ସିଡନୀ,୨୯।୧୧: ଭାରତୀୟ ଦଳର ବୋଲିଂ ଆକ୍ରମଣ କ୍ରମାଗତ ଭାବରେ ବିରୋଧୀ ଦଳ ଉପରେ ଚାପ ପକାଇବାରେ ଏବଂ ସେମାନଙ୍କ ଖେଳାଳିଙ୍କୁ ଆଉଟ୍ କରିବାରେ ବିଫଳ ହେଉଛି। ଦଳର ଷ୍ଟାର ବୋଲର ଜସପ୍ରୀତ ବୁମ୍ରା ମଧ୍ୟ ପ୍ରାରମ୍ଭିକ ଉଇକେଟ ନେବାରେ ବିଫଳ ରହିଛି। ଏହି କାରଣରୁ ଅଷ୍ଟ୍ରେଲିଆ ଦଳର ବ୍ୟାଟ୍ସମ୍ୟାନମାନେ ଭାରତ ବିପକ୍ଷରେ ରନ ସଂଗ୍ରହ କରୁଛନ୍ତି ଏବଂ ବିଶାଳ ଟାର୍ଗେଟ ଦେଉଛନ୍ତି। ଦଳର ବୋଲରଙ୍କ ଏହି ଖରାପ ପ୍ରଦର୍ଶନ ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଦିନିକିଆରେ ଜାରି ରହିଥିଲା ଏବଂ ଦଳ ଏକ ଲଜ୍ଜାଜନକ ରେକର୍ଡ ନିଜ ନାମରେ କରିଥିଲା। ଭାରତୀୟ ଦଳର ୯୭୮ ମ୍ୟାଚ ଇତିହାସରେ ଏହା ପ୍ରଥମ ଥର ପାଇଁ ବିରୋଧୀ ଦଳର ଓପନରମାନେ କ୍ରମାଗତ ତିନି ଇନିଂସରେ ଭାରତୀୟ ବୋଲରଙ୍କ ବିପକ୍ଷରେ ଶତକ ଭାଗିଦାରୀ କରିଛନ୍ତି। ପ୍ରଥମତଃ, ଚଳିତ ବର୍ଷ ଫେବୃଆରୀରେ ମାର୍ଟିନ ଗୁପ୍ତିଲ ଏବଂ ହେନେରୀ ନିକୋଲ୍ସ ନ୍ୟୁଜିଲ୍ୟାଣ୍ଡ ଦଳ ପାଇଁ ଓପନିଂ ଯୋଡିରେ ୧୦୬ ରନର ଭାଗିଦାରୀ କରିଥିଲେ। ଏହା ପରେ ଅଷ୍ଟ୍ରେଲିଆର ଆରୋନ ଫିଞ୍ଚ ଏବଂ ଡେଭିଡ ୱାର୍ଣ୍ଣର ପ୍ରଥମ ଏକଦିବସୀୟରେ ୧୫୬ ରନ ଏବଂ ଦ୍ୱିତୀୟ ଏକଦିବସୀୟରେ ଉଭୟ ୧୪୨ ରନ ଯୋଡିଥିଲେ। ଏହା ବ୍ୟତୀତ ଭାରତୀୟ ଦଳର ବୋଲରମାନେ ଏକ ଅବାଞ୍ଛିତ ରେକର୍ଡ ସୃଷ୍ଟି କରିଛନ୍ତି। ଗତ ପାଞ୍ଚଟି ମ୍ୟାଚ୍ରେ ପାୱାରପ୍ଲେରେ ଉଇକେଟ ନେବାରେ ଭାରତୀୟ ବୋଲରମାନେ ବିଫଳ ହୋଇଛନ୍ତି। ଏହି କାରଣରୁ ଏକ କ୍ୟାଲେଣ୍ଡର ବର୍ଷରେ ପ୍ରଥମ ଉଇକେଟ ପାଇଁ ସବୁଠୁ ଖରାପ ଆଭରେଜ୍ ଥିବା କେନିଆ, ବାଂଲାଦେଶ ଏବଂ ଜିମ୍ବାୱେ ଭଳି ଦେଶକୁ ଅତିକ୍ରମ କରି ମଧ୍ୟରେ ଭାରତ ସର୍ବାଗ୍ରେ ରହିଛି। ୨୦୨୦ରେ ପ୍ରଥମ ଉଇକେଟ ପାଇଁ ଭାରତୀୟ ଦଳର ଖରାପ ଆଭରେଜ୍ ୧୨୫.୪୨ ଥିବାବେଳେ ଦ୍ୱିତୀୟ ସ୍ଥାନରେ କେନିଆର ଦଳ ଯାହା ୨୦୦୧ରେ ଆଭରେଜ୍ ୧୦୪.୩୭ ରହିଥିଲା। ଏହା ବ୍ୟତୀତ ୧୯୯୭ରେ ବାଂଲାଦେଶର ଆଭରେଜ୍ ୯୬ ଏବଂ ୨୦୨୦ରେ ଜିମ୍ବାୱେର ଆଭ୍ରେଜ୍ ୮୪ ରହିଛି।