ବ୍ରହ୍ମପୁର ଅଫିସ,୨୩।୬: ବ୍ରହ୍ମପୁର ମହାନଗର ସମେତ ଜିଲାର ବିଭିନ୍ନ ଅଞ୍ଚଳରେ ବେଆଇନ ତମାଖୁ ଓ ଧୂମପାନର ବହୁଳ ବିକ୍ରି ହେଉଛି। ଜିଲାରେ କୋଟପା ଆଇନ୍ କଡାକଡି କରିବା ପାଇଁ ପ୍ରତି ବର୍ଷ ବିଭିନ୍ନ ବିକ୍ରି ହେଉଥିବା ତମାଖୁ ଦୋକାନରେ ଯାଞ୍ଚ କରାଯାଉଛି। ଏହି ଚଢ଼ାଉ ପାଇଁ ଏକ ସ୍କ୍ବାର୍ଡ଼ ଗଠନ କରାଯାଇଛି। ଏଥିରେ ଜିଲା ସ୍ବାସ୍ଥ୍ୟ ବିଭାଗ ଖାଦ୍ୟ ସୁରକ୍ଷା ଅଧିକାରୀ, ପୋଲିସ, ଅବକାରୀ ବିଭାଗ କର୍ମଚାରୀ ଏବଂ ଡ୍ରଗ୍ସ ଇନ୍ସପେକ୍ଟର ସାମିଲ ରହିଛନ୍ତି। ଜୁନ ୧୭ରେ ମହାନଗର ନିଗମର ୨୫ ଦୋକାନରେ ବେଆଇନ ଭାବେ ବିକ୍ରି ହେଉଥିବା ତମାଖୁ ଓ ଧୂମପାନ ଦୋକାନରେ ଏହି ଟିମ୍ ଚଢାଉ କରିଥିଲା। ସେମାନଙ୍କଠାରୁ ପ୍ରାୟ ୬,୭୦୦ ଟଙ୍କା ଜରିମାନା ଆଦାୟ କରାଯାଇଛି।
ସେହିପରି ୨୧ ତାରିଖରେ ଛତ୍ରପୁରରେ ତମାଖୁ ଓ ଧୂମପାନ ବିକ୍ରି କରୁଥିବା ୩୨ ଦୋକାନରେ ଚଢାଉ କରି ୫, ୭୦୦ ଟଙ୍କା ଜରିମାନା ଆଦାୟ କରାଯାଇଛି। ଗତ ୨୨ ତାରିଖରେ ଭଞ୍ଜନଗରରେ ବେଆଇନ ଭବେ ତମାଖୁ ଓ ଧୂମପାନ ବିକ୍ରି କରୁଥିବା ୪୧ଟି ଦୋକାନରୁ ୯ହଜାର ଟଙ୍କା ଜରିମାନା ଆଦାୟ କରାଯାଇଥିବା ଜଣାପଡିଛି। ଚଳିତ ମାସ ଜିଲାର ଦୁଇଟି ବ୍ଲକ ଓ ବିଏମ୍ସିରେ ଏହି ଚଢ଼ାଉ କରାଯାଇଛି। ଆଗାମୀ ଦିନରେ ଏହି ଚଢ଼ାଉ ଜିଲାର ଅନ୍ୟ ବ୍ଲକଗୁଡିକରେ କରାଯିବ ବୋଲି ସିଡ଼ିଏମ୍ଓ ମିଶ୍ର ସୂଚନା ଦେଇଛନ୍ତି।