ନୂଆଦିଲ୍ଲୀ, ୧୮ା୧୦(ପି.ଟି.): ଚଳିତ ଦିନିକିଆ କ୍ରିକେଟ ବିଶ୍ୱକପ୍ରେ ଇଂଲଣ୍ଡ ବିପକ୍ଷ ମ୍ୟାଚ ବେଳେ ଆଫଗାନିସ୍ତାନ ବ୍ୟାଟର ରହମାନୁଲ୍ଲା ଗୁର୍ବାଜ ଆଉଟ ହେବା ପରେ ବିରକ୍ତି ପ୍ରକାଶ କରି ବାଉଣ୍ଡାରି ଦଉଡ଼ି ଓ ଏକ ଚେୟାରକୁ ତାଙ୍କ ବ୍ୟାଟ୍ରେ ପ୍ରହାର କରିଥିଲେ। ଫଳତଃ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)ର ଆଚରଣବିଧି ଉଲ୍ଲଂଘନ କରିଥିବା ଅଭିଯୋଗରେ ତାଙ୍କୁ ବିଧିବଦ୍ଧ ଭାବେ ଭର୍ତ୍ସନା କରାଯାଇଛି। ଏହାଛଡ଼ା ତାଙ୍କ ଶୃଙ୍ଖଳା ରେକର୍ଡରେ ଗୋଟିଏ ଡିମେରିଟ୍ ପଏଣ୍ଟ ଯୋଗ କରାଯାଇଛି। ୨୪ ମାସ ମଧ୍ୟରେ ଏହା ହେଉଛି ତାଙ୍କର ପ୍ରଥମ ଅପରାଧ। ଆଫଗାନିସ୍ତାନ ଇନିଂସର ୧୯ତମ ଓଭରରେ ଗୁର୍ବାଜ ଆଉଟ ହେବାପରେ ଏହି ଘଟଣା ଘଟିଥିଲା। ଗୁର୍ବାଜ ତାଙ୍କ ଦୋଷ ସ୍ବୀକାର କରିବା ସହ ଆଇସିସି ଏଲିଟ୍ ପ୍ୟାନେଲ ଅଫ୍ ମ୍ୟାଚ ରେଫରିଜ୍ର ଜେଫ୍ କ୍ରୋଙ୍କ ଦ୍ୱାରା ହୋଇଥିବା ଦଣ୍ଡବିଧାନକୁ ଗ୍ରହଣ କରିନେବାରୁ ଆନୁଷ୍ଠାନିକ ଶୁଣାଣିର ଆବଶ୍ୟକ ପଡ଼ି ନ ଥିଲା। ଦୁଇ ଫିଲ୍ଡ ଅମ୍ପାୟର ରଡ୍ ଟକର ଓ ଶାର୍ଫୁଦୋଲ୍ଲା ଇବ୍ନେ ଶାହିଦ, ତୃତୀୟ ଅମ୍ପାୟର ପଲ୍ ରିଫେଲ ଓ ଚତୁର୍ଥ ଅମ୍ପାୟର ପଲ୍ ଓ୍ବିଲସନ ଗୁରୁବାଜଙ୍କ ବିରୋଧରେ ଅଭିଯୋଗ ଆଣିଥିଲେ। ଆଚରଣବିଧିର ଧାରା-୧ ଉଲ୍ଲଂଘନ କଲେ ଏକ ବିଧିବଦ୍ଧ ଭର୍ତ୍ସନା, ସମ୍ପୃକ୍ତ ଖେଳାଳିଙ୍କ ମ୍ୟାଚ ଫି’ର ସର୍ବାଧିକ ୫୦ ପ୍ରତିଶତ ଜରିମାନା ଏବଂ ଏକ କିମ୍ବା ଦୁଇ ଡିମେରିଟ୍ ପଏଣ୍ଟରେ ଦଣ୍ଡର ବ୍ୟବସ୍ଥା ରହିଛି।