ଲାହୋର,୨୮।୯: ପାକିସ୍ତାନରେ ଏବେ ବେକାରଙ୍କ ସମସ୍ୟା ବଢ଼ିବାରେ ଲାଗିଛି। ଦେଶର ବେକାରଙ୍କ ସଂଖ୍ୟା ୬.୫ ପ୍ରତିଶତ ରହିଥିବା ପ୍ରଧାନମନ୍ତ୍ରୀ ଇମ୍ରାନ୍ ଖାଁ କହୁଥିବାବେଳେ ପ୍ରକୃତ ତଥ୍ୟ କିନ୍ତୁ ଏହାର ଓଲଟା ହୋଇଛି। ଦେଶରେ ୧୬ ପ୍ରତିଶତ ବେକାର ରହିଛନ୍ତି। ଧୀରେଧୀରେ ଏଭଳି ଲୋକଙ୍କ ସଂଖ୍ୟା ବଢ଼ିବାରେ ଲାଗିଛି। ଫଳରେ ବେରୋଜଗାର ସ୍ଥିତି ଭୟଙ୍କର ହେବାରେ ଲାଗିଛି।
ସରକାରୀ ନୀତିର ଅପାରଗତା ଏବଂ କରୋନା ମହାମାରୀ ଯୋଗୁ ଏଭଳି ସ୍ଥିତି ସୃଷ୍ଟି ହୋଇଥିବା କୁହାଯାଉଛି। ଦେଶର ୨୪ ପ୍ରତିଶତ ଶିକ୍ଷିତ ଏବେ ବେକାର ହୋଇ ବସି ରହିଛନ୍ତି ବୋଲି ପାକିସ୍ତାନ ଇନଷ୍ଟିଚ୍ୟୁଟ ଅଫ୍ ଡେଭଲପ୍ମେଣ୍ଟ୍ ଇକୋନୋମିକ୍ସ୍(ପିଆଇଡିଇ) ପକ୍ଷରୁ ପ୍ରକାଶିତ ହୋଇଥିବା ଏକ ରିପୋର୍ଟରେ ଉଲ୍ଲେଖ କରାଯାଇଛି।
ସମ୍ପ୍ରତି ଏକ ପିଅନ ପଦବୀ ପାଇଁ ୧୫ ଲକ୍ଷ ବେକାର ଯୁବବର୍ଗ ଆବେଦନ କରିଥିବା ଖବର ପାକିସ୍ତାନ ଗଣମାଧ୍ୟମ ସଂସ୍ଥାରେ ପ୍ରକାଶ ପାଇଛି। ପିଅନ ପଦବୀ ପାଇଁ ଏମ୍ଫିଲ୍ ଡିଗ୍ରୀଧାରୀ ଯୁବକମାନେ ମଧ୍ୟ ଆବେଦନ କରିଛନ୍ତି। ଏହି ଘଟଣା ଏବେ ସୋସିଆଲ୍ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି। ଏହାଦ୍ୱାରା ଇମ୍ରାନ୍ଙ୍କ ମିଛ ଧରା ପଡ଼ିଯାଇଥିବା ଚର୍ଚ୍ଚା ହେଉଛି।