ଅନୁଗୋଳ ଅଫିସ, ୨୪।୬
ବର୍ଷା ଆରମ୍ଭ ହୋଇଯାଇଥିବାରୁ ଅନୁଗୋଳ ବନଖଣ୍ଡରେ ଚାରା ରୋପଣ ପାଇଁ ପ୍ରସ୍ତୁତି ଚାଲିଛି। ଚଳିତବର୍ଷ ବନଖଣ୍ଡ ପକ୍ଷରୁ ଏଥିପାଇଁ ପାଖାପାଖି ସାଢ଼େ ୧୮ ଲକ୍ଷ ଚାରା ପ୍ରସ୍ତୁତ କରାଯାଇଛି। ସେଥିମଧ୍ୟରୁ ୩ ଲକ୍ଷ ୧୪ ହଜାର ଚାରା ୮୯୫ ହେକ୍ଟରରେ ଲଗାଯିବ। ସେହିପରି ବିଭିନ୍ନ ରାସ୍ତା ପାର୍ଶ୍ୱରେ ୬୮ କିମି ଯାଏ ପ୍ଲାଣ୍ଟେଶନ କରାଯିବ। ବଳକା ୧୫ ଲକ୍ଷ ୨୮ ହଜାର ଚାରା ବିଭିନ୍ନ ସଂସ୍ଥା, ସଙ୍ଗଠନ ଓ ଜନସାଧାରଣଙ୍କୁ ବଣ୍ଟନ କରାଯିବାର ଯୋଜନା ରହିଥିବା ବିଭାଗ ପକ୍ଷରୁ ସୂଚନା ଦିଆଯାଇଛି।
ବନୀକରଣ ହେବାକୁ ଥିବା ବନଖଣ୍ଡର ୮୯୫ ହେକ୍ଟର ଜମି ମଧ୍ୟରୁ ବନ୍ତଳା ରେଞ୍ଜରେ ୧୦, ୫୦୦ ଚାରା ଲଗାଯିବ। ସେହିପରି ଜରପଡ଼ା ରେଞ୍ଜରେ ୪୬, ୫୦୦, ଛେଣ୍ଡିପଦା ରେଞ୍ଜରେ ୮୪, ୫୦୦, ଅନୁଗୋଳ ରେଞ୍ଜରେ ୩୩, ୬୬୦, ତାଳଚେର ରେଞ୍ଜରେ ୪୭, ୫୦୦ ଓ କଣିହଁା ରେଞ୍ଜରେ ସର୍ବାଧିକ ୯୧, ୫୦୦ ଗମ୍ଭାରୀ, ଶିଶୁ, ଅଶନ, କରଞ୍ଜ, ଅର୍ଜୁନ, ଅଁଳା, ନିମ୍ବ, ଜାମୁ, ବାଉଁଶ ଆଦି ୧୫ କିସମର ଚାରା ଲଗାଯିବ। ଗତବର୍ଷ ଏହି ବନଖଣ୍ଡର ୧୭୫୭ ହେକ୍ଟର ଜମିରେ ୪ଲକ୍ଷ ୩୯ ହଜାର ୨୦୮ ଚାରା ରୋପଣ କରାଯାଇଥିଲା। ୫୭ କିଲୋମିଟର ରାସ୍ତା ପାର୍ଶ୍ୱରେ ପ୍ଲାଣ୍ଟେଶନ ହୋଇଥିଲା। ୮ ଲକ୍ଷ ୭୧ ହଜାର ୪୯୦ ଚାରା ବିଭିନ୍ନ ସଂସ୍ଥାକୁ ବଣ୍ଟନ କରାଯାଇଥିଲା। ୨୦୧୮-୧୯ରେ ମଧ୍ୟ ୧୭୫୨ ହେକ୍ଟର ଜମିରେ ବନୀକରଣ ହୋଇଥିଲା। ୩୭ କିଲୋମିଟର ରାସ୍ତା ପାର୍ଶ୍ୱରେ ଚାରା ରୋପଣ ସହ ୩ ଲକ୍ଷ ୪୩୦ ଚାରା ବଣ୍ଟନ କରାଯାଇଥିଲା। ୨୦୧୭-୧୮ରେ ୩୬୭.୫୩ ହେକ୍ଟର ଜମିରେ ୧ଲକ୍ଷ ୫୩ ହଜାର ୫୩୬ ଓ ୮ କିଲୋମିଟର ରାସ୍ତା ପାର୍ଶ୍ୱରେ ଚାରା ଲଗାଯାଇଥିଲା। ୩୩ ହଜାର ଅନ୍ୟମାନଙ୍କୁ ଦିଆଯାଇଥିଲା। ୨୦୧୬-୧୭ରେ ୨୯୯୬ ହେକ୍ଟରରେ ୮ ଲକ୍ଷ ୬୯ ହଜାର ୨୦୫ ଓ ୧୬୨ କିଲୋମିଟର ରାସ୍ତା ପାର୍ଶ୍ୱରେ ପ୍ଲାଣ୍ଟେଶନ କରାଯାଇଥିଲା। ୧୫ ଲକ୍ଷ ୮ ହଜାର ୭୬୦ ଚାରା ବଣ୍ଟାଯାଇଥିବା ବନଖଣ୍ଡ ପକ୍ଷରୁ କୁହାଯାଇଛି। ତେବେ ଏତେ ପରିମାଣର ଚାରା ରୋପଣ କରାଯାଉଥିଲେ ମଧ୍ୟ ଆବଶ୍ୟକ ଯତ୍ନ ନିଆଯାଉ ନ ଥିବାରୁ ଏହାର ଶତପ୍ରତିଶତ ଲାଭ ମିଳିପାରୁ ନାହିଁ ବୋଲି ପରିବେଶବିତମାନେ ଅଭିଯୋଗ କରିଛନ୍ତି। ଏ ନେଇ ଅନୁଗୋଳ ବନଖଣ୍ଡର ଜଣେ ବରିଷ୍ଠ ଅଧିକାରୀ କହିଛନ୍ତି, ଚାରା ରୋପଣ ପରେ ଯତ୍ନ ନିଆଯାଉଛି। କିନ୍ତୁ କେତେକ ସ୍ଥାନରେ ବଣ୍ଟାଯାଉଥିବା ଚାରାର ଯତ୍ନ ନିଆଯାଉନାହିଁ। ଏଥିପ୍ରତି ଦୃଷ୍ଟି ଦେବାକୁ ବିଭାଗୀୟ ଅଧିକାରୀଙ୍କ ଠାରୁ ଆରମ୍ଭ କରି ରେଞ୍ଜ ଅଧିକାରୀମାନଙ୍କୁ କୁହାଯାଇଛି ବୋଲି ସେ ପ୍ରକାଶ କରିଛନ୍ତି।