କୋରୁକୋଣ୍ଡା,୨୧।୩(ଡି.ଏନ୍.ଏ.): ମାଲକାନଗିରି ଜିଲା ଓରକେଲ ଥାନା ପୋଲିସ ୮ କୁଇଣ୍ଟାଲ ୩ କେଜି ୨୦୦ ଗ୍ରାମ ଗଞ୍ଜେଇ ଜବତ କରି ୪ ଜଣଙ୍କୁ କୋର୍ଟ ଚାଲାଣ କରିଛି।
ମିଳିଥିବା ସୂଚନା ଅନୁଯାୟୀ, ଶୁକ୍ରବାର ରାତିରେ ପୋଲିସ ପାଟ୍ରୋଲିଂ ସମୟରେ ପୁରୁଣା ଚିମିଟାପାଲି ପଞ୍ଚାୟତ ନିକଟସ୍ଥ କେନାଲ ଛକ ପାଖରେ ପ୍ରାୟ ୨୦ଜଣ ଭାରରେ କ’ଣ ନେଇ ଯାଉଥିବା ଦେଖିବାକୁ ମିଳିଥିଲା। ସନ୍ଦେହରେ ସେମାନଙ୍କୁ ଅଟକାଇବାରୁ ୧୬ ଜଣ ଜଙ୍ଗଲ ଭିତରକୁ ଦୌଡ଼ି ପଳାଇଥିଲେ। ଯାଞ୍ଚ କରିବାରୁ ସମସ୍ତ ଭାରରେ ଗଞ୍ଜେଇ ଥିବା ଦେଖିବାକୁ ମିଳିଥିଲା। ଏଥିରେ ୪ ଜଣଙ୍କୁ ପୋଲିସ ଗିରଫ କରିଛି। ସେମାନେ ହେଲେ ଜୟସେନ ଖିଲ, ବଳରାମ ଖିଲ, ମଦନ ଖିଲ, ରାମଚନ୍ଦ୍ର ଖିଲ। ଏ ସମସ୍ତେ ଚିତ୍ରକୋଣ୍ଡାର ଆର୍ଏସି-୧୩ ଗ୍ରାମର ବୋଲି ଜଣାପଡ଼ିଛି। ଏହି ଗଞ୍ଜେଇ ଚିତ୍ରକୋଣ୍ଡାରୁ ଜଙ୍ଗଲ ରାସ୍ତା ଦେଇ ଛତିଶଗଡ଼ ଯାଉଥିଲା ବୋଲି ଥାନା ଅଧିକାରୀ ଜଗଦୀଶ ବାରା କହିଛନ୍ତି। ଶନିବାର ଅପରାହ୍ନରେ ୪ ଜଣଙ୍କୁ କୋର୍ଟ ଚାଲାଣ କରାଯାଇଥିବା ଜଣାପଡ଼ିଛି।
