ବେଙ୍ଗାଲୁରୁ: କର୍ମଚାରୀଙ୍କ କାର୍ଯ୍ୟରେ ଖୁସି ହୋଇ କମ୍ପାନୀ କର୍ତ୍ତୃପକ୍ଷ ଦରମା ବଢ଼ାଇବା ସହ ଇନ୍ସେଟିଭ୍ ଦେଉଥିବା କଥା ବହୁ ଥର ଶୁଣିଥିବେ ବା ଜାଣିଥିବେ। ହେଲେ କେବେ ଶୁଣିଛନ୍ତି କି, ଶୋଇବା ପାଇଁ କର୍ମଚାରୀଙ୍କୁ ଦିଆଯାଉଛି ଲକ୍ଷେ ଟଙ୍କା। କିନ୍ତୁ ଏଥିପାଇଁ ଆପଣ ଚୟନ ହେବା ଆବଶ୍ୟକ। ତେବେ ଏହି ଖବର ବିଦେଶରେ ନୁହେଁ ବରଂ ଭାରତର। ଆଜ୍ଞା ହଁ, ଶୁଣିବାକୁ କଥାଟି ଆଶ୍ଚର୍ଯ୍ୟ ଲାଗୁଥିବ ହେଲେ ସତ। କର୍ମଚାରୀଙ୍କ ପାଇଁ ଏଭଳି ଅଫର୍ ଆଣିଛି କର୍ନାଟକର ରାଜଧାନୀ ବେଙ୍ଗାଲୁରୁର ଅନ୍ଲାଇନ୍ ଫର୍ମ ଓ୍ବେକ୍ଫିଟ୍। ଅନ୍ଲାଇନ ସ୍ଲିପ୍ ସଲ୍ୟୁସନ୍ ଫର୍ମ ନିଜର ଏହି ପ୍ରୋଗ୍ରାମକୁ ଓ୍ବେକ୍ଫିଟ୍ ସ୍ଲିପ୍ ଇନ୍ଟର୍ଣ୍ଣସିପ୍ର ନାଁ ଦେଇଛି। ଆଉ ଏହି କାର୍ଯ୍ୟ ପାଇଁ କମ୍ପାନୀ ପକ୍ଷରୁ କିଛି ନିୟମ ଓ ସର୍ତ୍ତାବଳୀ ରଖାଯାଇଛି। ପ୍ରଥମେ ଏହି ଇନ୍ଟର୍ଣ୍ଣସିପ୍ ପାଇଁ ମାତ୍ର କେତେଜଣ ଲୋକଙ୍କୁ ଚୟନ କରାଯିବ। ଏହାପରେ କମ୍ପାନୀ ପକ୍ଷରୁ ଦିଆଯାଇଥିବା ବିଛଣା ଉପରେ କର୍ମଚାରୀଙ୍କୁ ଶୋଇବାକୁ ପଡ଼ିବ। ଏଥିସହ ପ୍ରତିଦିନ ଆପଣଙ୍କୁ କିଭଳି ନିଦ ହେଲା, ଭଲ ନା ଖରାପ୍ ସେନେଇ ମଧ୍ୟ ସୂଚନା ଦେବାକୁ ପଡ଼ିବ।
କେବଳ ସେତିକି ନୁହେଁ, ପ୍ରଥମେ କମ୍ପାନୀ ଶୋଇବା ପାଇଁ କିଛି ଲୋକଙ୍କୁ କାଉନସିଲ୍ କରିବ। ତା’ପରେ ସେମାନଙ୍କର ଶୋଇବା ଶୈଳୀକୁ ଟ୍ରାକ୍ କରିବ। ଏହାପରେ ସେମାନଙ୍କୁ ଏକ୍ସପର୍ଟଙ୍କ ପରାମର୍ଶ ମଧ୍ୟ ଦିଆଯିବ। ଯେଉଁମାନେ ଶୋଇବାକୁ ଯିବେ ସେମାନଙ୍କର ନିଦର ରେକର୍ଡ କରାଯିବା ସହ ଶୋଇବା ଶୈଳୀ ଉପରେ ନଜର ମଧ୍ୟ ରଖାଯିବ। ଏଥିସହ ବିଜେତାଙ୍କୁ ସ୍ଲିପ୍ ଟ୍ରାକର ବି ଦିଆଯିବ। ତେବେ କମ୍ପାନୀ ନିୟମ ଅନୁଯାୟୀ ଏହି ସ୍କିମ୍ରେ ଭାଗ ନେଉଥିବା ବ୍ୟକ୍ତିଙ୍କୁ ଶହେ ଦିନ ପର୍ଯ୍ୟନ୍ତ ପ୍ରତିଦିନ ୯ଘଣ୍ଟା ଶୋଇବାକୁ ପଡ଼ିବ। ଆଉ ଏଥିପାଇଁ ସେହିମାନଙ୍କୁ ଚୟନ କରାଯିବ ଯେଉଁମାନେ ନିଦଠାରୁ ଆଉ କୌଣସି ଜିନିଷକୁ ଅଧିକ ଗୁରୁତ୍ୱ ଦେଇ ନ ଥାନ୍ତି। ଆଜିକାଲି ପ୍ରତିଦ୍ୱନ୍ଦିତା ସମୟରେ ସମସ୍ତେ କେବଳ ଦୌଡୁଛନ୍ତି। କାହାକୁ ଟିକେ ବିଶ୍ରାମ ନେବାକୁ ସମୟ ନାହିଁ। କାଳେ ବିଶ୍ରାମ ନେଲେ ଆଉ କିଏ ଆଗକୁ ପଳାଇବ। ଦୈନନ୍ଦିନ ଜୀବନରେ କାର୍ଯ୍ୟ ବ୍ୟସ୍ତତା ଓ ଚିନ୍ତା ଯୋଗୁ ବହୁ ଲୋକ ଭଲଭାବେ ଶୋଇ ପାରୁନାହାନ୍ତି। ଫଳରେ ଏହାର ସିଧାସଳଖ ପ୍ରଭାବ ସେମାନଙ୍କ ଶରୀର ଉପରେ ପଡ଼ୁଛି। ଏଥିପାଇଁ ଉକ୍ତ କମ୍ପାନୀ ଏହି ଇନ୍ଟର୍ଣ୍ଣସିପ୍ ପ୍ରୋଗ୍ରାମ ନେଇ ଆସିଛି। ଏହାର ମୂଳ ଉଦ୍ଦେଶ୍ୟ ହେଉଛି, ଲୋକମାନେ ଭଲଭାବେ ବିଶ୍ରାମ ବି ନେବେ ଆଉ ତାଙ୍କୁ କାମ କି ଘର ମଧ୍ୟ ଛାଡିବାକୁ ପଡ଼ିବ ନାହିଁ। ତା’ସହ ମୋଟା ଅଙ୍କର ଦରମା ମଧ୍ୟ ପାଇପାରିବେ। ଯଦି ଆପଣ ଏହି ଇନ୍ଟର୍ଣ୍ଣସିପ୍ କରିବାକୁ ଚାହୁଁଛନ୍ତି, ତା’ହେଲେ କମ୍ପାନୀର ଓ୍ବେବସାଇଟ https://www.wakefit.co/sleepintern କୁ ଯାଇ ଆବେଦନ କରିପାରିବେ।