ସୋନପୁର,୧୫।୧୧(ନି.ପ୍ର.):ଚଞ୍ଚକତା କରି ୬ଜଣ ବ୍ୟକ୍ତି ସୋନପୁର ୟୁକୋ ବ୍ୟାଙ୍କ ଶାଖାରୁ ୧୯ଲକ୍ଷ ଟଙ୍କା ଋଣ ନେବାରେ ସକ୍ଷମ ହୋଇଛନ୍ତି। ବ୍ୟାଙ୍କ ଅଡିଟ୍ ସମୟରେ ଏହି ଘଟଣା ଜଣାପଡିଛି। ଶାଖା ପରିଚାଳକ ପ୍ରଶାନ୍ତ କୁମାର ନାୟକ ଏହି ସମ୍ପର୍କରେ ସୋମବାର ସୋନପୁର ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଏକ ଠକେଇ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
ସୂଚନା ଯୋଗ୍ୟ, ୨୦୧୯ରେ ସୁବର୍ଣ୍ଣପୁର ଜିଲା ବିନିକା ଥାନା ସିଲାଟି ଗ୍ରାମର ଆକାଶ ମହଲା, ବିରେନ୍ଦ୍ର ସରାଫ, ସୁରେନ୍ଦ୍ର ସରାଫ, ଇଶ୍ୱର ସରାଫ ଓ ବରଗଡ ଜିଲା ରଷୁଡାର ହରିଚରଣ ପାତ୍ର ଏବଂ ରାମଚନ୍ଦ୍ର ବାରିକ ସୁନା ବନ୍ଧକ ରଖି ବ୍ୟାଙ୍କରୁ ଋଣ ନେଇଥିଲେ। ୬ ଜଣ ମୋଟ ୧୯ ଲକ୍ଷ ଟଙ୍କା ଋଣ ନେଇଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ବ୍ୟାଙ୍କ୍କୁ ଟଙ୍କା ଫେରାଇ ନାହାନ୍ତି କିମ୍ବା ସୁଧ ଦେଇ ନାହାନ୍ତି। ଅନ୍ୟ ପକ୍ଷେ ଗତ ଅଗଷ୍ଟ ମାସରେ ବ୍ୟାଙ୍କ ଶାଖାରେ ଅଡିଟ୍ ପରେ ଚଞ୍ଚକତା କରାଯାଇ ଋଣ ନାମରେ ଠକେଇ ହୋଇଥିବା ଜଣାପଡିଥିଲା। ବନ୍ଧକ ଦିଆ ଯାଇଥିବା ଅଳଙ୍କାର ଭିତରେ ଅନ୍ୟ ଧାତବ ପଦାର୍ଥ ଥିବା ବେଳେ ଉପରେ ସ୍ବର୍ଣ୍ଣ ପ୍ରଲେପ ଦିଆଯାଇଥିବା ଅଭିଯୋଗ ହୋଇଛି। ପୋଲିସ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିବା ସୋନପୁର ଆଇଆଇସି ପୁଷ୍ପେନ୍ଦୁ ସାଗର କହିଛନ୍ତି।
