ବରଗଡ଼ ଅଫିସ୍,୨୬।୪: ଲକ୍ ଡାଉନ୍ ଯୋଗୁ ସମସ୍ତ ସଭା, ସମିତି ଆୟୋଜନ ଉପରେ ମଧ୍ୟ କଟକଣା ଲାଗୁ ହୋଇଛି। ଏଭଳି ସ୍ଥଳେ ବରଗଡ଼ର ସାକେତ୍ ଶ୍ରୀଭୂଷଣ ସାହୁଙ୍କ ଉଦ୍ୟମରେ ୱେବ୍ କନଫେରେନ୍ସ ମାଧ୍ୟମରେ ଏକ ମାତୃଭାଷା ସମ୍ମିଳନୀ ହୋଇଥିଲା । ଏଥିରେ ଋଷିଆର ସନ୍ତୋଷ ମିଶ୍ର, ପଞ୍ଜାବର ଡଃ ଜୋଗା ସିଂ, ବାଙ୍ଗାଲୋରର ମଛିନ୍ଦ ଅପେୟା କରିଅପ୍ପା, ଦିଲ୍ଲୀର ସୁଧୀର ହିଲ୍ସାୟନ, ମୁମ୍ବାଇର କୁନ୍ଦନ ଅଭିତାଭ୍, ଭିଲାଇର ମନୋଜ ସ୍ବାଇଁ, ନେତ୍ରାନନ୍ଦ ପ୍ରଧାନ, ଲାଲଚନ ବଗର୍ତ୍ତୀ ପ୍ରମୁଖ ଭାଗ ନେଇଥିଲେ। ବିବାହ, ବ୍ରତ ଆଦି ନିମନ୍ତ୍ରଣ ପତ୍ରରେ ମାତୃଭାଷାର ବହୁଳ ବ୍ୟବହାର ଉପରେ ଭାଷାକର୍ମୀମାନେ ଗୁରୁତ୍ୱାରୋପ କରିଥିଲେ। ଲକ୍ ଡାଉନ୍ ଭଳି ଅନିଶ୍ଚିତ ପରିସ୍ଥିତିରେ ମାତୃଭାଷାର ପ୍ରଚାର, ପ୍ରସାର ତଥା ଅଧିକାର ପାଇଁ ସୋସିଆଲ ମିଡ଼ିଆର ବ୍ୟବହାରକୁ ଭାଷାକର୍ମୀମାନେ ଗୁରୁତ୍ୱ ଦେଇଥିଲେ । କେତେକ ଇଂଲିଶ ମିଡ଼ିୟମ ସ୍କୁଲରେ ଛାତ୍ରୀଛାତ୍ରଙ୍କୁ ମାତୃଭାଷା ଶିକ୍ଷାରୁ ବଞ୍ଚିତ କରାଯାଉ ଥିବାଯୋଗୁ ସେ ନେଇ କନଫେରେନ୍ସରେ ଉଦ୍ବେଗ ପ୍ରକାଶ ପାଇଥିଲା।