ଅନୁଗୋଳ ଅଫିସ, ୨୦।୫ – ଅନୁଗୋଳ ଜିଲାରେ ୯ଦିନ ପରେ ପୁଣି ୨ଜଣ କରୋନା ପଜିଟିଭ୍ ବାହାରିଛନ୍ତି। ଏହି ଦୁଇଜଣଙ୍କୁ ମିଶାଇ ଜିଲାରେ ଆକ୍ରାନ୍ତଙ୍କ ସଂଖ୍ୟା ୧୭ରେ ପହଞ୍ଚିଛି । କରୋନା ସଂକ୍ରମିତ ସୁରଟ ଫେରନ୍ତା ବୋଲି ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଟୁଇଟ୍ କରି ସୂଚନା ଦିଆଯାଇଛି। ଜିଲାରେ ଗତ ୧୦ ତାରିଖରେ ଏକାଥରକେ ୧୫ କରୋନା ସଂକ୍ରମିତ ଚିହ୍ନଟ ହୋଇଥିଲେ। ଏବେ ପୁଣି ଦୁଇ ଜଣ ଆକ୍ରାନ୍ତ ବାହାରିବା ପରେ ଚିନ୍ତା ବଢିଛି।
ଜିଲାପାଳ ମନୋଜ କୁମାର ମହାନ୍ତିଙ୍କ ସୂଚନା ମୁତାବକ, ଅନୁଗୋଳ ବ୍ଲକର ୨୨ ବର୍ଷୀୟ ଯୁବକ ଜଣକ ଗତ ୧୦ ତାରିଖରେ ଏବଂ ତାଳଚେର ଅଞ୍ଚଳର ୨୯ ବର୍ଷୀୟ ଯୁବକ ଗତ ୧୩ ତାରିଖରେ ସୁରଟରୁ ଅନୁଗୋଳ ଆସିଥିଲେ। ଉଭୟେ ଅନୁଗୋଳ ବ୍ଲକରେ ହୋଇଥିବା ପୃଥକ କ୍ବାରାଣ୍ଟାଇନ୍ ସେଣ୍ଟରରେ ଥିଲେ। ସେମାନଙ୍କ ନିକଟରେ କରୋନାର କୌଣସି ଲକ୍ଷଣ ପରିଲକ୍ଷିତ ହୋଇ ନ ଥିଲା। ନମୁନା ପରୀକ୍ଷା ପରେ ଉଭୟେ କରୋନା ପଜିଟିଭ ବୋଲି ରିପୋର୍ଟ ଆସିଥିଲା। ସେମାନଙ୍କୁ ତାଳଚେର କୋଭିଡ୍ ମେଡିକାଲକୁ ସ୍ଥାନାନ୍ତର କରାଯାଇଛି। ଏଥିସହ ଦୁଇଟି କ୍ବାରେଣ୍ଟାଇନ୍ ସେଣ୍ଟରକୁ ସାନିଟାଇଜ କରାଯାଇଥିବା ଜିଲାପାଳ କହିଛନ୍ତି। ଅନ୍ୟପଟେ ଜିଲା ପ୍ରଶାସନ ପକ୍ଷରୁ ଏ ବାବଦରେ ତ୍ୱରିତ ସୂଚନା ସର୍ବସାଧାରଣଙ୍କ ଅବଗତି ନିମନ୍ତେ ପ୍ରଦାନ କରାଯାଇ ନ ଥିବାରୁ ଅସନ୍ତୋଷ ଦେଖାଦେଇଛି।
ଏ ନେଇ ଅନୁଗୋଳ ସୂଚନା ଓ ଲୋକସମ୍ପର୍କ ଅଧିକାରୀ ଶରତ ଚନ୍ଦ୍ର ସେଠୀ କହିଛନ୍ତି, ସୋସିଆଲ ସାଇଟ୍ ଅପ୍ଡେଟ୍ ହେଉଛି। ଅଫିସିଆଲ ସାଇଟ୍ ହ୍ୟାଣ୍ଡେଲ କରୁଥିବା ଆସିଷ୍ଟାଣ୍ଟ କଲେକ୍ଟର ଏ ନେଇ ସୂଚନା ଦେଉଛନ୍ତି। ଯଦି କରାଯାଇ ନ ଥିବ ତେବେ ଅପ୍ଡେଟ କରିବାକୁ କୁହାଯିବ ବୋଲି ସେ ପ୍ରକାଶ କରିଛନ୍ତି। ଏ ସମ୍ପର୍କରେ ଜିଲାପାଳଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସମ୍ପର୍କ ହୋଇ ନ ପାରିବାରୁ ମତାମତ ମିଳିପାରିନାହିଁ।