କଥାରେ ଅଛି ପ୍ରେମ କି ଜାଣେ ଜାତି ଅଜାତି ପ୍ରେମ କି ଜାଣେ ବାଧାବିଘ୍ନ। ଯେତେ ବଡ଼ ବିପଦ ଆସୁନା କାହିଁକି ସଚ୍ଚୋଟ ପ୍ରେମ ଆଗରେ ସବୁ ହାର ମାନିଥାଏ। ଏହାରି ଭିତରେ କରୋନା ଭାଇରସ୍କୁ ମଧ୍ୟ ହରାଇଦେଇଛି ପ୍ରେମ। ଏହି କାହାଣୀ ହେଉଛି ଚାଇନା ହାଙ୍ଗଝଉ ସହରରେ ରହୁଥିବା ଜଣେ ବୃଦ୍ଧ ଦମ୍ପତିଙ୍କର। ଉକ୍ତ ସହରରେ ୯୦ ବର୍ଷୀୟ ମିଷ୍ଟର ସନ୍ ତାଙ୍କ ୮୪ ବର୍ଷୀୟ ପତ୍ନୀ ହୁଆଙ୍ଗ୍ ଗୁଓକିଙ୍କ ସମେତ ପରିବାର ଲୋକ ବସବାସ କରନ୍ତି। ଗତ ଏକ ବର୍ଷରୁ ମିଷ୍ଟର ସନ୍ଙ୍କୁ ନିଶ୍ୱାସ ନେବାରେ ସମସ୍ୟା ଓ ଡିମୋଶିଆ ରୋଗରେ ପୀଡିତ ହେବାରୁ ହାଙ୍ଗଝାଉର ଏକ ହସ୍ପିଟାଲରେ ଭର୍ତ୍ତି ହୋଇ ସେ ଚିକିତ୍ସିତ ହେଉଛନ୍ତି। ମିଷ୍ଟର ସନ୍ ହସ୍ପିଟାଲରେ ଭର୍ତ୍ତି ହେବା ପରେ ପତ୍ନୀ ହୁଆଙ୍ଗ ପ୍ରତିଦିନ ତାଙ୍କୁ ଦ୍ୱିପ୍ରହର ୨ଟାରେ କିଓ୍ବି ଫଳ ନେଇ ଭେଟିବାକୁ ଯାଇଥାନ୍ତି।
ବୃଦ୍ଧ ଦମ୍ପତିିଙ୍କ ଏଭଳି ପ୍ରେମକୁ ଦେଖି ହସ୍ପିଟାଲର ସବୁ ଷ୍ଟାଫ୍ ତାଙ୍କୁ ‘ଦାଦି ହୁଆଙ୍ଗ’ ଓ ‘ଦାଦା ସନ୍’ ବୋଲି କହି ଡାକିଥାନ୍ତି। କିନ୍ତୁ କିଛି ମାସ ପୂର୍ବରୁ କରୋନା ଭାଇରସ୍ ସଂକ୍ରମଣ ବ୍ୟାପିବାରୁ ଉକ୍ତ ସହରରେ ଲକ୍ଡାଉନ୍ ଜାରି କରାଯାଇଥିଲା। ଲକ୍ଡାଉନ୍ ଯୋଗୁ ଲୋକଙ୍କ ଘରୁ ବାହାରିବା ବନ୍ଦ ହୋଇଯାଇଥିବା ବେଳେ ହସ୍ପିଟାଲର ଆଇସିୟୁରେ ମଧ୍ୟ ଭିଜିଟର୍ସଙ୍କ ଯିବାଆସିବା ବନ୍ଦ ହୋଇଗଲା। ସେହି ସମୟରେ ହୁଆଙ୍ଗ୍ କିଭଳି ତାଙ୍କ ସ୍ବାମୀଙ୍କୁ ଭେଟିବେ ସେନେଇ ତାଙ୍କୁ ଭାଳେଣି ପଡ଼ିଯାଇଥିଲା। ହେଲେ ଲକ୍ଡାଉନ୍ ବି ପ୍ରେମ ଆଗରେ ହାର ମାନିଥିଲା। ଏହି ସମୟରେ ବି ଦାଦି ହୁଆଙ୍ଗ ପ୍ରତିଦିନ ଦ୍ୱିପ୍ରହର ୨ଟାରେ ମିଷ୍ଟର ସନ୍ଙ୍କ ପସନ୍ଦର ଫଳ ସହ ହାତରେ ଗୋଟିଏ ଚିଠି ନେଇ ସାଙ୍ଗରେ ହସ୍ପିଟାଲକୁ ଯାଉଥିଲେ। ଫଳ ଓ ପ୍ରେମପତ୍ରକୁ ଆଇସିୟୁ ବାହାରେ କୌଣସି ଷ୍ଟାଫ୍ଙ୍କୁ ଦେଇ ଚାଲିଯାଇଥାନ୍ତି।
ଏହି ଘଡିସନ୍ଧି ମୁହୂର୍ତ୍ତରେ ରୋଗ ସହ ଲଢ଼େଇ କରିବା ପାଇଁ ତୁମକୁ ଦୃଢ଼ ହେବାକୁ ପଡ଼ିବ। ଘରେ ସମସ୍ତେ ଭଲ ଅଛନ୍ତି ଏବଂ ଡାକ୍ତର ଓ ନର୍ସଙ୍କ କଥା ମାନି ଚଳିବ ବୋଲି ହୁଆଙ୍ଗ ସେହି ୪୫ଟି ଚିଠିରେ ଲେଖିଥିଲେ। ମିଷ୍ଟର ସନ୍ ମଧ୍ୟ ପତ୍ନୀଙ୍କ ସେହି ସବୁ ଚିଠିକୁ ଶ୍ରଦ୍ଧାରେ ପଢ଼ିଥାନ୍ତି। ତେବେ ଗତ ଗୁରୁବାର ସହରରୁ ଲକ୍ଡାଉନ୍ ହଟିବା ପରେ ଦାଦି ହୁଆଙ୍ଗ ହସ୍ପିଟାଲରେ ପହଞ୍ଚି ସ୍ବାମୀଙ୍କୁ ଭେଟି କିଓ୍ବି ଫଳ ଖୁଆଇଥିବା ଜଣାପଡ଼ିଛି। ବର୍ତ୍ତମାନେ ସମୟରେ ସାମାନ୍ୟ ମନମାଳିନ୍ୟ ପାଇଁ ଯେଉଁଠାରେ ଦମ୍ପତିଙ୍କ ସମ୍ପର୍କ ଭାଙ୍ଗିଯାଉଛି ସେଠାରେ ଦାଦି ହୁଆଙ୍ଗ ଓ ଦାଦା ସନ୍ଙ୍କ ପ୍ରେମ ସମସ୍ତଙ୍କ ପାଇଁ ଏକ ପ୍ରେରଣାଦାୟକ ସାଜିଛି।