ଭୁବନେଶ୍ୱର,୭ା୧(ବ୍ୟୁରୋ): ଓଡ଼ିଶା ଏମ୍ଏସ୍ଏମ୍ଇ ଇଣ୍ଟରନ୍ୟାଶନାଲ ଟ୍ରେଡ୍ ଫେୟାର-୨୦୨୦ ଜାନୁୟାରୀ ୮ରୁ ୧୨ ତାରିଖ ପର୍ଯ୍ୟନ୍ତ ୟୁନିଟ୍-୩ସ୍ଥିତ ଇଡ୍କୋ ପ୍ରଦର୍ଶନୀ ପଡ଼ିଆଠାରେ ଅନୁଷ୍ଠିତ ହେବ। ରାଜ୍ୟ ସରକାରଙ୍କ ଏମ୍ଏସ୍ଏମ୍ଇ ବିଭାଗ ଦ୍ୱାରା ଆୟୋଜିତ ହେବାକୁ ଥିବା ଏହି ମେଳାର ଥିମ୍ ଚଳିତବର୍ଷ ‘ଫୋକସ୍ ଏମ୍ଏସ୍ଏମ୍ଇ ୨୦୨୦’ ରହିବ। ଶିଳ୍ପ ନିର୍ଦ୍ଦେଶାଳୟ, ରପ୍ତାନୀ, ପ୍ରସାର ଓ ବିପଣନ ନିର୍ଦ୍ଦେଶାଳୟ ଏବଂ ଓଡ଼ିଶା କ୍ଷୁଦ୍ର ଶିଳ୍ପ ନିଗମ (ଓଏସ୍ଆଇସି) ମେଳା ଆୟୋଜନରେ ସହଯୋଗ କରିବେ। ୮ ତାରିଖ ସନ୍ଧ୍ୟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମେଳାକୁ ସର୍ବସାଧାରଣଙ୍କ ଉଦ୍ଦେଶ୍ୟରେ ଉଦ୍ଘାଟନ କରିବେ ବୋଲି ସୋମବାର ଆୟୋଜିତ ଖବରଦାତା ସମ୍ମିଳନୀରେ ଏମ୍ଏସ୍ଏମ୍ଇ ମନ୍ତ୍ରୀ କ୍ୟାପ୍ଟେନ୍ ଦିବ୍ୟଶଙ୍କର ମିଶ୍ର ସୂଚନା ଦେଇଛନ୍ତି।
ଏହି ଅନ୍ତର୍ଜାତୀୟ ବାଣିଜ୍ୟ ମେଳାରେ କ୍ରେତା-ବିକ୍ରେତା ସମ୍ମିଳନୀ, ପ୍ରଯୁକ୍ତିବିଦ୍ୟା ପ୍ରଦର୍ଶନ, ଷ୍ଟାର୍ଟଅପ୍, ଇନୋଭେଶନ, ବିଶ୍ୱ ବାଣିଜ୍ୟ କେନ୍ଦ୍ର ମାଧ୍ୟମରେ ମହିଳା ଉଦ୍ୟୋଗୀଙ୍କ ପାଇଁ ନୂଆ ବଜାର ସୁଯୋଗ, ସେକ୍ଟରାଲ ସେମିନାର, ଇରାନ୍ ଓ ବାଲାଂଦେଶରୁ ଆସିବାକୁ ଥିବା ପ୍ରତିନିଧିଙ୍କ ସହ ବିଜନେସ୍ ନେଟ୍ଓ୍ବାର୍କିଂ ଉପରେ ଗୁରୁତ୍ୱ ଦିଆଯିବ। ଏହି ଅବସରରେ ରାଜ୍ୟର ଏମ୍ଏସ୍ଏମ୍ଇଗୁଡ଼ିକ ନିଜର ଉତ୍ପାଦ ପ୍ରଦର୍ଶନ କରିବା ସହ ରାଜ୍ୟ ଏବଂ ରାଜ୍ୟ ବାହାରୁ ଆସିବାକୁ ଥିବା ପ୍ରତିନିଧି ଓ କ୍ରେତାମାନଙ୍କ ସହ ବିଟୁବି, ବିଟୁସି ଓ ବିଟୁଜି ବୈଠକରେ ରହିଥିବା ବ୍ୟବସାୟ ସୁଯୋଗ ସମ୍ପର୍କରେ ଆଲୋଚନା କରିପାରିବେ। ୫ ଦିନିଆ ଏହି ବାଣିଜ୍ୟ ମେଳାରେ ବିଭିନ୍ନ ପ୍ରକାର କର୍ମଶାଳା ସହ ଭିନ୍ନ ଭିନ୍ନ ବିଷୟବସ୍ତୁ ଉପରେ ସେମିନାର୍ ଆୟୋଜନ କରାଯିବ। ସେହିଭଳି ପ୍ରତି ସନ୍ଧ୍ୟାରେ ମେଳା ମଞ୍ଚରେ ଓଡ଼ିଶାର ଖ୍ୟାତନାମା କଳାକାରଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ। ୧୫ ଷ୍ଟଲ୍କୁ ନେଇ ହେବାକୁ ଥିବା ଫୁଡ୍କୋର୍ଟରେ ଦର୍ଶକମାନେ ଓଡ଼ିଶା ସହ ବିଭିନ୍ନ ରାଜ୍ୟର ସୁସ୍ବାଦୁ ଖାଦ୍ୟ ଖାଇପାରିବେ। ଚଳିତବର୍ଷ ଏହି ମେଳାକୁ ପ୍ରାୟ ୩ ଲକ୍ଷ ଲୋକ ଆସିବେ ବୋଲି ବିଭାଗ ଆକଳନ କରିଛି। ମୋଟ ୪ ବିଭାଗରେ ୭୦ ଲେଖାଁଏ ମୋଟ ୨୮୦ ଷ୍ଟଲ୍ ଖୋଲିବ, ଯେଉଁଥିରେ ରାଜ୍ୟର ଏମ୍ଏସ୍ଏମ୍ଇ ଉତ୍ପାଦଗୁଡ଼ିକୁ ପ୍ରଦର୍ଶନ କରାଯିବ। ଏହାବ୍ୟତୀତ ୩୨ ଷ୍ଟଲ୍ରେ ଆଗାମୀ ପିଢ଼ିର ଉଦ୍ୟୋଗୀମାନଙ୍କ ପାଇଁ ସ୍ବତନ୍ତ୍ର ଭାବେ ଟେକ୍ନୋଲୋଜି ଡେମୋନଷ୍ଟ୍ରେଶନ କରାଯିବ। ଏହି ମେଳା ଅଣ-ଶିଳ୍ପ ରାଜ୍ୟଗୁଡ଼ିକରୁ ଆସିଥିବା ଉଦ୍ୟୋଗୀମାନଙ୍କୁ ନିଜ ଉତ୍ପାଦକୁ ଅନ୍ତର୍ଜାତୀୟସ୍ତରୀୟ ଦର୍ଶକଙ୍କ ଆଗରେ ପ୍ରଦର୍ଶନ କରିବାକୁ ପ୍ଲାଟଫର୍ମ ପ୍ରଦାନ କରିବ। କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ବିଭାଗ ଅଧୀନ ସଂସ୍ଥାଗୁଡ଼ିକୁ ୨୮ ଷ୍ଟଲ୍ ପ୍ରଦାନ କରାଯିବ।