ନୂଆଦିଲ୍ଲୀ,୫ା୬(ପି.ଟି.):ଶିକାର ଓ ଅନ୍ୟାନ୍ୟ କାରଣରୁ ଗତ ୮ ବର୍ଷ ମଧ୍ୟରେ ଭାରତରେ ୭୫୦ ବାଘ ମୃତ୍ୟୁମୁଖରେ ପଡ଼ିଥିବା ସରକାରୀ ତଥ୍ୟରୁ ଜଣାପଡିଛି। କେବଳ ମଧ୍ୟପ୍ରଦେଶରେ ସର୍ବାଧିକ ୧୭୩ଟି ବାଘ ପ୍ରାଣ ହରାଇଛନ୍ତି। ସ୍ବାଭାବିକ୍ କାରଣରୁ ୩୬୯ଟି ବାଘ ମୃତ୍ୟୁମୁଖରେ ପଡ଼ିଥିବାବେଳେ ଶିକାରୀଙ୍କ ହାବୁଡ଼ରେ ପଡ଼ି ୧୬୮ ବାଘଙ୍କ ଜୀବନ ଯାଇଛି। ଅନ୍ୟ ୭୦ ବାଘଙ୍କ ମୃତ୍ୟୁର କାରଣ ସମ୍ପର୍କରେ ଯାଞ୍ଚ ଚାଲିଥିବାବେଳେ ଅସ୍ବାଭାବିକ ଭାବେ ତଥା ଦୁର୍ଘଟଣା କିମ୍ବା ପରସ୍ପର ମଧ୍ୟରେ ସଂଘର୍ଷ ଯୋଗୁ ୪୨ଟିର ମୃତ୍ୟୁ ଘଟିଛି। ୨୦୧୨ରୁ ୨୦୧୯ ମଧ୍ୟରେ ବିଭିନ୍ନ କର୍ତ୍ତୃପକ୍ଷ ୧୦୧ଟି ବାଘଙ୍କୁ ଜବତ କରିଥିବା ଏକ ଆରଟିଆଇ ଆବେଦନ ଉପରେ ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ (ଏନ୍ଟିସିଏ) ପକ୍ଷରୁ କୁହାଯାଇଛି। ୨୦୧୦ରୁ ୨୦୨୦ ମଧ୍ୟରେ ବାଘ ମୃତ୍ୟୁର ସବିଶେଷ ବିବରଣୀ ପ୍ରଦାନ କରିବା ଲାଗି ଏନ୍ଟିସିଏରେ ଆବେଦନ କରାଯାଇଥିଲା। ତେବେ କର୍ତ୍ତୃପକ୍ଷ ୨୦୧୨ରୁ ୮ ବର୍ଷ ମଧ୍ୟରେ ବାଘମୃତ୍ୟୁ ସମ୍ପର୍କିତ ତଥ୍ୟ ପ୍ରଦାନ କରିଛନ୍ତି।
ଅନ୍ୟପକ୍ଷରେ ଗତ ୪ ବର୍ଷ ମଧ୍ୟରେ ଦେଶରେ ବାଘ ସଂଖ୍ୟା ୭୫୦ ବୃଦ୍ଧି ପାଇ ୨,୯୭୬ରେ ପହଞ୍ଚତ୍ଥିବା ଗତ ଡିସେମ୍ବରରେ ପରିବେଶ ଓ ଜଙ୍ଗଲ ମନ୍ତ୍ରୀ ପ୍ରକାଶ ଜାଭଡେକର କହିଥିଲେ। ଏଥିପାଇଁ ଆମେ ସମଗ୍ର ପରିବେଶ ବ୍ୟବସ୍ଥା ଉପରେ ଗର୍ବ କରିବା କଥା ବୋଲି ଜାଭଡେକର ରାଜ୍ୟ ସଭାରେ ଏକ ଅତିରିକ୍ତ ପ୍ରଶ୍ନର ଉତ୍ତରରେ କହିଥିଲେ।
ମଧ୍ୟପ୍ରଦେଶରେ ଶିକାରୀଙ୍କ ଗୁଳିରେ ୩୮ ବାଘ ମରିଥିବାବେଳେ ୯୪ଟିର ସ୍ବାଭାବିକ ଏବଂ ୬ଟିର ଅସ୍ବାଭାବିକ ମୃତ୍ୟୁ ହୋଇଛି। ୧୬ଟି ଜବତ ହୋଇଥିବାବେଳେ ଅନ୍ୟ ୧୯ଟିର ମୃତ୍ୟୁ ସମ୍ପର୍କରେ ଯାଞ୍ଚ କରାଯାଉଛି। ମଧ୍ୟପ୍ରଦେଶରେ ସର୍ବାଧିକ ୫୨୬ ବାଘ ରହିଛନ୍ତି। ସେହିପରି ମହାରାଷ୍ଟ୍ରରେ ଗତ ୮ ବର୍ଷ ମଧ୍ୟରେ ୧୨୫ଟି ବାଘ ମରିଛନ୍ତି। ଏହା ପଛକୁ କର୍ନାଟକ (୧୧୧), ଉତ୍ତରାଖଣ୍ଡ (୮୮), ତାମିଲନାଡୁ (୫୪), ଆସାମ (୫୪), କେରଳ(୩୫), ଉତ୍ତରପ୍ରଦେଶ (୩୫), ରାଜସ୍ଥାନ (୧୭), ବିହାର (୧୧), ପଶ୍ଚିମବଙ୍ଗ (୧୧) ଏବଂ ଛତିଶଗଡ଼ରେ ୧୦ଟି ବାଘର ମୃତ୍ୟୁ ଘଟିଛି। ଓଡ଼ିଶା ଓ ଆନ୍ଧ୍ରପ୍ରଦେଶରେ ୮ ବର୍ଷରେ ୭ଟି ଲେଖାଏ ବାଘ ମରିଥିବାବେଳେ ତେଲଙ୍ଗାନାରେ ୫, ଦିଲ୍ଲୀ ଓ ନାଗାଲାଣ୍ଡରେ ୨ଟି ଲେଖାଏ, ହରିୟାଣା, ଗୁଜରାଟରେ ଗୋଟିଏ ଲେଖାଏ ବାଘ ମରିଛନ୍ତି।