ନୂଆଦିଲ୍ଲୀ,୭।୧୨: ଜାତୀୟ ରାଜଧାନୀରେ ଶୀତଲହରୀ ଜାରି ରହିଛି। ଗୁରୁବାର ରାତିରେ ଦିଲ୍ଲୀରେ ସର୍ବନିମ୍ନ ତାପମାତ୍ରା ୧.୫ ଡିଗ୍ରୀ ସେଲସିୟସ ରେକର୍ଡ କରାଯାଇଥିବା ବେଳେ ଅନେକ ଅଞ୍ଚଳରେ ଘନକୁହୁଡି ଦୃଶ୍ୟମାନ ହୋଇଥିଲା। ଫଳରେ ଗାଡି ଚଳାଚଳରେ ବାଧାପ୍ରାପ୍ତ ହୋଇଥିଲା। ଅନ୍ୟପଟେ, ଖରାପ ପାଗ ଏବଂ ଅନ୍ୟାନ୍ୟ ଆନୁସଙ୍ଗିକ ସମସ୍ୟା ହେତୁ ଦିଲ୍ଲୀ ବିମାନବନ୍ଦରରୁ ପ୍ରାୟ ୩୪ଟି ଘରୋଇ ବିମାନ ଉଡ଼ାଣ ବିଳମ୍ବ ହୋଇଛି। ସେହିପରି ବିଭିନ୍ନ ଗନ୍ତବ୍ୟସ୍ଥଳରୁ ଆସୁଥିବା ୧୨ରୁ ଅଧିକ ବିମାନ ଦିଲ୍ଲୀ ବିମାନବନ୍ଦରରେ ବିଳମ୍ବରେ ପହଞ୍ଚିଛି। ଏଥି ସହିତ ଘନ କୁହୁଡି ଏବଂ ଥଣ୍ଡା ଯୋଗୁ ଭାରତୀୟ ରେଳବାଇ ମଧ୍ୟ ଶନିବାର ୩୨୦ ଟ୍ରେନ୍କୁ ବାତିଲ କରିଦେଇଛି। ଏଥିମଧ୍ୟରୁ ୨୮୦ ଟ୍ରେନ୍ ସଂପୂର୍ଣ୍ଣ ବାତିଲ ହୋଇଥିବା ବେଳେ ୪୦ଟି ଟ୍ରେନ୍ ଆଂଶିକ ବାତିଲ ହୋଇଛି। ରେଳବାଇ ସୂଚନାନୁଯାୟୀ, ୨୨ଟି ଟ୍ରେନ୍ର ମାର୍ଗ ପରିବର୍ତ୍ତନ ହୋଇଥିବାବେଳେ ୩୧ଟି ଟ୍ରେନର ପୁନଃ କାର୍ଯ୍ୟସୂଚୀ କରାଯାଇଛି।