କଣ୍ଟାମାଳ,୨୫ା୩ (ଡି.ଏନ.ଏ.) ବୌଦ୍ଧ ଜିଲା ଘିକୁଣ୍ଡି ପଞ୍ଚାୟତର ଆମ୍ବଗହଣାରେ ପାନୀୟ ଜଳ ସମସ୍ୟା ଉତ୍କଟ ହୋଇଛି । ଏଠିକାର ଜଳଯୋଗାଣ ବ୍ୟବସ୍ଥା ଅଚଳ ହୋଇ ପଡିଥିଲେ ବି ବିଭାଗୀୟ ଅବହେଳାରୁ ଏହା ସଜଡା ଯାଇ ପାରୁନାହିଁ। ଖରାଦିନ ପାଖେଇ ଆସିଥିବାରୁ ପାନୀୟ ଜଳ ପାଇଁ ଆମ୍ବଗହଣାର ଲୋକେ ହନ୍ତସନ୍ତ ହେଉଛନ୍ତି। ଏହି ଗାଁରେ ମୋଟ ଜନସଂଖ୍ୟା ୧୭ଶହ ହୋଇଥିବା ବେଳେ ମାତ୍ର ୩ ଟି ନଳକୂପ କାର୍ଯ୍ୟକ୍ଷମ ରହିଛି। ବାକି ୪ ନଳକୂପ ଅଚଳ ହୋଇ ପଡିରହିଛି। ନିକଟରେ ତେଲନଦୀ ଥିଲେ ମଧ୍ୟ ଏହି ନଦୀରେ ଧାର ଶୁଖି ଯାଇଥିବାରୁ ଶୌଚ ହେବା ପାଇଁ ମଧ୍ୟ ଗ୍ରାମବାସୀଙ୍କୁ ନଳକୂପ ଉପରେ ନିର୍ଭର କରିବାକୁ ପଡୁଛି। ତେବେ ୨୦ ଲକ୍ଷ ଟଙ୍କା ବ୍ୟୟ ଅଟକଳରେ ନିର୍ମିତ ଗ୍ରାମ୍ୟ ପାନୀୟ ଜଳ ପ୍ରକଳ୍ପ ଦୀର୍ଘ ୮ ମାସ ହେଲା ଅଚଳ ହୋଇ ପଡିଛି। ପାଣି ଉଠାଉଥିବା ମୋଟର ପୋଡିଯିବା ପରେ ଏହାର ମରାମତି ହୋଇପାରିନାହିଁ। ପାଣି ଯୋଗାଣ ପାଇଁ ନିର୍ମିତ ପୋଷ୍ଟଗୁଡିକ ମଧ୍ୟ ଭାଙ୍ଗିି ଗଲାଣି। ଏହାର ମରାମତି ପାଇଁ ଗ୍ରାମବାସୀ ବାରାମ୍ବାର ଦାବି କରି ଆସୁଥିଲେ ମଧ୍ୟ ବିଭାଗ ନୀରବଦ୍ରଷ୍ଟା ସାଜିଛି। ଏନେଇ ଗାଁ ମହିଳା ସୁମତି ମହାଲିକ କହିଛନ୍ତି ଯେ , କାଁ କରବ ଯେତେ ହାରି ଗୁହାରୀ କଲେ କେହି ନାଇଁ ଶୁନବାର। ପାନୀର ଲାଗି ଗାଁଲୋକ ଗୁଲଗୁଲା ହେଉଛୁ। ଅପରପକ୍ଷରେ ଗ୍ରାମ୍ୟ ପାନୀୟ ଜଳ ବିଭାଗର ଯନ୍ତ୍ରୀ ପ୍ରଦୀପ କୁମାର ଜେନାଙ୍କୁ ଯୋଗାଯୋଗ କରିବାରେ ଅଚଳ ପ୍ରକଳ୍ପକୁ କାର୍ଯ୍ୟକ୍ଷମ କରିବା ଦିଗରେ ଯଥାଶୀଘ୍ର ବିହିତ ପଦକ୍ଷେପ ନିଆଯିବ ବୋଲି କହିଛନ୍ତି।
