![](https://www.dharitri.com/wp-content/uploads/2024/03/18.jpg)
ନୂଆଦିଲ୍ଲୀ,୩।୩: ଘରୋଇ ବଜାରର ତୈଳ ଏବଂ ଗ୍ୟାସ୍ର ଚାହିଦା ମେଣ୍ଟାଇବା ପାଇଁ ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସର୍ବଭାରତୀୟସ୍ତରରେ ୧.୬୨ଲକ୍ଷ କୋଟିର ଅଏଲ ଆଣ୍ଡ ଗ୍ୟାସ୍ ପ୍ରକଳ୍ପର ଶୁଭାରମ୍ଭ ସହ ବିହାରର ବେଗୁସରାଇରୁ ଦେଶବାସୀଙ୍କ ପାଇଁ ଉତ୍ସର୍ଗୀକୃତ କରିଛନ୍ତି। ସେହିଭଳି ରାଷ୍ଟ୍ରାୟତ୍ତ ଉଦ୍ୟୋଗ ଓଏନ୍ଜିସିର କ୍ରିଷ୍ଣା-ଗୋଦାବରୀ ଡିପ୍ଓ୍ବାଟର ପ୍ରୋଜେକ୍ଟରୁ ପ୍ରଥମ ତୈଳ ଟ୍ୟାଙ୍କର କେଜି ବେସିନ୍ରୁ ଉତ୍ତୋଳନ ହୋଇଛି। ଉକ୍ତ ଟ୍ୟାଙ୍କରଗୁଡିକୁ ପ୍ରଧାନମନ୍ତ୍ରୀ ପତାକା ଦେଖାଇ ଶୁଭାରମ୍ଭ କରିଛନ୍ତି। ଏହି ଅବସରରେ କେନ୍ଦ୍ରମନ୍ତ୍ରୀଙ୍କ ସମେତ ବିହାରର ବହୁ ମନ୍ତ୍ରୀ, ବିଭିନ୍ନ କମ୍ପାନୀର ବରିଷ୍ଠ ଅଧିକାରୀ ଓ ଅନ୍ୟମାନେ ଉପସ୍ଥିତ ଥିଲେ।
ଉଲ୍ଲେଖଯୋଗ୍ୟ, ଦେଶର ପ୍ରମୁଖ ରାଜ୍ୟ ବିହାର, ହରିୟାଣା, ଆନ୍ଧ୍ରପ୍ରଦେଶ, ମହାରାଷ୍ଟ୍ର, ପଞ୍ଜାବ ଏବଂ କର୍ନାଟକ ଭଳି ରାଜ୍ୟରେ ଏହି ଅଏଲ ଆଣ୍ଡ ଗ୍ୟାସ୍ ପ୍ରକଳ୍ପର ଆନୁଷ୍ଠାନିକ ଶୁଭାରମ୍ଭ ହୋଇଯାଇଛି। ଅପରପକ୍ଷରେ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ଅନ୍ୟାନ୍ୟ ପ୍ରକଳ୍ପର ଶୁଭାରମ୍ଭ ସହିତ ୪ଟି ରେଳ ଗାଡ଼ିର ଶୁଭାରମ୍ଭ କରାଯାଇଥିଲା।