୃତ୍ୟ ନିଳୟର ସ୍ବପ୍ନାରାଣୀ ସିହ୍ନା, ଜିଲା ସଂସ୍କୃତି ପରିଷଦର ସଦସ୍ୟ ଧରଣୀଧର ନାଥ ଓ କଳାକାରର ସଦସ୍ୟ ରଞ୍ଜନ ବେହେରାଙ୍କ ସମେତ ବିଭିନ୍ନ ବ୍ଲକର ଗୋଷ୍ଠୀ ଉନ୍ନୟନ ଅଧିକାରୀ, ସିଡିପିଓ ଓ ପୌର ପରିଷଦର କର୍ମକର୍ତ୍ତାମାନେ ଯୋଗଦେଇଥିଲେ। ଚଳିତ ମାସରେ ଜିଲା ସଂସ୍କୃତି ପରିଷଦର ସାଧାରଣ ପରିଷଦ ବୈଠକ ଅନୁଷ୍ଠିତ ହୋଇ ଚୂଡ଼ାନ୍ତ କାର୍ଯ୍ୟସୂଚୀ ସ୍ଥିର କରାଯିବ ବୋଲି ଅତିରିକ୍ତ ଜିଲାପାଳ ପ୍ରକାଶ କରିଛନ୍ତି। ଅନୁଗୋଳ ଉପଜିଲାପାଳ ବାସୁଦେବ ଶତପଥୀ ଧନ୍ୟବାଦ ଦେଇଥିଲେ।