ନୂଆଦିଲ୍ଲୀ, ୧୮।୧୨: ଭାରତରେ ପ୍ରତିବର୍ଷ କ୍ୟାନ୍ସର ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ପ୍ରତି ୯ ଜଣଙ୍କ ମଧ୍ୟରୁ ଜଣେ ଭାରତୀୟଙ୍କ ଶରୀରରେ କ୍ୟାନ୍ସର ବିକଶିତ ହେଉଥିବା ନ୍ୟାଶନାଲ ସେଣ୍ଟର ଫର୍ ଡିଜିଜ୍ ଇନ୍ଫରମେଟିକ୍ସ ଆଣ୍ଡ୍ ରିସର୍ଚ୍ଚ (ଏନ୍ସିଡିଆଇଆର୍) ଏବଂ ଆଇସିଏମ୍ଆର୍ ପକ୍ଷରୁ କରାଯାଇଥିବା ମିଳିତ ଅଧ୍ୟୟନ ରିପୋର୍ଟରେ ଉଲ୍ଲେଖ କରାଯାଇଛି। ଦେଶରେ ଦେଖାଯାଇଥିବା ନୂଆ କ୍ୟାନ୍ସର ମାମଲା ସାଙ୍ଗକୁ ମୋଟ ଜନସଂଖ୍ୟା ଭିତ୍ତିରେ ରିପୋର୍ଟ ଇଣ୍ଡିଆନ୍ ଜର୍ନାଲ ଅଫ୍ ମେଡିକାଲ ରସର୍ଚ୍ଚ (ଆଇଜେଏମ୍ଆର୍)ରେ ଏହା ପ୍ରକାଶ ପାଇଛି। ନବଜାତଠାରୁ ୭୪ ବର୍ଷ ବୟସ ବର୍ଗଙ୍କ କ୍ଷେତ୍ରରେ ପ୍ରତି ୬୭ ପୁରୁଷଙ୍କ ମଧ୍ୟରୁ ଜଣଙ୍କଠାରେ ଫୁସ୍ଫୁସ୍ କ୍ୟାନ୍ସର ହେବାର ଆଶଙ୍କା ରହିଛି। ସେହିପରି ପ୍ରତି ୨୯ ମହିଳାଙ୍କ ମଧ୍ୟରୁ ଜଣଙ୍କ ଶରୀରରେ ସ୍ତନ କର୍କଟର ଡର ଥିବା ରିପୋର୍ଟରେ ଦର୍ଶାଯାଇଛି।
ଚଳିତବର୍ଷ ଦେଶରେ ମୋଟ ୧୪.୬ ଲକ୍ଷ ଲୋକ କର୍କଟ ରୋଗ ଦ୍ୱାରା ପ୍ରଭାବିତ ହୋଇଛନ୍ତି। ତେବେ ସବୁଠାରୁ ଅଧିକ ଲୋକ ଫୁସ୍ଫୁସ୍ ଏବଂ ବ୍ରେଷ୍ଟ କ୍ୟାନ୍ସରରେ ଆକ୍ରାନ୍ତ ହେଉଥିବା ଜଣାପଡ଼ିଛି। ଅନ୍ୟପକ୍ଷେ ନବଜାତ ଶିଶୁଙ୍କଠୁ ଆରମ୍ଭ କରି ୧୪ ବର୍ଷ ବୟସ ବର୍ଗ ଲିମ୍ଫୋଏଡ୍ ଲ୍ୟୁକେମିଆ (ଅସ୍ଥିମଜ୍ଜା କର୍କଟ) କ୍ୟାନ୍ସରରେ ଅଧିକମାତ୍ରାରେ ଆକ୍ରାନ୍ତ ହେଉଥିବାବେଳେ ସେମାନଙ୍କ ମଧ୍ୟରେ ୨୯.୨% ପୁଅ ଓ ୨୪.୨% ଝିଅ ରହିଛନ୍ତି। ୨୦୨୦ ତୁଳନାରେ ୨୦୨୫ ବେଳକୁ ଆକ୍ରାନ୍ତଙ୍କ ସଂଖ୍ୟା ୧୨.୮% ବୃଦ୍ଧି ପାଇବ ବୋଲି ରିପୋର୍ଟରେ କୁହାଯାଇଛି।
ଦେଶରେ କର୍କଟଜନିତ ମୃତ୍ୟୁ ସଂଖ୍ୟା ୨୦୨୦ ଅନୁସାରେ ଚଳିତବର୍ଷ ବୃଦ୍ଧି ପାଇଥିବା କେନ୍ଦ୍ରିୟ ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ ରାଜ୍ୟ ସଭାରେ କହିଛନ୍ତି। କ୍ୟାନ୍ସର, ମଧୁମେହ ଏବଂ ହୃଦ୍ଜନିତ ରୋଗର ନିରାକରଣ ପାଇଁ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ପକ୍ଷରୁ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ଆବଶ୍ୟକ ଚିକିତ୍ସା ବ୍ୟବସ୍ଥା ଯୋଗାଇ ଦିଆଯାଉଛି।