ନବରଙ୍ଗପୁର,୨୪ା୬(ବି.ପ୍ର)- ପୋଲିସକୁ ଚକମା ଦେବା ପାଇଁ ଗଞ୍ଜେଇ ଚାଲାଣ କାରୀ ଏକ ଅଭିନବ ଉପାୟ ବାଛି ନେଇଥିଲେ। ପରିବା ବୋଝେଇ ଗାଡିରେ ଗଞ୍ଜେଇ ଚାଲାଣ କରୁଥିଲେ। ଏ ସମ୍ପର୍କରେ ଖବର ପାଇ ନବରଙ୍ଗପୁର ପୋଲିସ ଚଢାଉ କରି ଏକ ନମ୍ବର ବିହିନ ୪ ଚକିଆ ଗାଡିରୁ ଗଞ୍ଜେଇ ଜବତ କରିବା ସହ ଚାଲାଣକାରୀ ଦୁଇ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ ଛତିଶଗଡ ରାୟପୁର ଜିଲା ରାମଭାଟା ଗାଁର ଓମ ପ୍ରକାଶ ଚୌହାନ ଓ ଲକ୍ଷ୍ମଣ ଚୌହାନ । ଗଞ୍ଜେଇ ପ୍ୟାକେଟ କରି ଏକ ଜରି ଅଖା ବସ୍ତାରେ ରଖାଯାଇଥିଲା। ତାହା ଉପରେ ପଲିଥିନ ଆଚ୍ଛାଦିତ କରି ପରିବା ପୋଟଳ ବୋଝେଇ କରାଯାଇଥିଲା। ପୋଲିସ କୌଣସି ସୂତ୍ରରୁ ଖବର ପାଇ ତ୍ରିବେଣୀ ଛକରୁ ଗାଡିକୁ ଠାବ କରି ପିଛା କରିଥିଲା । ସହରର ଶେଷ ମୁଣ୍ଡ ମାଝିଗୁଡା ଛକ ନିକଟରେ ଗାଡି ସହ ଗଞ୍ଜେଇ ଜବତ କରି ୨ ଜଣଙ୍କୁ ଗିରଫ କରାଯାଇଥିଲା । ଉପଜିଲାପାଳଙ୍କ କାର୍ଯ୍ୟାଳୟର ସହକାରୀ ଜିଲାପାଳ ଚୟନୁ ଗଣ୍ଡ ମାଜିଷ୍ଟ୍ରେଟ ଭାବେ ଉପସ୍ଥିତ ରହି ଜବତ ଗଞ୍ଜେଇ ଓଜନ କରାଯାଇଥିଲା । ୮୭ କିଲୋ ଗଞ୍ଜେଇ ଚାଲାଣ କରାଯାଉଥିବା ଜଣାପଡିଥିଲା। ଏସଆଇ ଦେବଦତ୍ତ ମଲ୍ଲିକ, ନିଳିମା ପାଣିଗ୍ରାହୀ, ସୁମିତ୍ରା ଜୟସିଂ, ଏସଆଇ ଖବର ସିନ୍ଦୁ ସାହୁ, ଅଶୋକ କୁମାର ଦେଓ ପ୍ରମୁଖ ଚଢାଉ କରିଥିଲେ ା ଏନେଇ ନବରଙ୍ଗପୁର ଥାନାରେ ଏକ ମାମଲା ରୁଜୁ ହୋଇଛି ।