ବେଜିଂ,୮ା୩: ଚାଇନାର ଉହାନ ସହର କରୋନା ଭାଇରସ୍ରେ ଅଧିକ ପ୍ରଭାବିତ। ପ୍ରାୟ ୮୦ ହଜାର ଲୋକ ଏହି ଭାଇରସ୍ ଦ୍ୱାରା ସଂକ୍ରମିତ ହୋଇଛନ୍ତି। ଉହାନ୍ ୟୁନି ହସ୍ପିଟାଲରେ ଏକ ଦୃଶ୍ୟ ଏବେ ସମସ୍ତଙ୍କ ହୃଦୟକୁ ଛୁଇଁଯାଇଛି। ଏହି ଦୃଶ୍ୟଟି ସୋସିଆଲ ମିଡିଆରେ ବେଶ୍ ଭାଇରାଲ ହୋଇଛି। ଫଟୋରେ ଜଣେ ଡାକ୍ତର ୮୭ ବର୍ଷୀୟ କରୋନା ଭାଇରସ୍ରେ ପୀଡ଼ିତ ଜଣେ ରୋଗୀଙ୍କୁ ହସ୍ପିଟାଲ ବାହାରେ ଶନିବାର ସୂର୍ଯ୍ୟାସ୍ତ ଦେଖାଉଛନ୍ତି। ସୋସିଆଲ ମିଡିଆରେ ଏହି ଫଟୋ ଭାଇରାଲ ହେବା ପରେ ୟୁଜର୍ସ ଭିନ୍ନ ଭିନ୍ନ କମେଣ୍ଟ ଦେଇଛନ୍ତି। ଜଣେ ୟୁଜର ଲେଖିଛନ୍ତି, ହୃଦୟକୁ ଛୁଇଁଗଲା ପରି ଦୃଶ୍ୟ। ସେହିପରି ଆଉ ଜଣେ ଲେଖିଛନ୍ତି ‘ଆଶା କରୁଛି ସେ ଶୀଘ୍ର ସୁସ୍ଥ ହୋଇଯାଆନ୍ତୁ’। କିନ୍ତୁ ବର୍ତ୍ତମାନ ସୁଦ୍ଧା ଜଣା ପଡ଼ିନାହିଁ ପୀଡ଼ିତ ଜଣକ ମହିଳା କିମ୍ବା ପୁରୁଷ ବୋଲି। ଏହି ଫଟୋଟିକୁ ଜଣେ ୟୁଜର @chenchenzh ପ୍ରଥମେ ଶେୟାର କରିଥିଲେ।
ଉହାନର ଡାକ୍ତରଖାନା କର୍ମଚାରୀମାନେ କରୋନା ଭାଇରସ୍ ପ୍ରଭାବିତ ରୋଗୀଙ୍କୁ ସକାରାତ୍ମକ ଏବଂ ଖୁସି ରଖିବା ପାଇଁ ସମସ୍ତ ସମ୍ଭାବ୍ୟ ସହାୟତା ପ୍ରଦାନ କରୁଛନ୍ତି। ଡାକ୍ତରଖାନା ଏବଂ ଅସ୍ଥାୟୀ ଡାକ୍ତରଖାନାରେ ନୃତ୍ୟ ଏବଂ ବ୍ୟାୟାମ କ୍ଲାସ ଚାଲିଛି। ପୂର୍ବରୁ ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏହାକୁ ଲାକେ ବେଶ୍ ପ୍ରଶଂସା ମଧ୍ୟ କରିଥିଲେ।
ସୂଚନାଯୋଗ୍ୟ, କରୋନା ଭାଇରସ୍ରେ ୩୦୦୦ରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଥିବା ବେଳେ ୧ ଲକ୍ଷରୁ ଊର୍ଦ୍ଧ୍ୱ ସଂକ୍ରମିତ। ବିଶ୍ୱ ସ୍ବାସ୍ଥ୍ୟ ସଂଗଠନ ସୂଚନା ଅନୁଯାୟୀ, କରୋନା ଭାଇରସ୍ ୯୦ଟି ଦେଶରେ ବ୍ୟାପିଛି। ମୋଟ୍ ମୃତ୍ୟୁସଂଖ୍ୟା ୩୪୮୬ରେ ପହଞ୍ଚିଥିବା ବେଳେ କେବଳ ଚାଇନାରେ ୩୦୭୩ ଜଣଙ୍କ ମୃତ୍ୟୁ ଘଟିସାରିଛି। ବାକି ଦେଶରେ ୪୧୩।