ଆନନ୍ଦପୁର,୧୭। ୧୦(ସ୍ବ.ପ୍ର.)-ଚିକିତ୍ସା ସେବା ଅପହଞ୍ଚ ଥିବା ଇଲାକାରେ ଏବେବି ଅନ୍ଧବିଶ୍ୱାସକୁ ଲୋକେ ଗ୍ରହଣ କରୁଛନ୍ତି। ଲୋକମାନେ ଗୁଣିଗାରେଡି, ଝଡ଼ାଫୁଙ୍କା ଭଳି ଅନ୍ଧବିଶ୍ୱାସର ମୋହ ଛାଡିବାକୁ ପ୍ରସ୍ତୁତ ନାହାନ୍ତି। ଏହିଭଳି ଏକ ନଜିର ଆନନ୍ଦପୁର ମୁଖ୍ୟ ଚିକିତ୍ସାଳୟଠାରୁ ମାତ୍ର ୧୨ କି.ମି. ଦୂର ଧକୋଠା ଅଞ୍ଚଳରେ ଦେଖିବାକୁ ମିଳିଛି । ଜଣେ ଆଦିବାସୀ ଯୁବକ କ୍ରିକେଟ ଖେଳୁଥିବା ସମୟରେ ବଲ ତାଙ୍କ ଗୋଡ଼ରେ ବାଜିବାରୁ ସେ ଆହତ ହୋଇଥିଲେ। ଝଡାଫୁଙ୍କାର ସହାୟତାରେ ଭଲ ହେବାକୁ ଉଦ୍ୟମ କରି ନିରାଶ ହେବା ପରେ ସ୍ଥାନୀୟ ଜଣେ ସାମାଜିକକର୍ମୀଙ୍କ ସହାୟତାରେ ବୁଧବାର ତାଙ୍କୁ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି ହୋଇଛନ୍ତି।
ଧକୋଠା ଜଳନଣ୍ଡା ଗ୍ରାମର ଗଙ୍ଗା ମୁଣ୍ଡାଙ୍କ ପୁଅ ସିଙ୍ଗରାଇ ମୁଣ୍ଡା(୩୭) କ୍ରିକେଟ ଖେଳୁଥିବା ସମୟରେ ବଲ ଦ୍ୱାରା ଆହତ ହୋଇଥିଲେ। ଆର୍ଥିକ ଅଭାବ ଅନଟନରେ ରହୁଥିବା ଏହି ପରିବାର ଚିକିତ୍ସା ପାଇଁ ଝଡାଫୁଙ୍କାର ସହାୟତା ନେଇଥିଲେ। ଦୀର୍ଘ ୮ ମାସ ପରେ ବି ଗୋଡ଼ର ଫୁଲା କମିନଥିଲା। ଏହା କ୍ରମଶଃ ସେଫଟିକ୍ ହୋଇ ଗୁରୁତର ଅବସ୍ଥାକୁ ଗତି କରିଥିଲା। ନିକଟସ୍ଥ ବନ୍ଧ ଗ୍ରାମର ଜଣେ ସାମାଜିକ କର୍ମୀ ମଙ୍ଗୁଳୁ ପାତ୍ର ଜଳନଣ୍ଡା ବୁଲିଯାଇଥିବା ସମୟରେ ଏହି ଘଟଣା ଦେଖି ୧୦୮ ଆମ୍ବୁଲାନ୍ସ ସହିତ ଯୋଗାଯୋଗ କରି ତାଙ୍କୁ ଆନନ୍ଦପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ସେ ଏବେ ମେଡିକାଲରେ ଆଡମିଶନ ହୋଇ ଚିକିତ୍ସିତ ହେଉଛନ୍ତି। ଅନ୍ୟପକ୍ଷରେ ସିଙ୍ଗରାଇଙ୍କ ମା’ ଚମ୍ପା ମୁଣ୍ଡା କହିଛନ୍ତି ଯେ, ଆମେ ଗରିବ ଲୋକ ଆମ ପାଖରେ ପଇସା ନାହିଁ, ଡାକ୍ତରଖାନା ଆଣିପାରିଲୁନି। ଗାଁ ରେ ଝଡାଫୁଙ୍କା କରୁଥିଲୁ ହେଲେ ଫୁଲା କମିଲାନାହିଁ। ତେବେ ସରକାରୀ ସ୍ତରରେ ଆଦିବାସୀମାନଙ୍କୁ ଡାକ୍ତରୀ ଚିକିତ୍ସା ସୁବିଧା ଯୋଗାଇଦେବା ଓ ଲୋକମାନଙ୍କୁ ସଚେତନ କରାଇବା ପାଇଁ ବିଭିନ୍ନ ଯୋଜନା ମାନ କରୁଛନ୍ତି। ହେଲେ ଆଦିବାସୀ ଲୋକମାନଙ୍କ ମଧ୍ୟରେ ସଚେତନତାର ଅଭାବ ପରିଲକ୍ଷିତ ହେବା ଏକ ପରିତାପର ବିଷୟ ସାଜିଛି। ଗାଁ ଗାଁ ରେ ଆଶା ଓ ଅଙ୍ଗନଓ୍ବାଡି କର୍ମୀ ନିଯୁକ୍ତି ପାଇଛନ୍ତି। ହେଲେ ଲୋକମାନଙ୍କର ସ୍ବାସ୍ଥ୍ୟ ସମସ୍ୟା ଦିଗରେ ଏମାନେ କେତେ ସଚେତନ ତାହା ସହଜାରେ ଅନୁମାନ କରିହେବ।