ଭୁବନେଶ୍ୱର, ୧୯।୪(ବ୍ୟୁରୋ): କରୋନା ସଂକ୍ରମଣ ଲଢ଼େଇରେ ପ୍ରମୁଖ ଭୂମିକା ଗ୍ରହଣ କରିଥିବା ସ୍ବାସ୍ଥ୍ୟକର୍ମୀଙ୍କୁ ଉତ୍ସାହିତ କରିବା ଏବଂ ବିଶ୍ୱବାସୀଙ୍କୁ ଘରେ ରହିବା ଲାଗି ସଚେତନ କରିବା ପାଇଁ ଆୟୋଜିତ ହୋଇଛି ବିଶ୍ୱର ସର୍ବବୃହତ୍ ଭର୍ଚୁଆଲ୍ କନ୍ସର୍ଟ ‘ୱାନ୍ ୱାର୍ଲଡ: ଟୁଗେଦର୍ ଆଟ୍ ହୋମ୍’। ଗ୍ଲୋବାଲ୍ ସିଟିଜେନ୍ ମୁଭ୍ମେଣ୍ଟ ଏବଂ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟଏଚ୍ଓ) ଦ୍ୱାରା କରାଯାଇଥିବା ଏହି କନ୍ସର୍ଟରେ ବିଶ୍ୱର ଖ୍ୟାତନାମା କଳାକାର ଓ କଣ୍ଠଶିଳ୍ପୀମାନେ ସାମିଲ ହୋଇଛନ୍ତି। ପପ୍ କୁଇନ୍ ଲେଡି ଗାଗାଙ୍କ ଉଦ୍ୟମରେ ହୋଇଥିବା ଏହି ‘ୱାନ୍ ୱାର୍ଲଡ: ଟୁଗେଦର୍ ଆଟ୍ ହୋମ୍’କୁ ଷ୍ଟିଫେନ୍ କୋଲବର୍ଟ, ଜିମ୍ମି କିମେଲ ଓ ଜିମ୍ମି ଫାଲୋନ୍ଙ୍କ ଭଳି ବହୁଚର୍ଚ୍ଚତ ଆମେରିକାନ୍ ଟେଲିଭିଜନ୍ ଷ୍ଟାର୍ମାନେ ହୋଷ୍ଟ୍ କରିଛନ୍ତି। ଏଲ୍ଟନ୍ ଜନ୍, ଟେଲର ସ୍ବିଫ୍ଟ, ବିଲି ଏଲିଶ, ପଲ୍ ମାକ୍କାର୍ଟନୀ, ସେଲିନ ଡିଅନ୍, ଜନ୍ ଲିଜେଣ୍ଡ ଏବଂ ଓଫ୍ରା ୱିନ୍ଫ୍ରିଙ୍କ ଭଳି ବହୁ ବ୍ୟକ୍ତିତ୍ୱଙ୍କୁ ଏଥିରେ ଦେଖିବାକୁ ମିଳିଛି।
ଶନିବାର ବୁକ୍ ମାଇଁ ଶୋ’ରେ ଲାଇଭ୍ ଷ୍ଟ୍ରିମିଂ ହୋଇଥିବା ଏହି କନ୍ସର୍ଟ ରବିବାର ସକାଳ ୫ଟା ୩୦ ଏବଂ ସନ୍ଧ୍ୟା ୮ଟାରେ ରିପିଟ୍ ଟେଲିକାଷ୍ଟ ହେବ। ଏହାବ୍ୟତୀତ ସୋନୀ ପିକ୍ସ, ଏଏକ୍ସଏନ୍ ଏବଂ ସୋନୀ ଲାଇଭ୍ରେ ମଧ୍ୟ ସନ୍ଧ୍ୟା ୮ଟାରୁ ୧୦ଟା ମଧ୍ୟରେ ଦେଖିହେବ। ଭିଏଚ୍୧ ଇଣ୍ଡିଆ, କମେଡି ସେଣ୍ଟ୍ରାଲ ଇଣ୍ଡିଆ, କଲର୍ସ ଇନ୍ଫିନିଟି ଏବଂ ଭୁଟ୍ରେ ରବିବାର ସକାଳ ୫ଟା ୩୦ ଏବଂ ସନ୍ଧ୍ୟା ୮ଟାରେ ଦର୍ଶକ ଏହି ଶୋ’ ଦେଖିପାରିବେ। ସେହିଭଳି ଡବ୍ଲ୍ୟଏଚ୍ଓର ୟୁଟ୍ୟୁବ୍ ସାଇଟ୍ରେ ମଧ୍ୟ ଏହି ସ୍ପେଶାଲ କନ୍ସର୍ଟ ଦେଖିହେବ। ଭାରତରୁ ଅଭିନେତ୍ରୀ ପ୍ରିୟଙ୍କା ଚୋପ୍ରା ଏବଂ ବଲିଉଡ୍ କିଙ୍ଗ୍ ଖାନ୍ ଶାହରୁଖ୍ ଖାନ୍ଙ୍କୁ ଏଥିରେ ଦେଖିବାକୁ ମିଳିଥିବା ବେଳେ ‘ରୋଲିଂ ଷ୍ଟୋନ୍ସ’ର ସମସ୍ତ ୪ଜଣ ସଦସ୍ୟ ଏଥିରେ ଅଂଶଗ୍ରହଣ କରିଥିଲେ। ସମଗ୍ର ବିଶ୍ୱରେ କରୋନା ମୁକାବିଲାରେ ସାମିଲ ହୋଇଥିବା ଆଗଧାଡ଼ିର ସ୍ବାସ୍ଥ୍ୟକର୍ମୀଙ୍କୁ ଏହି କନ୍ସର୍ଟ ମାଧ୍ୟମରେ କୃତଜ୍ଞତା ଦିଆଯିବା ସହ ଏଥିରୁ ସଂଗୃହୀତ ଅର୍ଥକୁ ଡବ୍ଲ୍ୟୁଏଚ୍ଓର କୋଭିଡ୍-୧୯ ସଲିଡାରିଟି ରେସ୍ପନ୍ସ ଫଣ୍ଡ୍କୁ ପ୍ରଦାନ କରାଯିବ।